Sofonias 2:1-15 RIPV1996 - Bible AI

¹Dakayo a nasion a dina ammo ti agbain, agriingkayo

²sakbay a malaylaykayo ket mataykayo a kas iti sabong, sakbay nga agdissuor kadakayo ti gumilgil-ayab a pungtot ti APO, sakbay a dumteng ti aldaw a panangiparangna iti pungtotna.

³Agkamangkayo iti APO, dakayo a napakumbaba a tattao iti daga nga agtulnog kadagiti bilinna. Agaramidkay iti naimbag ket agpakumbabakay iti imatang ti APO. Nalabit a malisianyonto ti pannakadusa iti dayta nga aldaw a panangiparangarang ti APO iti pungtotna.

⁴Awantoⓑ ti mabati iti siudad ti Gaza. Awanton matagtagitao iti Askelon. Mapaksiatto dagiti taga-Asdod sakbay ti tengnga ti aldaw[3] ket maitalawto dagiti taga-Ekron.

⁵Dakayo a Filisteo, dakayo nga agnaed iti igid ti baybay, saanyo a maliklikan ti pannakadusayo. Intuyangen ti APO ti sentensiayo. Dadaelennakayo ket awanto ti uray maysa a matda kadakayo.

⁶Agkaruotanto ti dagayo iti igid ti baybay. Aglangalangto a pagaraban ti karnero.

⁷Sakupento dagiti nakalasat a taga-Juda ti dagayo. Ipaarabdanto dagiti arbanda sadiay ket maturogdanto kadagiti balbalay iti Askelon. Addanto kadakuada ti APO a Diosda ket parang-ayennanto manen ida.

⁸Kunaⓒ ti APO a Mannakabalin-amin, “Nangngegko ti panangum-umsi ken pananglalais dagiti Moabita ken Ammonita kadagiti tattaok. Ipaspasindayagda ti panggepda a mangagaw iti dagada.

⁹Isapatakⓓ iti naganko a sibibiag a Dios ti Israel a madadaelto ti Moab ken Ammon a kas iti pannakadadael idi ti Sodoma ken Gomorra. Agbalindanto a pagaramidan iti asin. Agkaruotan ken nagrebbaandanto iti agnanayon. Mapanto agsamsam dagiti makalasat a tattaok iti pagilianda ket alaendanto ti dagada.”

¹⁰Kastoyto ti pannakadusa dagiti tattao ti Moab ken Ammon gapu iti kinatangsit ken kinapasindayagda ken gapu iti pananglalaisda kadagiti tattao ti APO a Mannakabalin-amin.

¹¹Nakabutbutengto ti ipalak-amna kadakuada. Pukawennanto amin a didiosen ditoy daga. Kalpasanna, agdaydayawto kenkuana ti amin a nasion, tunggal maysa iti bukodna a daga.

¹²Urayⓔ dakayo a taga-Etiopia, patayennakayto met ti APO.

¹³Usarentoⓕ ti APO ti pannakabalinna a mangdadael iti Asiria. Pagbalinennanto a langalang ti Nineve. Agbalinto a natikag a lugar.

¹⁴Sadiayto ti pagaponan dagiti arban ken amin a kita ti animal. Agnaedto dagiti kullaaw kadagiti rebba a patakderna ket mangngegto ti pukkawda kadagiti tawa. Aguninto dagiti wak[4] kadagiti agdan. Maikkatto dagiti tarikayo a sedro dagiti balbalay.

¹⁵Daytoyto ti mapasamak iti siudad a natangsit unay gapu iti pannakabalinna. Ipagarupna a natalged ket awan ti pakaan-anoanna. Ipagarup dagiti tattaona a ti siudadda ti kabilgan iti lubong. Aglangalangto ket agbalinto nga apon dagiti atap nga animal. Agalinggagetto ti siasinoman a magna sadiay.