Taga-Roma 10:1-21 RIPV1996 - Bible AI

¹Kakabsatko, tarigagayak iti amin a pusok a maisalakan koma dagiti kadaraak! Nasged ti panangidawdawatko kadakuada iti Dios!

²Mabalinko a paneknekan a napasnekda unay nga agserbi iti Dios. Ngem saan a nainsiriban ti kinapasnekda.

³Dida ammo no kasano ti panangpalinteg ti Dios kadagiti tattao. Pinadasda a gun-oden ti bukodda a pannakapalinteg, ket iti kasta, linaksidda ti wagas ti Dios a panangpalinteg kadagiti tattao.

⁴Ta ni Cristo ti pagpatinggaan ti Linteg, tapno ti amin a mamati agbalin a nalinteg iti sangoanan ti Dios.

⁵Kastoyⓓ ti insurat ni Moises maipapan iti pannakapalinteg ti tao iti sangoanan ti Dios babaen iti panagtungpalna iti Linteg: “Ti siasinoman nga agtungpal iti bilin ti Linteg, agbiagto iti Linteg.”

⁶Ngemⓔ kastoy ti masao maipapan iti pannakapalinteg babaen iti pammati: “Dimo kunkuna, ‘Siasinonto ti umuli sadi langit?’” (Kayatna a sawen, ti mapan mangyulog ken ni Cristo.)

⁷“Dimo met saludsoden iti bagim, ‘Siasinonto ti umulog iti lubong nga adda iti baba?’” (Kayatna a sawen, ti mapan mangyuli ken ni Cristo nga aggapu kadagiti natay.)

⁸Masao ti kastoy: “Asideg kenka ti sao ti Dios, iti bibigmo ken iti pusom”—kayatna a sawen, ti mensahe ti pammati nga ikaskasabami.

⁹Ta no babaen iti panagsao, ipaduyakyakmo ni Jesus nga isu ti Apo, ket patiem iti pusom a pinagungar ti Dios, maisalakankanto.

¹⁰Ta babaen iti puso, mamatitayo, ket mapalintegtayo iti Dios. Babaen iti bibig, agipaduyakyaktayo, ket maisalakantayo.

¹¹Kunaⓕ ti Nasantoan a Surat, “Dinto maibabain ti siasinoman a mamati kenkuana.”

¹²Mairaman amin a tattao iti daytoy, agsipud ta awan ti pakaigiddiatan dagiti Judio kadagiti Hentil. Ti Dios met laeng ti Apo ti isuamin, ket bendisionanna a sibubuslon ti amin nga umawag kenkuana.

¹³Kasⓖ kuna ti Nasantoan a Surat, “Maisalakan ti siasinoman nga agpatulong iti Apo.”

¹⁴Ngem kasano nga agpatulongda, no dida mamati kenkuana? Kasano a mamatida no dida mangngeg ti mensahe? Kasano a mangngegda no di maipakaammo ti mensahe?

¹⁵Kasanoⓗ a maiwaragawag ti mensahe, no saan a maibaon dagiti mangasaba? Kas kuna ti Nasantoan a Surat, “Nagsayaat ketdin ti yaay dagiti mangyeg iti naimbag a damag!”

¹⁶Ngemⓘ saan nga amin a tattao ket inawatda ti Naimbag a Damag. Ta kinuna ni Isaias, “Apo, siasino ti namati iti inkasabami?”

¹⁷Ngarud, umay ti pammati babaen iti panagdengngeg iti mensahe, ket umay ti mensahe babaen iti pannakaikasaba ni Cristo.

¹⁸Ngemⓙ saludsodek man: Pudno kadi a dida nangngeg ti mensahe? Kinapudnona, nangngegda ta kas kuna ti Nasantoan a Surat: “Nagsaknap ti timekda iti entero a lubong, Dimmanon ti saoda iti pungto ti daga.”

¹⁹Saludsodekⓚ man pay: Saan kadi a naawatan dagiti Israelita? Ni Moises met laeng ti umuna a sumungbat: “Pagimonenkayto kadagiti tattao a saan a pudno a nasion; Pagpungtotenkayto iti nasion a maag dagiti tattaona.”

²⁰Naturturedⓛ pay ni Isaias idi kunana, “Nasarakandak dagiti saan a mangsapsapul kaniak, nagparangak kadagiti saan a mangbirbirok kaniak.”

²¹Ngemⓜ no maipapan iti Israel, kunana, “Agmalmalem nga igay-atko ti imak a mangawis nga agsubli kadagiti managlabsing ken nasukir a tattao.”