San Mateo 26:1-75 RIPV1996 - Bible AI

¹Idi nalpasen nga insuro ni Jesus amin dagitoy a bambanag, kinunana kadagiti adalanna,

²“Ammoyoⓑ a dua nga aldaw laengen sakbay ti Fiesta ti Paskua. Mayawatto ti Anak ti Tao tapno mailansa iti krus.”

³Naguurnong dagiti panguloen a papadi ken dagiti panglakayen dagiti Judio iti palasio ni Caifas a Kangatoan a Padi.

⁴Nagtutulaganda a tiliwen a sililimed ni Jesus sada papatayen.

⁵“Ditay iranrana iti fiesta, amangan no rumsua ti riribuk,” kinunada.

⁶Adda idi ni Jesus idiay Betania, iti balay ni Simon nga agkukutel.

⁷Idiⓒ madama a mangmangan, napan kenkuana ti maysa a babai a nakaiggem iti sangabotelia a nangina a bangbanglo, ket imbukbokna iti ulo ni Jesus.

⁸Nakapungtot dagiti adalan idi makitada ti inaramidna ket kinunada, “Apay a sinayangna ti bangbanglo?

⁹Nangina koma ti pakailakoanna sa maited ti kuarta kadagiti napanglaw!”

¹⁰Ammo ni Jesus ti sasawenda isu a kinunana kadakuada, “Apay a babalawenyo daytoy a babai? Nasayaat unay ti inaramidna kaniak.

¹¹Taⓓ kankanayon nga adda dagiti napanglaw iti dennayo, ngem saan a kankanayon nga addaak iti arpadyo.

¹²Imbukbokna iti bagik daytoy a bangbanglo tapno isagananak a maitanem.

¹³Kinapudnona, kunak kadakayo: Sadinoman a pakaikaskasabaan daytoy Naimbag a Damag, masarsaritanto ti inaramid daytoy a babai a pakalaglagipan kenkuana.”

¹⁴Kalpasan daytoy, maysa kadagiti sangapulo ket dua nga adalan nga agnagan iti Judas Iscariote ti napan kadagiti panguloen dagiti papadi.

¹⁵“Aniaⓔ ti itedyo kaniak no yawatko ni Jesus kadakayo?” kinunana.

¹⁵Inikkanda iti tallopulo a bagi ti pirak.[56]

¹⁶Manipud iti dayta a kanito, binirbirok ni Judas ti gundawayna a mangliput ken Jesus.

¹⁷Iti umuna nga aldaw ti Fiesta ti Tinapay nga awan Lebadurana, napan dagiti adalan ken ni Jesus ket sinaludsodda, “Sadino ti kayatmo a pangisaganaanmi iti pangrabiim iti Paskua?”

¹⁸Kinunana kadakuada, “Inkayo iti maysa a tao iti siudad ket ibagayo kenkuana, ‘Kuna ti Maestro: Dimtengen ti orasko. Ditanto balaymo ti pangrambakanmi iti Paskua kadagiti adalak.’ ”

¹⁹Tinungpal dagiti adalan ti imbilin ni Jesus ket insaganada ti pangrabii a pangrambak iti Paskua.

²⁰Idi rumabiin, simmango ni Jesus ken dagiti sangapulo ket dua nga adalan iti panganan.

²¹Bayat ti pannanganda, kinuna ni Jesus, “Ibagak kadakayo ti pudno: maysanto kadakayo ti mangliput kaniak.”

²²Kasta unay ti pannakariribuk dagiti adalan ket maysa-maysa nagsaludsod kenkuana, “Apo, siak kad dayta kunkunam?”

²³“Tiⓕ kinagiddanko a nangisawsaw ti tinapay iti malukong, isunto ti mangliput kaniak,” insungbat ni Jesus.

²⁴“Matayto ti Anak ti Tao kas kuna ti Nasantoan a Surat, ngem asi pay ti mangliputto iti Anak ti Tao! Naim-imbag pay koma no di nayan-anak dayta a tao.”

²⁵Nagsao ni Judas a nangliput kenkuana: “Maestro, siak kadi ti kunam?” “Nasaomon!” insungbat ni Jesus.

²⁶Idi mangmanganda, nangala ni Jesus iti tinapay, nagyaman iti Dios, ket pinisina sana inted kadagiti adalanna. “Alaenyo daytoy ket kanenyo,” kinunana. “Daytoy ti bagik.”

²⁷Kalpasanna, nangala iti kopa, nagyaman iti Dios, sana inyawat kadakuada. Kinunana, “Uminumkayo amin iti daytoy;

²⁸daytoyⓖ ti darak a mamatalged iti tulag ti Dios, ti darak a naibuyat nga agpaay iti adu a tao, tapno mapakawan dagiti basbasol.

