Uk-ukom 17:1-13 RIPV1996 - Bible AI

¹Adda idi lalaki nga agnagan Mica nga agnaed iti katurturodan ti Efraim.

²Iti naminsan, kinunana ken ni inana, “Idi natakawanka iti 1,100 a bagi ti pirak, nangngegko nga inlunodmo ti nangtakaw. Siak ti nangala iti pirak ket adtoy nga isublik kadakayo.”

²“Anakko,” kinuna ti inana, “bendisionannaka koma ti APO.”

³Idi maited kenkuana dagiti bagi ti pirak, kinuna ti ina, “Tapno maikkat ti lunod kenka, anakko, idatonko daytoy a pirak iti APO. Agserbinto iti pannakaaramid iti imahen makalupkopan iti pirak. Isublik met la ngarud kenka.”

⁴Idi maisubli ti kuarta, nangala ti inana iti 200 a bagi ti pirak, ket intedna iti agpampanday. Nangaramid ti agpampanday iti imahen. Kinalupkopanna iti pirak sana inkabil iti balay ni Mica.

⁵Adda kabukbukodan ni Mica a lugar a pagdaydayawanna. Nagaramid kadagiti ladawan dagiti didiosen ken maysa nga efod[33] ket dinutokanna ti maysa kadagiti annakna a kas padina.

⁶Kadagidiⓠ a panawen, awan pay ari iti Israel, isu a nawaya ti tunggal maysa nga agaramid iti kaykayatna.

⁷Iti dayta met la a tiempo, adda agtutubo a lalaki a Levita nga agnaed iti Betlehem idiay Juda.

⁸Pimmanaw iti Betlehem tapno agsapul iti pagyananna iti sabali a lugar. Bayat ti panagdaliasatna, nakadanon iti balay ni Mica iti katurturodan ti Efraim.

⁹“Taga-anoka?” sinaludsod ni Mica. “Maysaak a Levita a taga-Betlehem idiay Juda,” insungbatna. “Agsapsapulak iti mabalinko a pagnaedan.”

¹⁰Kinuna ni Mica kenkuana, “Agnaedka laengen ditoy, ta sikanto ti mammagbaga kaniak[34] ken padik. Ikkankanto iti sangapulo a bagi ti pirak iti tunggal tawen, agraman arruaten ken taraon.”[35]

¹¹Inawat ti agtutubo ti awis ket imbilang ni Mica a maysa kadagiti annakna.

¹²Dinutokan ni Mica a padina ket nagnaed iti balayna.

¹³Kinuna ni Mica, “Ita, awan duaduak a parang-ayennakto ti APO ta adda padik a Levita.”