San Mateo 17:1-27 RIPV1996 - Bible AI

¹Kalpasanⓖ ti innem nga aldaw, inkuyog ni Jesus ni Pedro ken dagiti agkabsat a Santiago ken Juan ket is-isuda a simmang-at iti nangato a bantay.

²Sadiay, nagbalbaliw ti langa ni Jesus iti imatang dagiti tallo nga adalan: nagraniag ti rupana a kas iti init, ket rimmangrang a kas lawag dagiti pagan-anayna.

³Pagammoan, nakitada da Moises ken Elias a makisarsarita ken ni Jesus.

⁴Kinuna ni Pedro, “Apo, nagsayaaten ti kaaddatayo ditoy! No kayatmo, mangipatakderak ditoy iti tallo a kalapaw: maysa ti para kenka, maysa ti para ken ni Moises, ket ti maysa para ken ni Elias.”

⁵Agsasaoⓗ pay laeng ni Pedro idi adda naraniag nga ulep a nanglinong kadakuada. Adda timek a naggapu iti ulep a nagkuna, “Daytoy ti Anakko a dungdungngoek ken pakaragsakak unay. Dumngegkayo kenkuana!”

⁶Napalalo ti buteng dagiti adalan a nakangngeg iti timek. Nagpaklebda iti daga.

⁷Immasideg ni Jesus ket sinagidna ida. “Bumangonkayo,” kinunana. “Dikay agbuteng.”

⁸Idi timmangadda, awan sabali a nakitada no di laeng ni Jesus.

⁹“Awan pangibagbagaanyo iti naimatanganyo. Ibagayonto laeng daytoy kalpasan ti pannakapagungar ti Anak ti Tao,” imbilin ni Jesus kadakuada idi sumalsalogda iti bantay.

¹⁰Sinaludsodⓘ kenkuana dagiti adalan, “Apay a kuna dagiti mamaestro iti Linteg a masapul nga umay nga umuna ni Elias?”

¹¹Insungbat ni Jesus, “Pudno nga umay nga umuna ni Elias tapno tarimaanenna amin a banag.

¹²Ngemⓙ daytoy ti ibagak kadakayo: Immayen ni Elias ngem saan a nailasin dagiti tattao. Inaramidda ketdi kenkuana ti kinaykayatda. Kastanto met ti panangparigatda iti Anak ti Tao.”

¹³Ket naawatan dagiti adalan a ni Juan a Mammuniag[36] ti sarsaritaenna kadakuada.

¹⁴Idi nagsublida iti yan dagiti tattao, adda lalaki nga immasideg ken ni Jesus ket nagparintumeng iti sangoananna

¹⁵sana kinuna, “Apo, kaasiam kadi ti anakko a lalaki. Agkiskissiw ket agsagsagaba iti napalalo. Masansan a matnag iti apuy wenno iti danum.

¹⁶Impanko kadagiti adalam ngem dida mapaimbag.”

¹⁷Simmungbat ni Jesus, “Tattao a managdakdakes ken awanan pammati! Kasano pay kabayag ti kaaddak iti dennayo? Kasano pay kabayag ti panaganusko kadakayo? Yegyo man kaniak ti ubing!”

¹⁸Inungtan ni Jesus ti demonio, ket rimmuar manipud iti ubing. Immimbag ti ubing iti dayta met la nga oras.

¹⁹Kalpasanna, sililimed a napan dagiti adalan ken ni Jesus ket sinaludsodda kenkuana, “Apay a dimi mapaksiat ti demonio?”

²⁰“Gapuⓚ ta bassit ti pammatiyo,” insungbat ni Jesus. “Laglagipenyo a no adda pammatiyo a kas iti kadakkel ti bukel ti mostasa, mabalinyo a kunaen iti daytoy a bantay, ‘Umaliska ket inka sadiay,’ ket umalis. Mabalinyo nga aramiden ti uray ania!”[37]

²²Idi naguurnong dagiti adalan idiay Galilea, kinuna ni Jesus kadakuada, “Dandanin mayawat ti Anak ti Tao kadagiti tattao

²³a mangpapatayto kenkuana. Ngem mapagungarto iti maikatlo nga aldaw.”

²³Kasta unay ti ladingit dagiti adalan.

²⁴Idiⓛ napan ni Jesus ken dagiti adalanna idiay Capernaum, immasideg ken ni Pedro dagiti agsingsingir iti buis nga agpaay iti Templo, ket sinaludsodda, “Agbubuis met la ni maestroyo iti maipaay iti Templo?”

²⁵“Wen, a,” insungbat ni Pedro. Idi simrek ni Pedro iti balay, immuna a nagsao ni Jesus, “Simon, ania ti makunam? Siasino ti agbayad iti buis kadagiti ar-ari ditoy lubong? Dagiti umili wenno dagiti ganggannaet?”

²⁶“Dagiti ganggannaet,” insungbat ni Pedro. “No kasta ngarud,” kinuna ni Jesus, “saan a masapul nga agbayad dagiti umili.

²⁷Ngem ditayo kayat nga adda makuna dagitoy a tattao. Inka ngarud agbanniit idiay dan-aw. Alaem ti umuna nga ikan a mabanniitam ket ngangaem ti ngiwatna. Masarakamto ti kuarta nga umanay a pagbuista. Alaem ket inka bayadan ti buista.”