²⁹Ibagak kadakayo: Diakto uminumen iti arak ti ubas agingga iti dayta nga aldaw a pannakiinumko kadakayo iti baro nga arak ti ubas idiay Pagarian ni Amak.”

³⁰Kalpasan ti panangkantada iti maysa nga himno, rimmuarda a napan idiay Bantay Olivo.

³¹Kinunaⓗ ni Jesus kadakuada, “Iti daytoy met la a rabii, panawandakto, dakay amin, agsipud ta kuna ti Nasantoan a Surat, ‘Patayento ti Dios ti agpaspastor ket mawarawaranto ti arban dagiti karnero.’

³²Ngemⓘ kalpasan ti pannakapagungarko, umun-unaakto ngem dakayo a mapan idiay Galilea.”

³³“Uray panawandakanto amin,” kinuna ni Pedro, “dikanto panawan.”

³⁴Kinuna ni Jesus kenkuana, “Laglagipem daytoy: Sakbay nga agtaraok ti kawitan ita a rabii, namitlonton nga imbagam a dinak am-ammo!”

³⁵“Uray matayak a mairaman kenka,” insungbat ni Pedro, “pulos a dikanto ilibak.” Kasta met ti kinuna dagiti amin nga adalan.

³⁶Kalpasanna, napan ni Jesus ken dagiti adalanna iti maysa a disso a managan Getsemani. Kinunana kadakuada: “Agtugawkayo ditoy, ta innak agkararag sadiay.”

³⁷Inkuyogna ni Pedro ken dagiti dua nga annak ni Zebedeo. Nagladingit ken nagtuok iti napalalo.

³⁸“Matayak iti nakaro a ladingit,” kinunana kadakuada. “Agbatikayo ditoy ket makipagpuyatkayo kaniak.”

³⁹Immadayo bassit sa nagpakleb iti daga ket nagkararag: “Ama, no mabalin, ilisinak iti daytoy a kopa ti panagsagaba. Nupay kasta, saan a ti pagayatak ti maaramid no di ket ti pagayatam.”

⁴⁰Nagsubli ni Jesus kadagiti tallo nga adalan ket nadanonna ida a matmaturog. Kinunana ken ni Pedro: “Diyo aya kabaelan ti makipagpuyat kaniak iti uray maysa la nga oras?

⁴¹Agridam ken agkararagkayo tapno saankay a matnag iti sulisog. Sisasagana ti espiritu, ngem nakapuy ti lasag.”

⁴²Immadayo manen ni Jesus tapno mapan agkararag. “Ama,” kinunana, “no masapul nga inumek daytoy a kopa ti panagsagaba, maaramid koma ti pagayatam.”

⁴³Nagsubli manen kadagiti adalan ket nadanonna ida a matmaturog, ta makaturturogda la unay.

⁴⁴Pinanawan manen ni Jesus ida sa napan nagkararag iti maikatlo a daras. Inulitna ti kararagna.

⁴⁵Kalpasanna, nagsubli kadagiti adalan ket kinunana: “Ania? Matmaturog ken agin-inanakayo pay kadi? Dimtengen ti oras a mayawat ti Anak ti Tao iti ima dagiti managbasol.

⁴⁶Bumangonkayo ta intayon. Kitaenyo, adtoyen ti tao a mangliput kaniak.”

⁴⁷Agsasao pay laeng ni Jesus idi sumangpet ni Judas, maysa kadagiti sangapulo ket dua nga adalan. Kimmuyog kenkuana dagiti adu a tao a nagtagikampilan ken nagtagipang-or. Imbaon ida dagiti panguloen a papadi ken dagiti panglakayen dagiti Judio.

⁴⁸Daytoy ti pagilasinan nga inted ti mangliput kadagiti kimmuyog kenkuana sakbay a mapanda: “Daydiay ungngoak isu ti masapulyo. Tiliwenyo!”

⁴⁹Immasideg a dagus ni Judas ken ni Jesus ket kinunana, “Naimbag a rabiim, Maestro,” sana inagkan.

⁵⁰“Gayyem,” insungbat ni Jesus, “dagdagusem nga aramiden ti panggepmo!”[57] Immasideg dagiti tattao, ket tiniliwda ni Jesus.

⁵¹Inasut ti maysa kadagiti kadua ni Jesus ti bunengna sana tinagbat ti adipen ti Kangatoan a Padi ket napingasan ti lapayagna.

⁵²Ngem kinuna ni Jesus, “Idulinmo ta bunengmo agsipud ta ti mangaramat iti buneng matayto iti buneng.

⁵³Dimo aya ammo a mabalinko ti agpatulong ken ni Amak ket ibaonna a dagus ti nasurok a sangapulo ket dua nga armada dagiti angheles?

