Еврейлерге хат 2:1-18 KZB2010 - Bible AI

¹Сол себепті біз беттеген бағытымыздан ауытқып кетпеуіміз үшін Мәсіх туралы естігендерімізге мықтап ден қоюымыз керек.

²Құдайдың періштелер арқылы (Мұсаға) жеткізген Таурат заңын [1] халықтың бәрі берік ұстануға міндетті болды. Кім оның ережелерін бұзып, бағынбаса, сол әділ жазасын тартты. Бұл осылай болған күнде,

³егер біз сондай керемет құтқарылуды елемесек, онда жазадан қалайша құтылмақпыз? Осы құтқарылуды алғашқыда Иеміздің Өзі паш еткен еді. Оны өз құлақтарымен естіген куәгерлер кейін соған біздің де көзімізді жеткізді.

⁴Құдай Өзінің құдіретін көрсетіп, түрлі таңғаларлық кереметтер мен ғажайып істер жасау арқылы және Киелі Рухтың өз еркіне сай әркімге үлестіріп берген түрлі рухани дарындары арқылы да осы Ізгі хабарды растады.

⁵Біз айтып отырған болашақ әлемді Құдай періштелердің қол астына тапсырған емес.

⁶Қайта, Киелі жазбалардың бір жерінде осы туралы біреу мынаны байыппен айтқан ғой:
Сен қамқорлайтындай адам баласы кім?

⁶«Өзің ескеретіндей адам сонша кім?

⁷Оны періштелерден сәл [2] төмен қойдың, Құрмет, салтанатты оған тәждей сыйладың,

⁸Бәрін де оған бағындырып бердің». [3] Құдай адам баласына бәрін де бағындырып берген кезде оған бағындырмаған еш нәрсені қалдырған жоқ. Алайда біз бәрінің де адам баласына бағынғандығын қазір көре алмаймыз.

⁹Бірақ Исаның азапты өлім шеккені үшін Патша ретінде ғаламат салтанат пен құрметке бөленгенін көреміз. Ол біраз уақыт періштелерден төмен болып, Құдайдың рақымының арқасында күллі адамзат үшін жанын қиды.

¹⁰Тәңір Ие көптеген адамдарды күнәдан құтқарып, Өзінің рухани балалары етіп құрметке бөледі; ал оларға құтқарылу жолын салған Мәсіхті азап шегуі арқылы кемелді Бастаушы етті. [4] Бүкіл әлемді Өзі үшін жаратқан Құдайға осы лайық еді.

¹¹Адамдарды Оған бағыштаған [5] Мәсіх те, сол адамдар да бір Әкеден тарайды. Сондықтан да Мәсіх оларды бауырларым деп атаудан ұялмайды. [6]

¹²Ол алдын ала былай деген: «Атыңды бауырларыма білдіремін, қауым жиынында Сені дәріптеймін». [7] — Ол тағы мынадай сөздер де айтқан:

¹³«Мен Оған сенімімді арта беремін» және «Міне, Мен және Жаратқан Ие Маған сыйлаған (рухани) балалар мұндамыз!» [8]

¹⁴Тәңір Иенің рухани балалары ет пен сүйектен жаралғандықтан, Иса да ет пен сүйектен тұратын тәнді қабылдады. Осылайша Ол Өзінің құрбандық өлімі арқылы өлімнің әміршісін, яғни әзәзіл шайтанды, жеңіп шықты, [9]

¹⁵әрі өмір бойы өлімнен қорқып, шайтанның құлы болып жүрген адамдарды азат етті.

¹⁶Себебі Мәсіх періштелердің емес, Ыбырайымның ұрпақтарының қамын [10] ойлайды.

¹⁷Сондықтан Ол барлық жағынан бауырластарына ұқсас болуға тиіс еді. Осылай Мәсіх Құдайға қызмет ететін қайырымды да адал Бас діни қызметкер [11] болып, өз жанын халқының күнәларының құнын өтеу үшін құрбандыққа қиды.

¹⁸Өзі азап шегіп ауыр сынаққа төзген Ол сынақтан өтіп жатқан бізге де көмектесе алады.