San Mateo 21:1-46 RIPV1996 - Bible AI

¹Idi asidegdan idiay Jerusalem ket nakadanondan idiay Betfage iti Bantay Olivo, pinauna ni Jesus ti dua kadagiti adalan. Imbilinna kadakuada,

²“Inkayo iti masungad a barrio, ket makitayonto a dagus ti maysa a sigagalut nga asno ken ti urbonna. Warwaranyo ket yegyo ida kaniak.

³No adda agsaludsod, daytoy ti ibagayo, ‘Masapul ida ti Apo’[45] ket ipalubosnanto a dagus nga alaenyo ida.”

⁴Naaramid daytoy tapno matungpal ti kinuna ti profeta:

⁵“Ipakaammoyoⓘ iti siudad ti Sion: Umayen ti arim, Napakumbaba ken sisasakay iti asno; Wen, iti urbon ti asno.”

⁶Napan ngarud dagiti adalan ket tinungpalda ti naibilin kadakuada.

⁷Insangpetda ti asno ken ti urbonna. Inyap-apda dagiti kagayda kadagiti asno ket simmakay ni Jesus.

⁸Inyaplag dagiti adu a tattao dagiti kagayda iti kalsada. Nagsep-ak met dagiti dadduma kadagiti sangsanga ti kaykayo ket inyaplagda iti dalan.

⁹“Madaydayawⓙ ti Anak ni David!” impukpukkaw dagiti tattao a magmagna iti sangoanan ni Jesus ken dagiti sumursurot kenkuana. “Bendisionan koma ti Dios ti umay iti nagan ti Apo! Madaydayaw koma ti Dios!”

¹⁰Idi simrek ni Jesus idiay Jerusalem, nariribuk dagiti amin a tattao iti siudad. “Siasino daytoy?” sinaludsodda.

¹¹“Daytoy ni Jesus a profeta a taga-Nazaret idiay Galilea,” insungbat dagiti tattao.

¹²Simrek ni Jesus iti Templo ket pinaruarna dagiti amin nga agtagtagilako ken aggatgatang sadiay. Binalintuagna dagiti lamisaan dagiti agsuksukat iti kuarta ken dagiti tugaw dagiti aglaklako iti kalapati.

¹³Kinunanaⓚ kadakuada, “Nailanad iti Nasantoan a Surat a kuna ti Dios, ‘Managanto ti balayko iti balay a pagkararagan.’ Ngem pagbalbalinenyo met a rukib dagiti mannanakaw!”

¹⁴Napan dagiti bulsek ken lugpi ken ni Jesus idiay Templo ket pinaimbagna ida.

¹⁵Nakaunget dagiti panguloen a papadi ken mamaestro iti Linteg idi makitada dagiti nakaskasdaaw nga ar-aramidenna ken mangngegda ti ipukpukkaw dagiti ubbing iti Templo, “Madaydayaw ti Anak ni David!”

¹⁶Ngarud,ⓛ sinaludsodda ken ni Jesus, “Mangngegmo ti sasawenda?” “Wen,” insungbatna. “Diyo aya nabasa ti kuna ti Nasantoan a Surat? ‘Insurom dagiti ubbing ken maladaga a mangyebkas iti umisu a panagdaydayaw.’ ”

¹⁷Pinanawan ida ni Jesus, rimmuar iti siudad ket napan immian idiay Betania.

¹⁸Iti agsapa iti sumuno a bigat, idi agsubli ni Jesus iti siudad, nabisinan.

¹⁹Nakitana ti maysa a kayo nga igos iti igid ti dalan. Inasitganna ngem awan nakitana a bunga no di laeng bulong. Iti kasta, kinunana iti kayo, “Saankanton nga agbunga!”

¹⁹Dagus a nagango ti kayo.

²⁰Nasdaaw dagiti adalan idi makitada daytoy. “Kasano ti panaggango a dagus daytoy nga igos?” sinaludsodda.

²¹Insungbatⓜ ni Jesus, “Laglagipenyo daytoy! No mamatikayo ket dikay agduadua, maaramidyonto ti kas iti inaramidko iti daytoy a kayo. Saan la a dayta. Mabalinyonto pay a kunaen iti daytoy a turod, ‘Umaliska ditoy ket tumpuakka idiay baybay,’ ket maaramidto a kasta.

²²No adda pammatiyo, awatenyonto ti aniaman a dawatenyo iti kararagyo.”

²³Nagsubli ni Jesus idiay Templo. Idi madama a mangisursuro, immasideg kenkuana dagiti panguloen a papadi ken dagiti panglakayen a Judio, ket sinaludsodda, “Ania ti kalintegam a mangaramid kadagitoy? Siasino ti nangted kenka iti daytoy a turay?”

²⁴“Agsaludsodak met kadakayo,” insungbat ni Jesus. “No masungbatandak, ibagak met kadakayo no ania ti kalintegak nga agaramid kadagitoy.

