San Mateo 4:1-25 RIPV1996 - Bible AI

¹Tiⓡ Espiritu inturongna ni Jesus idiay let-ang tapno sulisogen ti Diablo.

²Kalpasan ti uppat a pulo nga aldaw ken rabii a saanna a pannangan,[5] nabisinan ni Jesus.

³Immasideg kenkuana ti Diablo ket kinunana, “No sika ti Anak ti Dios, pagbalinem a tinapay dagitoy a bato.”

⁴Ngemⓢ insungbat ni Jesus, “Kuna ti Nasantoan a Surat, ‘Saan laeng a tinapay ti pagbiag ti tao no di pay ket ti tunggal balikas nga aggapu iti Dios.’”

⁵Ti Diablo inturongna ni Jesus iti Nasantoan a Siudad ket impanna iti kangatoan a paset ti Templo,

⁶sanaⓣ kinuna, “No sika ti Anak ti Dios, tumappuakka man, agsipud ta kuna ti Nasantoan a Surat,

⁶‘Bilinento ti Dios dagiti anghelesna a mangaywan kenka: Tapayaendakanto Tapno uray dagiti sakam saan a madunor iti bato.’”

⁷Ngemⓤ insungbat ni Jesus, “Kuna met ti Nasantoan a Surat, ‘Dimo sulisogen ti Apo a Diosmo.’”

⁸Impan ti Diablo iti nakangatngato a bantay ket impakitana kenkuana dagiti amin a pagarian ditoy lubong, agraman dayagda.

⁹“Itedko kenka amin dagitoy,” kinuna ti Diablo, “no agparintumeng ken agdaydayawka kaniak.”

¹⁰Insungbatⓥ ni Jesus, “Pumanawka, Satanas! Kuna ti Nasantoan a Surat, ‘Agdaydayawka iti Apo a Diosmo ket isu laeng ti pagserbiam.’”

¹¹Iti kasta, pimmanaw ti Diablo. Dimteng dagiti angheles ket nagserbida ken ni Jesus.

¹²Idiⓦ nadamag ni Jesus a naibalud ni Juan, nagsubli idiay Galilea.

¹³Saanⓧ a nagtaeng idiay Nazaret. Napan ketdi nagnaed idiay Capernaum, maysa nga ili iti igid ti Dan-aw ti Galilea, iti sakup dagiti daga ti Zabulon ken Neftali.

¹⁴Naaramid daytoy tapno matungpal ti impadto ni profeta Isaias:

¹⁵“Dagaⓨ ti Zabulon, ken daga ti Neftali, Iti sibay ti dan-aw, iti ballasiw ti Jordan, Galilea a pagnaedan dagiti Hentil![6]

¹⁶Dagiti tattao nga agnaed iti kasipngetan Nakitada ti naraniag a lawag! Ket kadagiti agnaed iti nasipnget a daga ni patay Nagraniag ti lawag!”

¹⁷Manipudⓩ iti dayta a tiempo, rinugian ni Jesus ti nangasaba: “Agbabawikayo kadagiti basbasolyo, agsipud ta asidegen ti Pagarian ti langit.”

¹⁸Idi magmagna ni Jesus iti igid ti Dan-aw ti Galilea, nakitana dagiti agkabsat a mangngalap, ni Simon (a managan Pedro) ken ni Andres. Iwaywayatda idi ti iketda idiay dan-aw.

¹⁹“Surotendak ket pagbalinenkayto a mangngalap kadagiti tao,” kinuna ni Jesus kadakuada.

²⁰Pinanawanda a dagus dagiti iketda ket simmurotda kenkuana.

²¹Intuloy ni Jesus ti nagna ket nakitana ti sabali pay nga agkabsat, da Santiago ken Juan nga annak ni Zebedeo. Siluluganda iti bangka agraman ni Zebedeo ket isagsaganada dagiti iketda. Inayaban ni Jesus ida.

²²Dagus a pinanawanda ti amada ken ti bangka ket simmurotda ken ni Jesus.

²³Sinursorⓐ ni Jesus ti amin a paset ti Galilea. Nangisursuro iti uneg dagiti sinagogada. Inkaskasabana ti Naimbag a Damag maipapan iti Pagarian. Nangag-agas kadagiti nadumaduma a saksakit ken sagsagabaen dagiti tattao.

²⁴Nagdinamag ni Jesus iti entero a daga ti Siria. Impan dagiti tattao kenkuana dagiti addaan iti nadumaduma a saksakit ken an-annayen: dagiti linuganan dagiti demonio, dagiti agkiskissiw, ken dagiti paralitiko. Pinaimbag amin ida ni Jesus.

²⁵Simmurot kenkuana dagiti adu a tattao a naggapu idiay Galilea, Decapolis, Jerusalem, Judea ken dagiti dagdaga iti ballasiw ti Jordan.