Еврейлерге хат 10:1-39 KZB2010 - Bible AI

¹Таурат заңына негізделген ескі құлшылық ету жолы [1] Құдайдың адамдарға дайындап қойған игілігінің өзі емес, оның күңгірт жобасы ғана. Сол заң бойынша жыл сайын қайталап жасала беретін бірдей құрбандықтар Құдай алдына баратын адамдарды еш уақытта түпкілікті тазартып, мүлтіксіз ете алмайды.

²Егер адамдар құрбандық жасаулары арқылы біржола тазартылса, онда олар өз күнәкарлықтарын сезінуден қалып, құрбандық жасауларын доғарған болар еді.

³Ал шын мәнісінде жылма-жыл ұсынылатын құрбандықтар адамдардың жасаған күнәларын естеріне түсіріп қана отырады.

⁴Өйткені құрбанға шалынған бұқалар мен қошқарлардың қаны адамның күнәсін толығымен алып тастай алмайды.

⁵Сол себепті Мәсіх бұл дүниеге келгенде, Өзін құрбандыққа қиятыны туралы (Құдай Әкеге) мынадай сөздер айтқан:
Бірақ Маған тәндік денемді дайындадың.

⁵Құрбандықтар мен сый-тартуларды қаламадың,

⁶Шалып, өртелетін не күнәнің құнын Өтейтін құрбандықтарды жақтырмадың.

⁷Сонда Мен былай дедім: «Міне, келе жатырмын, Уа, Құдай, Сенің еркіңді орындау үшін. [2] Шиыршық кітапта Мен туралы жазылған». [3]

⁸Сол құрбандықтардың Таурат заңына сай ұсынылатынына қарамастан, Ол алдымен былай деді: «Құрбандықтар мен сый-тартуларды қаламадың, шалып, өртелетін не күнәнің құнын өтейтін құрбандықтарды жақтырмадың».

⁹Содан кейін Ол: «Келе жатырмын, уа, Құдай, Сенің еркіңді орындау үшін» деп қосты. Осылайша Тәңір Ие бұрынғы құрбандық рәсімдерін доғартып, олардың орнына Мәсіхтің құрбандығын енгізді.

¹⁰Иса Мәсіхтің өз денесін біржола құрбан етіп, Құдайдың еркін орындауы арқылы біз Оның қасиетті адамдарына [4] айналдық.

¹¹Әрбір діни қызметкер күн сайын міндетін атқарып, әрдайым бірдей құрбандықтарды ұсынады. Бірақ шын мәнісінде солар ешқашан күнәларды толығымен алып тастай алмайды. [5]

¹²Ал біздің Бас діни қызметкеріміз — Мәсіх сенушілердің күллі күнәларының құнын өтеп, тазарту үшін бір ғана құрбандық ұсынған соң, Құдайдың оң жағындағы құрметті орнына мәңгілікке жайғасты.

¹³Енді Ол барлық жауларының Өзінің табанының астына салынып берілуін күтіп отыр. [6]

¹⁴Сонымен Мәсіх Құдайға бағышталғандарды [7] жалғыз-ақ құрбандығымен мәңгілік кінәратсыз таза қылды.

¹⁵Киелі Рух та бізге осыны растайды. Алдымен Ол былай деді емес пе:

¹⁶«Жаратқан Ие мынаны айтады: Менің кейінгі заманда Исраил халқымен жасайтын Келісімім мынадай болады: Мен өз тәлімімді жүректеріне дарытамын әрі ақыл-саналарына «жазып» та қоямын».

¹⁷Бұған Ол мына тәрізді сөздерді қосты: «Мен олардың күнәлары мен әділетсіз істерін бұдан былай есіме алмайтын боламын». [8]

¹⁸Ал күнәлар кешірілген жерде енді қайтып оларды алып тастайтын құрбандықтың қажеті де жоқ.

¹⁹Сонымен, бауырластар, Исаның өз қанын төккенінің арқасында енді нық сеніммен ең қасиетті орынға [9] кіре аламыз.