⁵⁴Ngem no maaramid dayta, kasano ti pannakatungpal ti kuna ti Nasantoan a Surat a masapul a kastoy ti mapasamak?”

⁵⁵“Tulisanakⓙ aya, ta nagtagikampilan ken nagtagipang-orkayo nga umay mangtiliw kaniak?” kinuna ni Jesus kadagiti tattao. “Inaldaw nga agtugtugawak a mangisursuro idiay Templo ket didak tiniliw.

⁵⁶Ngem maaramid amin dagitoy tapno matungpal ti sinao dagiti profeta a nailanad iti Nasantoan a Surat.”

⁵⁶Nagtataray amin dagiti adalan ket binaybay-anda ni Jesus.

⁵⁷Kalpasan ti panangtiliwda ken ni Jesus, impanda iti balay ni Caifas a Kangatoan a Padi, a naguurnongan dagiti mamaestro iti Linteg ken dagiti panglakayen.

⁵⁸Simmurot ni Pedro nga adda iti adayo, agingga iti paraangan ti balay ti Kangatoan a Padi. Simrek a nakikatugaw kadagiti guardia tapno kitaenna ti pagbanagan ti amin.

⁵⁹Nagbirbirok dagiti panguloen a papadi ken ti entero a Sanhedrin iti ulbod a pammaneknek a maibusor ken Jesus tapno papapatayda.

⁶⁰Ngem awan ti nasarakanda, nupay adu ti nagsao iti ulbod a maikontra kenkuana. Kamaudiananna, timmakder ti dua a tao

⁶¹aⓚ nagkuna, “Kinuna daytoy a tao a kabaelanna a rebbaen ti Templo ti Dios, ket bangonenna met laeng kalpasan[58] ti tallo nga aldaw.”

⁶²Timmakder ti Kangatoan a Padi ket kinunana ken Jesus, “Ania ti maisungbatmo kadagitoy nga ipabpabasolda kenka?”

⁶³Ngem nagulimek ni Jesus. Kinuna manen kenkuana ti Kangatoan a Padi, “Isapatam iti nagan ti sibibiag a Dios ket ibagam kadakami no sika ti Cristo nga Anak ti Dios.”

⁶⁴“Nasaomon!”ⓛ insungbat ni Jesus. “Ngem kunak kadakayo amin: Makitayonto ti Anak ti Tao a situtugaw iti makannawan ti Mannakabalin-amin. Makitayonto nga umay kadagiti ulep ti langit.”

⁶⁵Itiⓜ kasta, rinay-ab ti Kangatoan a Padi ti pagan-anayna. “In-insultoenna ti Dios![59] Ania pay la ti pakasapulantayo kadagiti saksi?” kinunana. “Nangngegyon dagiti saona a maikaniwas iti Dios.

⁶⁶Ania ti pangngeddengyo?”

⁶⁶“Nakabasol,” insungbatda. “Masapul a matay!”

⁶⁷Ketⓝ tinupratupraanda ti rupana ken dinanogdanogda. Tinungpatungpa met dagiti dadduma.

⁶⁸“Pugtoam man, Cristo, no siasino ti nangtungpa kenka?” kinunada.

⁶⁹Agtugtugaw ni Pedro iti paraangan idi umasideg kenkuana ti maysa nga adipen a babai a nagkuna: “Uray sika, nakikadkaduaka met ken ni Jesus a taga-Galilea.”

⁷⁰Ngem naglibak ni Pedro iti sangoananda amin. “Diak ammo ti sasawem,” kinunana.

⁷¹Rimmuar ni Pedro a nagturong iti ruangan. Nakita ti sabali nga adipen a babai ket kinunana kadagiti tattao sadiay, “Nakikuykuyog met daytoy a tao ken ni Jesus a taga-Nazaret.”

⁷²Naglibak manen ni Pedro ket kinunana: “Isapatak a diak am-ammo dayta a tao.”

⁷³Iti saan a mabayag, immasideg kenkuana dagiti tattao nga agtatakder sadiay. “Agpayso a maysaka kadakuada,” kinunada. “Dayta bengngatmo ti pakailasinan.”

⁷⁴“Uray dusaennak ti Dios no saan a pudno ti ibagbagak!” insapata ni Pedro. “Diak am-ammo dayta a tao.” Pagammoan, nagtaraok ti maysa a kawitan,

⁷⁵ket nalagip ni Pedro ti imbaga ni Jesus kenkuana: “Sakbay ti panagtaraok ti kawitan, namitlonton nga imbagam a dinak am-ammo!”

⁷⁵Rimmuar ni Pedro ket nagsangit iti nasaem.