San Mateo 5:1-48 RIPV1996 - Bible AI

¹Idi makita ni Jesus dagiti adu a tattao, simmang-at iti bantay. Nagtugaw, ket immasideg kenkuana dagiti adalanna.

²Insurona ida.

²Kinunana:

³“Nagasat dagiti mangbigbig a napanglawda iti imatang ti Dios,[7] ta kukuada ti Pagarian ti Langit.

⁴“Nagasatⓑ dagiti agladingit, ta liwliwaento ida ti Dios.

⁵“Nagasatⓒ dagiti napakumbaba, ta maitedto kadakuada ti daga.

⁶“Nagasatⓓ dagiti nasged ti tarigagayda a mangtungpal iti pagayatan ti Dios, ta mapnekdanto.

⁷“Nagasat dagiti manangngaasi, ta kaasianto ida ti Dios.

⁸“Nagasatⓔ dagiti nadalus ti panagpuspusoda, ta makitadanto ti Dios.

⁹“Nagasat dagiti mamagkakappia, ta managandanto nga annak ti Dios.

¹⁰“Nagasatⓕ dagiti maidadanes gapu iti panangtungpalda iti pagayatan ti Dios, ta kukuada ti Pagarian ti Langit.

¹¹“Nagasatkayoⓖ no mapabpabainan, maidaddadanes ken mapadpadakeskayo gapu kaniak.

¹²Agrag-oⓗ ken agragsakkayo, agsipud ta dakkel ti gunggonayo sadi langit. Ta kastoy ti panangidadanes dagiti tattao kadagiti profeta nga immun-una ngem dakayo.”

¹³“Dakayoⓘ ti pannakaasin dagiti amin a tattao. Ngem no timmamnayen ti asin, saanen a mapaapgad. Awan serserbinan, no di ket maibelleng ken mapaypayatan.

¹⁴“Dakayoⓙ ti pannakasilaw ti lubong. Saan a mailinged ti ili a nabangon iti rabaw ti maysa a bantay.

¹⁵Awanⓚ ti tao a manggangat iti pagsilawan sana kaluban. Iparabawna ketdi iti nairanta a pagsaadanna tapno aglawag kadagiti amin a tattao nga adda iti balay.

¹⁶Masapulⓛ a kasta met ti panaglawag ti silawyo iti imatang dagiti tattao, tapno makitada dagiti naimbag nga aramidyo ket idaydayawda ni Amayo sadi langit.”

¹⁷“Diyo ipagarup nga umayko waswasen ti Linteg ni Moises ken dagiti pannursuro dagiti profeta. Diak immay tapno waswasek dagitoy no di ket tapno ibanagko ida.

¹⁸Laglagipenyoⓜ a bayat ti panagpaut ti langit ken daga, dinto mapukaw ti uray maysa a tulnek wenno kabassitan a paset ti Linteg, agingga a matungpalda amin.[8]

¹⁹Isut' gapuna a ti mangsalungasing iti kabassitan kadagiti bilbilin ken mangisungsong kadagiti dadduma nga agsalungasing met, isunto ti kanumoan iti Pagarian ti Langit. Ngem ti siasinoman nga agtungpal iti Linteg ken mangisuro pay kadagiti sabali tapno agtungpalda met, isunto ti natan-ok iti Pagarian ti Langit.

²⁰Ngarud, ibagak kadakayo: makastrekkayto iti Pagarian ti Langit no napaspasnek ti panagtulnogyo iti pagayatan ti Dios ngem ti panagtungpal dagiti Fariseo ken dagiti mamaestro iti Linteg.”

²¹“Nangngegyoⓝ a naisao kadagiti tattao idi un-unana: ‘Dika mamapatay. Siasinoman a pumatay, maidarum.’

²²Ngem ita, ibagak kadakayo a siasinoman a makapungtot[9] iti kabsatna, maisaklangto iti ukom. Siasinoman nga agkuna iti kabsatna: ‘Awan serserbim,’ maisaklang iti Sanhedrin;[10] ket ti agkuna iti kabsatna, ‘Maagka,’ sungbatannanto idiay infierno.

²³Ngarud, no mangidatagka iti datonmo iti altar, ket malagipmo nga adda gura kenka ni kabsatmo,

²⁴ibatim ti datonmo iti sango ti altar; umuna pay nga inka makikappia ken ni kabsatmo sakanto agsubli a mangidatag iti datonmo.