²⁰Өйткені Құдай алдына баруымызға бөгет болған «шымылдықты» Иса өз денесін құрбан етуімен қақ айырып, біз үшін мәңгілік өмірге жаңа жол ашты.

²¹Ол, сондай-ақ, ұлы Діни қызметкеріміз ретінде бүкіл Құдай үйінің [10] үстінен қарайды.

²²Сондықтан да адал жүрекпен, нық сеніммен Құдай алдына барып, Оған сиынайық. (Мәсіхтің төгілген қаны) жүректерімізге «бүркіліп», ар-ұжданымыз күнә атаулыдан арылған әрі денеміз таза сумен жуылған болсын. [11]

²³Мойындаған үмітімізді үзбей, берік ұстанайық, себебі уәде берген Құдай сөзіне адал.

²⁴Өзара сүйіспеншілік көрсетіп, игілік істеуге қозғау салудың қамын ойлайық.

²⁵Кейбіреулер сенушілердің жиналыстарына бармай қалуды дағдыға айналдырып алған сияқты. Ал біздер солай істемей, бір-бірімізді одан бетер жігерлендірейік. Иеміздің қайтып келетін күнінің таяп қалғанын білесіңдер ғой.

²⁶Ал егер шынайы хабарды естіп-білгеннен кейін де әдейі күнә жасай берсек, онда бізді күнәмізден арылта алатын ешқандай құрбандық жоқ. [12]

²⁷Қайта, қиямет сотын және Иемізге қарсы шыққандарды жалмайтын тозақ отын үрейленіп күтуден басқа бізге түк те қалмайды.

²⁸Егер біреу Мұсаға берілген Таурат заңынан бас тартып, онысын екі-үш куә дәлелдесе, сол адам аяусыз өлімге кесіледі.

²⁹Ендеше Құдайдың рухани Ұлын аяқпен таптағандай менсінбеген әркім бұдан бетер қаншама ауыр жазаға лайық деп ойлайсыңдар!

²⁹Сондайлар Тәңір Ие Жаңа Келісімін бекіткен Исаның қаны арқылы күнәларынан арылғанмен, енді Оның қанына немкетті қарайды, әрі өздеріне Құдайдың рақымын жеткізген Киелі Рухты қорлайды.

³⁰«Жазалау — Менің ісім, тиісті жазаларын тартқызамын~Өзім!» дегеннің Кім екенін білеміз ғой. «Жаратқан Ие сотта тергейді өз халқын» [13] деп те (Тауратта) жазылған.

³¹Мәңгі тірі Құдайдың қолына түсіп, сотталу қандай қорқынышты!

³²Бұрынғы уақытты еске алыңдаршы: Құдайдың нұры жүректеріңді ағартқаннан кейін, сендер азапқа толы күреске тап болып, соған төтеп бердіңдер.

³³Кейбіреулерің масқараға, зорлық-зомбылыққа [14] ұшырап, жұрт қызықтап қарайтын тамашаға айналдыңдар. Ал өзгелерің осылай күйзеліп жүрген бауырластарыңның қасіретін бөлісіп,

³⁴тұтқынға түскендерге жандарың ашып, жәрдем бердіңдер. Мал-мүліктеріңді талан-таражға салғанда, бұны тіпті қуана қабылдадыңдар! Себебі көкте өздеріңе арналған, одан әлдеқайда құнды, мәңгілік дәулеттің бар екенін білдіңдер.

³⁵Ендеше жігер берген нық сенімдеріңнен [15] күдер үзбеңдер! Сол үшін берілетін зор сый алдарыңда күтіп тұр.

³⁶Құдайдың еркін орындап, Оның уәде еткенін иемдену үшін төзімді болуларың қажет.

³⁷Себебі келуге тиісті Ол сәлден кейін келіп, еш кешікпейді.

³⁸Әділ адамым сенімі арқылы шынайы өмір сүреді. [16] Ал кім қаймығып, бағытынан кері қайтса, Мен оған риза болмаймын. [17]

³⁹Бірақ біз алған бағытынан кері қайтып, тозаққа түсетіндердің [18] қатарынан емеспіз. Қайта, Құдайға нық сеніп, мәңгі құтқарылмақпыз. [19]