Taga-Efeso 2:1-22 RIPV1996 - Bible AI

¹Addaⓕ idi tiempo a naibilangkayo a natay iti espiritu gapu ta sinukiryo ti Dios ket nagbasolkayo.

²Sinurotyo idi ti dakes a panagbiag daytoy a lubong. Pinaiturayankayo iti naespirituan a pannakabalin ti tangatang, ti espiritu a mangituray ita kadagiti tattao a saan nga agtulnog iti Dios.

³Kinaagpaysona, kaslatay amin kadakuada idi. Nagbibiagtayo kas mayannurot kadagiti naidagaan a tarigagaytayo. Inaramidtayo ti aniaman a kayat ti bagi ken nakemtayo. Gapu iti daytoy, naitudingtayo met nga agsagaba iti pannusa ti Dios a kas kadagiti amin a tattao.

⁴Ngem dakkel ti panangngaasi ti Dios ket ay-ayatennatayo la unay,

⁵isu nga uray nataytayo iti espiritu gapu iti kinasukirtayo, pinagbiagnatayo a mairaman ken Cristo. Insalakannakayo ti Dios gapu iti paraburna.

⁶Iti pannakikaysatayo ken Cristo Jesus, pinagungarnatay iti naespirituan a biag tapno makipagturaytayo kenkuana sadi langit.

⁷Inaramidna daytoy tapno, iti amin a tiempo iti masakbayan, iparangna ti naisalsalumina ken saan a matukod a kinamanangngaasina iti panagayatna kadatayo babaen ken Cristo Jesus.

⁸Ta gapu iti parabur ti Dios, naisalakantayo babaen iti pammati. Saanyo nga insalakan ti bagiyo gapu iti inaramidyo. Insagut kadakayo ti Dios ti pannakaisalakanyo tapno awan ti mangipasindayag iti daytoy.

¹⁰Datayo ti aramid ti Dios, ket iti pannakikaysatayo ken ni Cristo Jesus, pinarsuanatayo nga agaramid iti naimbag bayat ti panagbiagtayo nga intudingna idi.

¹¹Laglagipenyo no aniakayo iti napalabas, dakay a nayanak a Hentil nga awagan dagiti Judio iti “saan a nakugit,” ket awaganda ti bagida iti “nakugit,” (daytoy ti seremonia nga aramiden dagiti lallaki iti bagida).

¹²Naisinakay idi ken Cristo. Ganggannaetkayo idi ket saankayo a naibilang kadagiti napili a tattao ti Dios. Saankay a nairaman kadagiti katulagan ti Dios kadagiti tattaona ken naibatay kadagiti karina kadakuada. Nagbiagkayo ditoy lubong nga awanan namnama ken awanan pannakainaig iti Dios.

¹³Ngem ita, babaen ti pannakikaysayo ken ni Cristo Jesus, dakayo nga adayo idi, nayasidegkayo gapu ta natay ni Cristo a kas sakrifisio iti krus.

¹⁴Ta mismo a ni Cristo ti nangyeg iti kappia kadatayo babaen ti panamagkaykaysana kadagiti Judio ken Hentil. Babaen iti ipapatayna, rinebbana ti pader a namagsina ken namagbinnusor kadagitoy a tattao.

¹⁵Winaswasnaⓖ ti Linteg dagiti Judio a buklen dagiti bilin ken al-alagaden tapno kadagitoy dua a puli—Judio ken Hentil—parsuaenna ti baro a puli ti tao babaen iti pannakipagkaysada kenkuana, tapno ipasdekna ti kappia.

¹⁶Babaenⓗ iti ipapatayna iti krus, pinukaw ni Cristo ti guranggurada ken pinagkaykaysana dagitoy dua a puli iti maysa a bagi ket inkappiana ida iti Dios.

¹⁷Immayⓘ ni Cristo a nangikasaba iti Naimbag a Damag ti kappia kadagiti amin a tao—kadakay a Hentil nga adayo iti Dios ken kadagiti Judio nga asideg kenkuana.

¹⁸Gapu ken Cristo, mabalintay amin ti umasideg iti Ama, Judio man wenno Hentil, babaen iti maymaysa nga Espiritu.

¹⁹Ngarud, saankayon a ganggannaet wenno sangsangaili. Agkakailiankayon kadagiti tattao ti Dios. Kamkamengkayon iti familia ti Dios.

²⁰Nabangonkayo met iti rabaw ti fondasion nga impasdek dagiti apostoles ken dagiti profeta,[6] ket ni Cristo a mismo ti kangrunaan a pasuli.

²¹Isu ti mamagkakamang iti entero a patakder ket parang-ayenna a kas maysa a templo a nasantoan iti Apo.

²²Iti pannakikaysa kenkuana, maikamangkayo met agraman dagiti dadduma iti pannakabangon ti maymaysa a balay a pagtaengan ti Espiritu ti Dios.