²⁵“No adda mangidarum kenka, makiaregloka nga umuna kenkuana sakbay a mayuli ti darum. Ta no saan, isaklangnaka iti ukom, ket ti ukom yawatnaka iti guardia a mangipupok kenka iti pagbaludan.

²⁶Ibagak kenka nga idiaymonto agingga a mabayadam ti amin a multam.”

²⁷“Nangngegyoⓞ a naisao: ‘Dika makikamalala.’

²⁸Ngem ita, ibagak kadakayo a ti siasinoman a mangmatmat iti maysa a babai, ket gartemanna, iti pusona nakabasolen iti pannakikamalala.

²⁹Ngarud,ⓟ no ti makannawan a matam ti pakaigapuan ti panagbasolmo, suatem samo ibelleng. Nasaysayaat a mapukaw ti maysa a paset ti bagim ngem ti amin a bagim a maitappuak iti infierno.

³⁰Ketⓠ no ti makannawan nga imam ti pakaigapuan ti panagbasolmo, putdem samo ibelleng. Nasaysayaat nga awan ti maysa a takkiagmo ngem ti sibubukel a bagim a maitappuak iti infierno.”

³¹“Naisaoⓡ pay: ‘Siasinoman a lalaki a mangisina iti asawana, masapul nga ikkanna iti kasuratan ti panagsina.’

³²Ngemⓢ ita, ibagak kadakayo a no ti lalaki isinana ti asawana, idinto a sipupudno kenkuana ti babai, mapabasol dayta a lalaki iti pannakikamalala ti asawana no makiasawa manen. Kasta met a makabasol iti pannakikamalala ti mangasawa iti naisina a babai.”

³³“Nangngegyoⓣ met a naisao kadagiti tattao idi un-unana, ‘Dimo paglikudan ti karim, ngem tungpalem dagiti sinapataam iti Apo nga aramiden.’

³⁴Ngemⓤ ita, ibagak kadakayo a dikay agsapata a pulos no agkarikayo. Diyo pagsaksi ti langit ta isu ti trono ti Dios,

³⁵wennoⓥ ti daga ta isu ti pagbatayan dagiti sakana, wenno ti Jerusalem ta isu ti siudad ti naindaklan nga Ari.

³⁶Dimo met pagsapata ti ulom, agsipud ta dika makaaramid iti uray maysa la a buok, puraw man wenno nangisit.

³⁷Kastoy laeng ti kunayo: no wen, ‘Wen;’ no saan, ‘Saan,’ ta agtaud iti Managdakdakes ti aniaman nga inayonyo.”

³⁸“Nangngegyoⓦ a naisao, ‘Mata iti mata; ngipen iti ngipen.’

³⁹Ngem ita, ibagak kadakayo a diyo balsen ti siasinoman a mangdangran kadakayo. No adda mangtungpa iti makannawan a pingpingmo, itayam pay ti makannigid.

⁴⁰Kasta met a no adda mangidarum kenka tapno alaenna ti badom, bay-am nga alaenna pay ti kagaymo.

⁴¹Siasinoman a mangipapilit a kumuyogka kenkuana iti maysa a kilometro, kuyogem pay iti maikadua.

⁴²No adda dawatenda kenka, itedmo; no adda bulodenda kenka, ipabulodmo.”

⁴³“Nangngegyo a naisao, ‘Ayatem dagiti gagayyemmo ngem guraem dagiti kabusormo.’

⁴⁴Ngem ita, ibagak kadakayo: Ayatenyo dagiti kabusoryo ket ikararaganyo dagiti mangidadanes kadakayo,

⁴⁵tapno agbalinkayo nga annak ni Amayo sadi langit. Ta padapada a pagraniagenna ti initna kadagiti naimbag ken kadagiti dakes a tattao. Mangted iti tudo kadagiti agaramid iti naimbag, kasta met kadagiti agaramid iti dakes.

⁴⁶Apay a gunggonaannakayo koma ti Dios no dagiti laeng agayat kadakayo ti ayatenyo? Kasta met ti aramiden dagiti agsingsingir iti buis!

⁴⁷Ket no dagiti laeng gagayyemyo ti kasaoyo, adda kadi pakaidumaanyo kadagiti sabali a tattao? Kasta met ti aramid dagiti Hentil!

⁴⁸Masapulⓧ ngarud nga awan pagkuranganyo a kas ken ni Amayo sadi langit nga awan pagkuranganna.”