²⁵Naggapuan ti turay ni Juan a Mammuniag:[46] iti Dios wenno iti tao?”

²⁵Nagsisinnaludsodda, “Ania ti isungbattayo? No kunatayo, ‘Naggapu iti Dios,’ kunananto kadatayo, ‘Apay ngarud a dikay namati ken ni Juan?’

²⁶Ngem no kunatayo, ‘Naggapu iti tao,’ mabutengtayo met no ania ti aramiden dagiti tattao ta imbilangda ni Juan a maysa a profeta.”

²⁷Iti kasta, insungbatda ken ni Jesus, “Dimi ammo.” Kinuna ni Jesus kadakuada, “Diak met ngarud ibaga kadakayo no ania ti kalintegak nga agaramid kadagitoy.”

²⁸“Ania ti makunayo iti daytoy? Adda idi ama nga addaan iti dua nga annak a lallaki. Napan iti inauna ket kinunana, ‘Anakko, inka agtrabaho ita idiay kaubasan.’

²⁹“‘Diak kayat,’ kinuna ti anak, ngem kalpasanna, nagbabawi ket napan met laeng.

³⁰“Napan met ti ama iti maikadua ket imbagana ti kas iti insaona iti inauna. “ ‘Wen, ama,’ kinunana, ngem saan a napan.

³¹“Siasino kadakuada ti nangtungpal iti pagayatan ti amada?” sinaludsod ni Jesus. “Ti inauna,” kinunada. Kinuna ni Jesus, “Ngem daytoy met ti kunak kadakayo: Umun-unanto ngem dakayo a mapan iti Pagarian ti Dios dagiti agsingsingir iti buis ken dagiti dakes a babbai.

³²Taⓝ immay kadakayo ni Juan a nangisuro iti pudno a dalan a surotenyo ket diyo pinati; ngem namati kenkuana dagiti agsingsingir iti buis ken dagiti dakes a babbai. Ket uray pay kalpasan ti pannakakitayo iti daytoy, dikay latta nagbabawi ken namati kenkuana.”

³³Kinunaⓞ ni Jesus, “Denggenyo ti maysa pay a pangngarig: Adda tao a nagmula iti adu nga ubas. Inaladanna ti kaubasan, nangaramid iti pagpespesan iti ubas sa nangipatakder iti torre a pagwanawanan. Kalpasanna, impaabangna ti kaubasan kadagiti makitaltalon sa nagbiahe iti sabali a daga.

³⁴“Idi dumteng ti panagbuburas iti ubas, imbaon ti akinkukua iti kaubasan dagiti adipenna a mapan kadagiti makitaltalon tapno alaenda ti bingayna.

³⁵Ngem tiniliw dagiti makitaltalon dagiti adipen. Kinabilda ti maysa kadakuada, pinatayda ti maikadua ket inuborda ti maikatlo.

³⁶“Nangibaon manen kadagiti adipen nga ad-adu ngem idi damo ket kasta met laeng ti inaramidda kadakuada.

³⁷“Kamaudiananna, imbaonna kadakuada ti anakna. ‘Awan duadua a padayawandanto toy anakko,’ kinunana.

³⁸“Ngem idi makita dagiti makitaltalon ti anak ti akinkukua iti kaubasan, kinunada iti maysa ken maysa, ‘Daytoyen ti agtawid! Umaykayo ta papatayentayo ket kukuatayton ti kaubasan!’

³⁹“Iti kasta, tiniliwda ti anak, ket inruarda iti kaubasan sada pinatay.

⁴⁰“Ita,” sinaludsod ni Jesus, “inton umay ti akinkukua iti kaubasan, anianto ti aramidenna kadagiti makitaltalon?”

⁴¹Kinunada, “Awan duadua a patayennanto dagiti naranggas a makitaltalon. Ket ipaabangnanto ti kaubasan kadagiti sabali a makitaltalon a mangtedto kenkuana iti bingayna iti tiempo ti panagapit.”

⁴²Kinunaⓟ ni Jesus kadakuada, “Diyo pay aya nabasa ti nailanad iti Nasantoan a Surat? ‘Ti bato nga imbelleng dagiti agipatpatakder, Nagbalin a kangrunaan a bato. Inaramid daytoy ti Apo, Ket anian a nakakaskasdaaw iti imatangtayo!’”

⁴³“Isut' gapuna nga ibagak kadakayo,” innayon pay ni Jesus, “a maikkatto kadakayo ti Pagarian ti Dios ket maitedto kadagiti tattao a makaited kadagiti umno a bunga.

⁴⁴Maburburakto ti siasinoman a matnag iti daytoy a bato, ket matumekto a kas tapok ti siasinoman a matupakanna.”[47]

⁴⁵Nangngeg dagiti panguloen a papadi ken dagiti Fariseo dagiti pangngarig ni Jesus ket naawatanda nga isuda ti sarsaritaenna.

⁴⁶Pinadasda a patiliw, ngem mabutengda kadagiti tattao ta imbilangda ni Jesus a maysa a profeta.