San Mateo 6:1-34 RIPV1996 - Bible AI

¹“Kitaenyoⓨ ta diyo pagpasindayag ti panagaramidyo iti naimbag kadagiti tattao. Ta no kasta ti aramidenyo, dinakayto gunggonaan ni Amayo sadi langit.

²“Ngarud, no mangtedka iti tulong, dimo iwaragawag a kas iti ar-aramiden dagiti aginsisingpet iti uneg dagiti sinagoga ken kadagiti kalsada. Aramidenda daytoy tapno dayawen ida dagiti tattao. Laglagipenyo nga inawatdan ti gunggonada.

³No manglimoska, mangtedka a saan a maammoan uray ti kaasitgan a gayyemmo,

⁴no di ket aramidem a sililimed. Ket ni Amam a makakita iti aramidmo a sililimed, gunggonaannakanto.”

⁵“Noⓩ agkararagkayo, diyo tuladen dagiti aginsisingpet! Igagarada ti agkararag a sitatakder kadagiti sinagoga[11] ken kadagiti lanlansangan tapno makita ida dagiti tattao. Laglagipenyo nga inawatdan ti gunggonada.

⁶Ngem no agkararagka, sumrekka iti kuartom, irikepmo ti ridaw, saka agkararag ken ni Amam a di makita. Ket isu a makakita kenka nga agkararag iti nalimed, gunggonaannakanto.

⁷“No agkararagkayo, diyo ulit-uliten dagiti awan serserbina a sasao, kas kadagiti pagano a mangipagarup a maipangagda gapu kadagiti atiddog a kararagda.

⁸Diyo tuladen ida; ta ammon ni Amayo dagiti kasapulanyo sakbay nga agdawatkayo kenkuana.

⁹Kastoy ngarud ti panagkararagyo:

⁹‘Amami sadi langit: Madaydayaw koma ti nasantoan a naganmo;

¹⁰Umay koma ti Pagariam; Matungpal koma ti pagayatam ditoy daga a kas sadi langit.

¹¹Itedmo kadakami ti taraonmi ita nga aldaw;[12]

¹²Pakawanennakami kadagiti basbasolmi, A kas iti pammakawanmi kadagiti nakabasol kadakami;

¹³Dinakam iturong iti nakaro a pakasuotan; Ilisinakami ketdi iti Managdakdakes.’[13]

¹⁴“Noⓐ pakawanenyo dagiti nakabasol kadakayo, pakawanennakayto met ni Amayo sadi langit.

¹⁵Ngem no diyo pakawanen dagiti nakabasol kadakayo, dinto met pakawanen ni Amayo dagiti basbasolyo.”

¹⁶“No agayunarkayo, dikay agparang a naliday a kas kadagiti aginsisingpet, ta agpammarangda a nakakaasi tapno maammoan dagiti tattao nga agay-ayunarda. Laglagipenyo nga inawatdan ti gunggonada.

¹⁷Ngem no agayunarka, agdiram-oska ket sagaysayem ti buokmo

¹⁸tapno awan makadlaw nga agay-ayunarka—ni laeng Amam a di makita ti makaammo. Ket isu a makaimatang iti aramidmo a nalimed, gunggonaannakanto.”

¹⁹“Dikayⓑ agurnong iti kinabaknang nga agpaay kadakayo ditoy daga, ta ditoy dadaelen ti sanga ken lati, ket serken ken takawen dagiti mannanakaw.

²⁰Agurnongkayo ketdi iti kinabaknang nga agpaay kadakayo sadi langit, ta sadiay saan nga agratik ken aglati, ket saan a serken ken takawen dagiti mannanakaw.

²¹Ta no sadino ti ayan ti gamengmo, adda met idiay ti pusom.”

²²“Ti mata ti pannakasilaw ti bagi: no nasalun-at ti matam, nalawag ti entero a bagim.

²³Ngem no saan a nasalun-at ti matam, nasipnget ti entero a bagim. Isut' gapuna a no nakudrep ti silawmo, anian a kinasipnget!”

²⁴“Awan ti makapagserbi iti dua nga appo: ta guraenna ti maysa ket ayatenna ti sabali, wenno agserbi a sipupudno iti maysa ket umsienna ti sabali. Diyo mapaggiddan a pagserbian ti Dios ken ti sanikua.”

²⁵“Daytoy ti gapuna nga ibagak kadakayo a diyo pakadanagan ti pagbiagyo, no ania ti kanenyo ken inumenyo, wenno ti lupot a pagkawesyo. Saan aya a napatpateg ti biag ngem ti taraon? Saan aya a napatpateg ti bagi ngem ti kawes?

²⁶Kitaenyo dagiti tumatayab: dida agmula, dida agani, dida agipempen iti kamalig. Ngem taraonan ida ni Amayo sadi langit. Saankayo aya a napatpateg ngem dagiti tumatayab?

²⁷Siasino kadakayo ti makapaatiddog iti biagna babaen iti panagdandanagna?

²⁸“Ken apay a pakadanaganyo ti pagan-anay? Kitaenyo ti panagdakkel dagiti lirio iti tay-ak: dida agtrabaho wenno agabel.

²⁹Ngemⓒ ibagak kadakayo nga uray ni Solomon, iti amin a kinabaknangna, awan kawesna a napimpintas ngem iti uray maysa kadagitoy a sabsabong.

³⁰No ti Dios kawesanna dagiti ruot iti tay-ak, ruot nga adda ita ket inton bigat maisungrod, saan aya a nangnangruna a kawesannakayo? Nagbassit ketdin ti pammatiyo!

³¹Isut' gapuna a dikay masikoran. Diyo kunkuna, ‘Pangalaanminto ngarud iti kanenmi? wenno inumenmi? wenno kawesmi?’

³²Dagitoy ti ipangpangruna a biroken dagiti Hentil. Ammo ni Amayo sadi langit a masapulyo amin dagitoy.

³³Ipangpangrunayo ketdi a biroken ti Pagarianna[14] ken tungpalen ti pagayatanna, ket itednanto amin a kasapulanyo.

³⁴Isut' gapuna a diyo pakasikoran ti agpaay kadakayo inton bigat; ta ti sumaganad nga aldaw adda bukodna a parikut. Umdasen ti parikut ti maysa nga aldaw iti dayta nga aldaw.”