Taga-Colosas 1:1-29 RIPV1996 - Bible AI

¹Kadakayo a tattao ti Dios[1] dita Colosas a mapagtalkan a kakabsat ken Cristo, Sapay koma ta parabur ken talna ti ited kadakayo ti Dios nga Amatayo. Naggapu daytoy a surat kadakami—ni Pablo nga apostol ni Cristo Jesus babaen iti pagayatan ti Dios, ken ni Timoteo a kabsattayo.

³Kanayon nga agyamankami iti Dios nga Ama ni Apotayo a Jesu-Cristo tunggal ikararagandakayo.

⁴Ta nadamagmi ti maipapan iti pammatiyo ken ni Cristo Jesus ken ti ayatyo kadagiti amin a tattao ti Dios.

⁵Idi damo a maipakaammo kadakayo ti pudno a mensahe, ti Naimbag a Damag, nangngegyo ti maipapan iti namnama nga ipaayna. Iti kasta, maibatay ti pammati ken ayatyo iti namnama a naisagana idiay langit nga agpaay kadakayo.

⁶Mangted ti ebanghelio kadagiti bendision ket agsaksaknap iti entero a lubong. Maar-aramid met daytoy kadakayo manipud idi damoyo a mangngeg ti maipapan iti parabur ti Dios ket naammoanyo ti kinapudno daytoy a parabur.

⁷Nasursuroyoⓐ daytoy ken ni Epafras a mangibagi kadakami. Isu ti patpatgenmi a katrabahoan ken matalek nga adipen ni Cristo.

⁸Imbagana kadakami ti maipapan iti ayat nga inted ti Espiritu kadakayo.

⁹Isut' gapuna a kanayon nga ikarkararagandakayo manipud pannakadamagmi iti maipapan kadakayo. Idawdawatmi iti Dios a magun-odyo ti naan-anay a kinasirib ken pannakaawat tapno maammoanyo a naimbag ti pagayatanna,

¹⁰ket agbiagkayo a kas iti pagayatan ti Apo. Aramidenyo a kanayon ti makaay-ayo kenkuana. Agbungakayo iti amin a kita ti naimbag nga aramid, ket umad-adunto ti ammoyo maipapan iti Dios.

¹¹Sapay koma ta mapakiredkayo babaen iti amin a pigsa nga aggapu iti nagloriaan a pannakabalinna, tapno maibturanyo a siaanus ken siraragsak ti uray aniaman a mapasamak.

¹²Agyamankayo iti Ama a namagbalin kadakayo[2] a maikari a makipagtawid iti inkari ti Dios nga ited kadagiti tattaona iti pagarian ti lawag.

¹³Inispalnatayo iti pannakabalin ti sipnget ket impannatayo iti pagarian ti dungdungngoenna nga Anak.

¹⁴Babaenⓑ kenkuana nawayawayaantayo, kayatna a sawen, pinakawan ti Dios dagiti basoltayo.

¹⁵Ni Cristo ti pudno a ladawan ti saan a makita a Dios. Isu ti inauna nga Anak, kayatna a sawen, katatan-okan kadagiti amin a parsua.

¹⁶Ta babaen kenkuana, pinarsua ti Dios dagiti amin nga adda idiay langit ken ditoy daga, dagiti makita ken saan a makita agraman dagiti naespirituan a pannakabalin; trono, panagturay, kinatan-ok ken bileg. Pinarsua ti Dios ti entero a lubong babaen kenkuana ken maipaay kenkuana.

¹⁷Addan ni Cristo sakbay a naparsua ti amin a banag, ket gapu kenkuana naurnosda iti lugarda iti pannakikaysada kenkuana.

¹⁸Isuⓒ ti ulo ti bagina, kayatna a sawen, ti iglesia. Isu ti paggapuan ti biag ti bagi. Isu ti inauna nga Anak ti Dios. Napagungar tapno agbalin a kangatoan kadagiti amin.

¹⁹Ta inkeddeng ti Dios nga agtaeng ti naan-anay a galadna iti Anak.

²⁰Ngarud,ⓓ babaen iti Anak, inkeddeng ti Dios nga ikappia ti isuamin kenkuana. Ket babaen iti ipapatay ti Anakna iti krus, nagkappia ti Dios ken ti isuamin a parsua ditoy daga ken sadi langit.

²¹Adda idi panawen nga adayokayo iti Dios. Nagbalinkayo a kabusorna gapu kadagiti dakes nga aramid ken panunotyo.

²²Ngem ita, babaen iti ipapatay ti Anakna, inkappianakayo kenkuana tapno agtakderkay iti sangoananna a nasantoan, nadalus ken awan pakababalawanna.

²³Masapul ngarud nga agtalinaedkayo a natibker ken natalged iti pammati. Diyo itulok a magunggonkayo ket mapukawyo ti namnama a nagun-odyo idi nangngegyo ti ebanghelio. Daytoy ti ebanghelio a naikaskasaba kadagiti amin a tattao ditoy lubong. Daytoy ti gapuna a siak, ni Pablo, nagbalinak nga adipen.

²⁴Ita, maragsakanak kadagiti sagsagabaek gapu kadakayo. Ta babaen kadagitoy, punnoak ti pagkurangan ti panagsagabak a kasapulan iti panagserbi ken ni Cristo. Maipaay daytoy a panagsagaba iti iglesia a bagi ni Cristo.

²⁵Pinagbalinnak ti Dios nga adipen ti iglesia. Intedna kaniak daytoy a trabaho, ti naan-anay a panangipakaammok kadakayo iti mensahena.

²⁶Nailimed idi daytoy a mensahe kadagiti adu a kaputotan, ngem naipakaammo itan kadagiti tattaona.

²⁷Plano ti Dios nga ipakaammo kadagiti tattaona ti palimedna. Anian a kinadayag ken kinadaeg ti palimed nga agpaay kadagiti amin a tattao: Agtaeng kadagiti puspusoyo ni Cristo, ti namnamayo a makiranud iti gloriana.

²⁸Ipakaammomi ngarud ti kinapudno maipapan ken ni Cristo kadagiti amin a tattao. Iti amin a kinasirib, ballaaganmi ti tunggal tao iti maipapan iti di rumbeng nga aramiden ken sursuroanmi ida iti rumbeng nga aramidenda tapno idatagmi iti sangoanan ti Dios ti tunggal maysa a pulos nga awan pagkuranganna iti pannakikaysada ken Cristo.

²⁹Tapno maaramid daytoy, agbannog ken agrigatak ket aramatek ti amin a bileg ken pannakabalin nga agtaud ken ni Cristo.