Taga-Efeso 1:1-23 RIPV1996 - Bible AI

¹Kadagitiⓐ tattao ti Dios[1] iti Efeso,[2] isuda a mapagtalkan iti panagbiagda ken ni Cristo Jesus. Sapay koma ta parabur ken talna ti ited kadakayo ti Dios nga Amatayo ken ni Jesu-Cristo. Siak, ni Pablo, ti naggapuan daytoy a surat. Maysaak nga apostol ni Cristo Jesus babaen iti pagayatan ti Dios.

³Agyamantay iti Dios ken Ama ni Apotayo a Jesu-Cristo! Iti pannakikaysatayo ken ni Cristo, binendisionannatay iti amin a naespirituan a sagut iti nailangitan a disso.[3]

⁴Sakbay ti pannakaparsua ti lubong, pinilinatayon ti Dios nga agbalin a kukuana babaen ken ni Cristo, tapno nasantoan ken awan pakababalawantay iti imatangna. Gapu iti ayatna,

⁵inkeddengen ti Dios[4] a babaen ken Jesu-Cristo, pagbalinennatayo nga annakna. Daytoy ti pagayatan ken panggepna.

⁶Idaydayawtayo ti Dios gapu iti nakaskasdaaw a panangipakitana iti kinaimbagna kadatayo, gapu iti intedna a sagut kadatayo babaen iti inaramid ti dungdungngoenna nga Anak.

⁷Babaenⓑ iti ipapatay ni Cristo, nagun-od ti wayawaya ket napakawan dagiti basbasoltayo. Anian a nagdakkel ti parabur ti Dios

⁸nga impaayna a sibubuslon kadatayo! Gapu ta masirib ti Dios ket ammona ti amin a banag,

⁹inaramidna ti pinanggepna. Impakaammona kadatayo ti nalimed a planona nga inkeddengna a tungpalen babaen ken ni Cristo.

¹⁰Ania ti plano ti Dios nga inkeddengna a tungpalen inton dumteng ti naituding a tiempo? Isu daytoy: pagkaykaysaenna ti sangaparsuaan, amin nga adda sadi langit ken ditoy daga a ni Cristo ti pannakaulo.

¹¹Maaramid dagiti amin a bambanag kas mayannurot iti plano ken pangngeddeng ti Dios. Pinilinatayo nga agbalin a tattaona babaen iti pannakikaysatayo ken ni Cristo gapu iti panggepna idi punganay.

¹²Idaydayawtayo ngarud ti nadayag a Dios, datayo nga immun-una a nanginanama ken ni Cristo.

¹³Nagbalinkayo met a tattao ti Dios idi nangngegyo ti pudno a mensahe, ti Naimbag a Damag a nangyeg iti pannakaisalakanyo. Namatikayo ken Cristo ket minarkannakayo ti Dios babaen iti pannangtedna iti Espiritu Santo nga inkarina kas pakakitaan iti panangtagikuana kadakayo.

¹⁴Gapu ta adda kadatayo ti Espiritu ti Dios, awan duadua nga awatentayo ti inkari ti Dios kadagiti tattaona. Daytoy ti mangpatalged kadatayo nga ikkanto ti Dios iti naan-anay a wayawaya dagiti kukuana. Idaydayawtayo ti dayagna!

¹⁵Gapu iti daytoy, manipud idi nadamagko ti maipapan iti pammatiyo ken ni Apo Jesus, ken ti ayatyo kadagiti amin a tattao ti Dios,

¹⁶diak mamingga nga agyaman iti Dios gapu kadakayo. Malagipkayo kadagiti kararagko,

¹⁷ket idawdawatko iti nagloriaan nga Ama ken Dios ni Apotayo a Jesu-Cristo, nga itedna kadakayo ti Espiritu a mangted iti sirib ken mangiparangarang iti Dios kadakayo tapno maammoanyo ti pudno maipapan kenkuana.

¹⁸Idawdawatko a maluktan koma dagiti pampanunotyo tapno makitayo ti lawag nga agtaud kenkuana, tapno maammoanyo ti namnama a nangayabanna kadakayo, ti kinabaknang dagiti nakaskasdaaw a bendision nga inkarina kadagiti tattaona

¹⁹ken ti naindaklan a pannakabalinna nga agtartrabaho kadatayo a mamati. Daytoy a pannakabalin nga adda kadatayo, isu met laeng ti nabileg a pannakabalin

²⁰ngaⓒ inusarna idi pinagungarna ni Cristo, ket pinagtugawna iti makannawanna sadi langit.

²¹Agturay ni Cristo sadiay. Nangatngato ngem dagiti amin a nailangitan a papangulo, agtuturay, pannakabalin ken appo. Addaan iti akem a nangatngato ngem dagiti amin nga akem ti pannakabalin iti agdama ken iti masakbayan.

²²Intedⓓ ⓔ ti Dios ti pannakabalin ken ni Cristo a mangituray iti amin a banag, ket isu ti insaadna a kangatoan nga ulo iti iglesia.

²³Ti iglesia isu ti bagi ni Cristo, ti pakadagupan daydiay mismo a mangpunno kadagiti amin a banag iti amin a lugar.[5]