Аян 1:1-20 KZB2010 - Bible AI

¹Бұл — Иса Мәсіхтің көрініп, Құдайдың құпия жоспарын ашып, аян бергені туралы жазба. Құдай жақын арада болуға тиісті оқиғаларды өз қызметшілеріне көрсету үшін осы аянды Иса Мәсіхке тапсырды. Ол соларды қызметшісі Жоханға періштесін жіберіп білдірді.

²Ал Жохан көргендерінің бәрін: Құдайдың хабарын және Иса Мәсіхтің аян еткендерін баяндап берді.

³Осы пайғамбарлық хабардың сөздерін оқып беретіндер де, оларды тыңдап, жазылғандарды ұстанатындар да бақытты! [1] Себебі бұлардың іске асатын уақыты таяп қалды.

⁴Жоханнан Азия аймағындағы [2] жеті қауымға дұғай сәлем: әрдайым бар, мәңгі болып келген және болашақта келетін (Құдай Ие), Оның тағының алдындағы жеті Рухы [3]

⁵және шынайы хабарды адал жеткізген [4] Иса Мәсіх сендерге рақымын жаудырып, тыныштық сыйлай көрсін! Иса Мәсіх — өлімнен қайта тірілгендердің ең Бастысы, [5] әрі жер бетіндегі патшалықтардың Әміршісі.

⁵Мәсіх бізді сүйіп, Өзін құрбан етіп қанын төгуімен күнәларымыздан тазартып арылтты,

⁶һәм бізді өз Құдайы және Әкесіне бағышталған қызметкерлердің патшалығы қылды. [6] Оның салтанатты ұлылығы мен құдіреті мәңгілік бола бермек! Аумин.

⁷Біліп алыңдар, Мәсіх бұлттармен қайтып келеді! Әркім де, Оны түйрегендер де Мәсіхті көзімен көреді, Жер бетіндегі барлық рулар үрейленеді, Ол туралы қайғырып, жылап еңірейді. [7] Иә, ол солай болады да! Аумин.

⁸Бүкіл әлемнің Билеушісі — әрдайым бар, мәңгі болып келген және болашақта келетін Құдай Ие: «Алғашқы да, Соңғы да Менмін!» — дейді. [8]

⁹Мен, Жохан, сендердің бауырластарыңмын және Иса Мәсіхке бола азап шегіп, Оның Патшалығына қызмет етіп, қайта оралуын төзімділікпен күтудегі серіктестеріңмін. Құдайдың сөзін және Иса Мәсіхтің шынайы хабарын [9] уағыздағаным үшін Патмос аралында [10] тұрдым.

¹⁰Иемізге бағышталған жексенбі күні [11] мен Киелі Рухқа ерекше бөленіп, [12] арт жағымнан керней үні сияқты қатты дауыс естідім.

¹¹Сол дауыс былай деді: «Көргендеріңді шиыршық кітапқа [13] жазып, мына жеті қаладағы сенушілер қауымдарына салып жібер: Ефес, Ізмір, Перғам, Тиятир, Сард, Філаделфи және Лаудіки». [14]

¹²Мен кімнің сөйлеп тұрғанын көру үшін жалт бұрылдым. Бұрылып қарағанда жеті алтын шам қойғышты [15] көрдім.

¹³Олардың арасында адам баласына ұқсас Біреу [16] тұр екен. Ол етегі аяғына дейін жететін ұзын шапан [17] киіп, кеудесіне алтын аспа бау таққан еді.

¹⁴Оның басындағы шашы ақ мамықтай [18] әрі қардай аппақ, ал көздері оттай жалындап жатты. [19]

¹⁵Аяқтары пеште балқыған қоладай жалтырап, даусы сарқырап аққан судың гүріліндей естілді.

¹⁶Оның оң қолында ұстаған жеті жұлдызы бар екен. Аузынан екі жүзі де өткір семсер [20] шығып, беті тал түстегі күндей нұрын төгіп тұрды.

¹⁷Мен Оны көргенде өлі адамдай алдына құлап түстім. Сонда Ол оң қолын үстіме қойып, былай деді: «Қорықпа! Мен Алғашқымын да Соңғымын [21]

¹⁸әрі Мәңгі Тірімін. Мен өлген едім, ал енді мәңгілік өмір сүремін. [22] Өлімнің де, о дүниенің де кілттері Менде. [23]

¹⁹Көргендеріңді, қазіргі барды және одан кейін болатындарды жазып қой!

²⁰Сен Менің оң қолымнан көріп тұрған жеті жұлдыздың және жеті алтын шам қойғыштың құпия мағынасы мынау: жеті жұлдыз — жеті қауымның періштелерін, ал жеті шам қойғыш — жеті қауымды білдіреді. [24]