Santiago 4:1-17 RIPV1996 - Bible AI

¹Ania ti pagtaudan dagiti panagsusuppiat ken panagriririyo? Aggapuda kadagiti dakes a tarigagay a kanayon nga agbibinnusor iti unegyo.

²Adu a bambanag ti tarigagayanyo ngem diyo matagikua ida, ket sidadaankayo a pumatay. Agumanyo dagiti bambanag ngem awan magun-odyo, isut' gapuna a makiriri ken makikabilkayo. Diyo maala ti kayatyo gapu ta dikay met agdawat iti Dios.

³Ket no agdawatkayo, awan maawatyo. Ngamin, dakes ti panggepyo; dagiti laeng bukod a pagragsakanyo ti dawatenyo.

⁴Tattao a di mapagtalkan! Diyo kad ammo a maibusor iti Dios ti pannakigayyem iti lubong? Wen, siasinoman a makigayyem iti lubong, maibilang metten a kabusor ti Dios.

⁵Diyo ipagarup nga awan serserbi daytoy a paset ti Nasantoan a Surat: “Naimon ti Dios ket dina kayat nga adda kaagaw ti espiritu a pinagtaengna kadatayo.”[2]

⁶Ngemⓟ nabilbileg pay ti iparabur ti Dios. Kas nailanad iti Nasantoan a Surat: “Busoren ti Dios dagiti napasindayag ngem itedna ti ad-adu a parabur kadagiti napakumbaba.”

⁷Agtulnogkayo ngarud iti Dios. Sarangtenyo ti Diablo, ket itarayannakayto ti Diablo.

⁸Umasidegkay iti Dios, ket umasidegto met ti Dios kadakayo. Dakayo a managbasol, buggoanyo dagiti imayo! Dakayo nga aginsisingpet, dalusanyo dagiti pusoyo!

⁹Agladingit, agsangit ken aganug-ogkayo. Imbes nga agkakatawakayo, agsangitkayo. Imbes nga agraragsakkayo, agleddaangkayo.

¹⁰Agpakumbabakayo iti sangoanan ti Dios, ket itan-oknakayto.

¹¹Dikay agpipinnadakes, kakabsatko. Siasinoman a mangpadpadakes wenno mangukom iti kabsatna, agsao iti maibusor iti Linteg ket ukomenna ti Linteg. No ukomem ti Linteg, saankan a tao a mangtungpal iti Linteg no di ket maysakan a mangukom.

¹²Ti Dios laeng ti mangipaulog iti Linteg. Isu laeng ti ukom. Isu laeng ti makabael a mangisalakan ken mangdadael. Ngem sika, siasinoka aya a mangukom iti padam a tao?

¹³Ita,ⓠ denggendak, dakayo nga agkuna: “Ita wenno inton bigat, agbiahekaminto iti maysa a siudad. Agnaedkaminto sadiay iti makatawen. Agnegosiokaminto ket adunto ti maganansiami.”

¹⁴Diyo ammo no anianto ti panagbiagyo inton bigat! Ngamin, mayarigkay iti angep nga agpukaw kalpasan ti apagdarikmat a panagparangna.

¹⁵Kastoy koma ketdi ti sawenyo: “No ipalubos ni Apo Dios, agbiagkaminto ket aramidenminto daytoy wenno daydiay.”

¹⁶Ngem natangsitkayo met. Napasindayagkayo. Dakes amin ti kastoy a panagpasindayag.

¹⁷Ngarud, agbasol ti tao a di mangaramid iti naimbag nga ammona a masapul nga aramidenna.