Taga-Roma 11:1-36 RIPV1996 - Bible AI

¹Saludsodekⓝ ngarud: Linaksid kadi ti Dios dagiti tattaona? Saan! Siak a mismo, Israelitaak. Nagtaudak iti kaputotan ni Abraham. Kamkamengak iti tribu ni Benjamin.

²Saan a linaksid ti Dios dagiti tattao a pinilina manipud idi damo. Ammoyo ti paset ti Nasantoan a Surat a nakailanadan ti panagdawat ni Elias iti Dios a maibusor iti Israel.

³“Apo,”ⓞ kinunana, “pinatayda dagiti profetam ket rinakrakda dagiti altarmo. Siak laengen ti nabati, ket kayatdak pay a patayen.”

⁴Aniaⓟ ti insungbat ti Dios kenkuana? Kinunana, “Nangibatiak iti pitoribu a tattaok a di nagrukbab ken ni Baal a didiosen.”

⁵Kasta met ita: adda natda a pinili ti Dios babaen iti paraburna.

⁶Naibatay ti panagpilina iti paraburna, saan nga iti inaramidda. Ta no naibatay ti panagpili ti Dios iti inaramid dagiti tattao, saanen a maibilang a pudno a parabur.

⁷Ania ngarud? Saan a nasarakan dagiti Israelita ti sapsapulenda. Ti bassit a grupo a pinili ti Dios ti nakasarak. Saan nga inkaskaso ti dadduma ti ayab ti Dios.

⁸Kasⓠ kuna ti Nasantoan a Surat, “Pinatangken ti Dios ti puso ken isipda. Agpapan ita, saanda a makakita wenno makangngeg.”

⁹Ketⓡ kuna ni David:

⁹“Matiliw ken masiloanda koma kadagiti fiestaanda; Matnagda koma, madusada koma!

¹⁰Makullaapan koma dagiti matada tapno dida makakita; Ket pagkubboen koma ti Dios ida iti agnanayon.”

¹¹Saludsodek ngarud: Idi naitibkol dagiti Judio, saanda kadin a bimmangon? Natnagda kadi iti pakadadaelanda? Saan! Gapu ta nagbasolda, immay ti pannakaisalakan kadagiti Hentil tapno apalan ida dagiti Judio.

¹²Inyeg ti basol dagiti Judio ti nawadwad a bendision ditoy lubong, ket ti kinakurang ti pammatida inyegna ti nawadwad a bendision kadagiti Hentil. Dinto aya ad-adu pay ti bendision inton maibilang amin a Judio a tattao ti Dios?

¹³Makisaoak ita kadakayo a Hentil. Yantangay ta apostolak kadagiti Hentil, pagpannakkelko ti trabahok

¹⁴bareng no umapal dagiti kadaraak, ket iti kasta, addanto maisalakan kadakuada.

¹⁵Idi nailaksidda, nagbalin ti sangkataoan a gayyem ti Dios. Anianto ngarud inton awaten ida ti Dios? Mayarigto iti panagungar kadagiti natay!

¹⁶No maidaton iti Dios ti umuna a paset ti tinapay, maidaton met ti entero a tinapay. No dagiti ramut ti kayo ti maidaton iti Dios, maidaton met dagiti sanga.

¹⁷Nasip-ak ti sumagmamano a sanga ti natartaripato nga olibo, ket naisulbong iti daytoy a kayo ti sanga ti balang nga olibo. Sika a Hentil, mayarigka iti dayta balang nga olibo, ket mairanudka ita iti natibker ken nabunga a biag dagiti Judio.

¹⁸Dimo ngarud laisen dagiti nasip-ak a sanga. Apay nga agtangsitka? Maysaka laeng a sanga. Laglagipem a saan a sika ti mangtaraon iti ramut, no di ket sika ti taraonanna.

¹⁹Ngem kunamto, “Wen, ngem nasip-ak dagiti sanga tapno adda pakaisulbongak.”

²⁰Pudno daytoy. Nasip-akda agsipud ta dida namati, ngem agtalinaedka iti lugarmo agsipud ta mamatika. Ngem dimo pagtangsit daytoy. Agbutengka koma ketdi.

²¹No saan a kinailalaan ti Dios dagiti Judio a mayarig kadagiti sigud a sanga, kailalaannakanto ketdin?

²²Makitatayo ngarud ti kinamanangngaasi ken kinainget ti Dios. Nainget kadagiti natnag, ngem naasi kenka no la ket kankanayon nga agtalinaedka iti kinamanangngaasina. Ta no saan, uray sika, masip-akkanto met.

²³Ngem no mamati dagiti Judio, maisublidanto iti sigud a yanda, agsipud ta kabaelan ti Dios nga isubli ida.

²⁴Mayarigkayo a Hentil iti nasip-ak a sanga ti balang nga olibo, ket nupay maikontra iti nakaparsuaan, maisulbong iti nataraken a kayo ti olibo. Mayarig dagiti Judio iti daytoy natartaripato a kayo. Nalaklakanto ngarud ti panangisubli ti Dios kadagitoy a sanga iti kayo a nakasip-akanda.

²⁵Adda palimed, kakabsatko, a kayatko a maammoanyo tapno diyo ipagarup a masiribkayo. Daytoy ti palimed: Agpatingganto ti panagsukir dagiti Israelita, ngem santo la agpatingga inton makompleto ti bilang dagiti Hentil a mamati iti Dios.

²⁶Kalpasanna,ⓢ maisalakanto ti amin nga Israel. Kas kuna ti Nasantoan a Surat:

²⁶“Aggapunto ti Mangisalakan idiay Sion, pukawennanto ti amin a kinadakes iti kaputotan ni Jacob.

²⁷Daytoytoⓣ ti pakitulagak kadakuada, inton pakawanek dagiti basolda.”

²⁸Agsipud ta saan nga awaten dagiti Judio ti Naimbag a Damag, kabusor ida ti Dios gapu kadakayo a Hentil. Ngem gapu iti pagayatan ti Dios, ipatpategna met la ida gapu iti karina kadagiti kapuonanda.

²⁹Ta saan a baliwan ti Dios ti panunotna maipapan iti pilien ken bendisionanna.

³⁰No maipapan kadakayo a Hentil, nagsukirkayo idi iti Dios. Ngem ita, inawatyon ti asi ti Dios agsipud ta nagsukir dagiti Judio.

³¹Iti kasta, iti agdama, agsukir dagiti Judio tapno awatenda met ti kaasi a kas iti inawatyo.

³²Ta pinagbalin ti Dios dagiti amin a tattao a balud ti kinasukir tapno maipaayna ti kaasi kadakuada amin.

³³Anianⓤ a kinabaknang ti Dios! Anian a naguneg ti sirib ken ammona! Siasino ti makailawlawag kadagiti pangngeddengna? Siasino ti makasurot kadagiti dalanna?

³⁴Kasⓥ kuna ti Nasantoan a Surat:

³⁴“Siasino ti makaammo iti panunot ti Apo? Siasino ti makabalin a mangbalakad kenkuana?

³⁵Siasinoⓦ ti adda naipaayna kenkuana, Tapno masapul a masupapakan?”

³⁶Taⓧ isu ti namarsua kadagiti amin. Agbiagda amin babaen kenkuana ket agserbida kenkuana. Madaydayaw koma ti Dios iti agnanayon! Amen.