Taga-Efeso 3:1-21 RIPV1996 - Bible AI

¹Daytoy ti gapuna a siak, ni Pablo a balud ni Cristo Jesus gapu kadakay a Hentil, agkararagak iti Dios.

²Awan duadua a nadamagyon a babaen iti parabur ti Dios, intedna kaniak daytoy a trabaho a maipaay iti pagimbaganyo.

³Imparangarang ti Dios ti nalimed a planona ket impakaammona kaniak. (Insuratkon ti ababa a pakasaritaan daytoy.

⁴Noⓙ mabasayo, maammoanyonto no kasano a maawatak ti palimed ni Cristo.)

⁵Saan a naipakaammo idi daytoy a palimed iti sangkataoan, ngem imparangarangen ti Dios babaen iti Espiritu kadagiti nasantoan nga apostoles ken profetana.

⁶Daytoy ti palimed: Babaen iti ebanghelio, mairaman dagiti Hentil kadagiti Judio nga umawat iti bendision ti Dios. Kamkamengda iti isu met laeng a bagi, ket mairamanda iti inkari ti Dios ken ni Cristo Jesus.

⁷Nagbalinak nga adipen ti ebanghelio gapu iti naisangsangayan a sagut nga inted kaniak ti Dios babaen iti pannakabalinna.

⁸Siak ti kanumoan kadagiti nanumo a tattao ti Dios, ngem siak ti pinili ti Dios a mangipakaammo kadagiti Hentil iti di matukod a kinabaknang ni Cristo,

⁹ken mangipakita kadagiti amin a tattao iti pannakaibanag daytoy nalimed a plano ti Dios. Iti amin a tiempo iti napalabas, inlemmeng ti Dios, isu a namarsua iti amin, daytoy nalimed a planona.

¹⁰Ita, babaen iti iglesia, maammoan dagiti agtuturay ken dagiti pannakabalin sadi langit ti kinasirib ti Dios iti nadumaduma a pannakaiparangarangna.

¹¹Kastoy ti inaramid ti Dios kas mayannurot iti agnanayon a panggepna a tinungpalna babaen ken ni Cristo Jesus nga Apotayo.

¹²Gapu iti pannakipagmaymaysatayo kenkuana ken gapu ta agtalektayo kenkuana, saantayo nga agbuteng nga umasideg a sitatalged iti sangoanan ti Dios.

¹³Dawatek ngarud a dikayo maupay iti panagsagabak gapu kadakayo; pagsayaatanyo amin daytoy.

¹⁴Daytoy ti gapuna nga agparintumengak iti sangoanan ti Ama a paggapuan ti pudno a nagan ti tunggal familia sadi langit ken ditoy daga.

¹⁶Iti kinabaknang ti gloriana, dawatek nga itedna kadakayo ti pannakabalin babaen iti Espirituna tapno bumileg ti akin-uneg a kinataoyo.

¹⁷Agnaed koma a kanayon ni Cristo iti pusoyo babaen iti pammatiyo kenkuana. Ikararagko a mairamut ken maipasdekkayo iti ayat

¹⁸tapnoⓚ dakayo ken dagiti amin a tattao ti Dios, naan-anay ti pannakaawatyo no kasano ti kadakkel ken kauneg[7] ti panagayat ni Cristo kadakayo.

¹⁹Wen, mapadasanyo koma no kasano ti panagayatna kadakayo—nupay saan a naan-anay a maammoan, tapno awan pagkuranganyo ken mapnokayo iti nadiosan a galad.[8]

²⁰Madaydayaw koma ti Dios a makaaramid iti nasursurok ngem ti dawaten wenno panunotentayo babaen iti pannakabalin nga agtartrabaho kadatayo.

²¹Maipaay koma kenkuana ti dayaw iti iglesia ken ti dayaw ni Cristo Jesus, iti amin a tiempo ken iti agnanayon nga awan inggana. Amen.