Езекиел 1:1-28 KZB2010 - Bible AI

¹Отызыншы жылдың [1] төртінші айының бесінші күні мен Хобар өзенінің жағасына жер аударылып қоныстанған елдестеріммен [2] бірге болдым. Сол кезде көк ашылып, Құдай маған көрсеткен көріністерді [3] көрдім.

²Бұл, Ехониях патшаның жер аударылғаннан кейінгі бесінші жылының төртінші айының бесінші күні болатын. [4]

³Сонда Жаратқан Ие халдейлердің еліндегі Хобар өзенінің жағасында маған, діни қызметкер Бузи ұлы Езекиелге, сөзін арнады. Сол жерде маған Жаратқан Иенің рухани құдіреті қонды. [5]

⁴Қарасам, солтүстік жақтан бір алапат құйын келе жатыр екен. Ол найзағайы оттай жарқылдап тұрған, [6] жан-жағынан жарқыраған нұрмен көмкерілген үлкен қалың бұлт екен. Ал оттың ортасы жылтыр қола [7] іспетті жарқырап тұрды.

⁵От ішінен тіршілік иелеріне ұқсаған төрт нөкер [8] көрінді. Олардың түр-тұрпаты адамдікіне ұқсас еді.

⁶Ал әр нөкердің төрт бет-әлпеті мен төрт қанаты бар болатын.

⁷Төрт нөкердің аяқтары түзу, ал аяқтарының басы торпақтікіне [9] ұқсап, жылтыр қоладай жалтырап тұрды.

⁸Нөкерлердің төрт жағындағы әр қанатының астында бір-бірден адамның қолы болды. Әрқайсысының да төрт бет-әлпеті мен қанаты бар еді.

⁹Осылайша төрт нөкер еш бұрылмастан кез келген бағытқа тура жүре алды. Төртеуінің қанаттары бір-біріне тиіп тұрды.

¹⁰Нөкерлердің бет-әлпеттері мынадай болды: әрқайсысының алдыңғы бет-әлпеті адамның, оң жағындағысы арыстанның, сол жағындағысы бұқаның және артындағысы бүркіттің жүзі іспетті еді. [10]

¹¹Олардың бет-әлпеттері осындай болатын. Төрт нөкердің қанаттары жоғары қарай жайылып тұрды. Әр тірі тұлғаның екі қанаты жанындағы екі нөкердің қанаттарына тиіп тұрса, басқа екі қанаты оның өз денесін жауып тұрды.

¹²Төрт нөкердің әрқайсысы алдыңғы жағына қарай, еш бұрылмай-ақ рух [11] қалаған бағытқа тура жүретін.

¹³Төрт нөкердің сырт кейпі лаулап жанып жатқан көмір шоғындай не жарқыраған алаудай еді. Осы от нөкерлердің арасында әрлі-берлі қозғалып, оттан найзағайлар жарқылдап тұрды.

¹⁴Нөкерлердің өздері де найзағайдың жарқылындай әрлі-берлі зымырап жүрді.

¹⁵Мен нөкерлерге қарағанда олардың жандарынан жерге тиіп тұрған төрт дөңгелекті [12] көрдім. Нөкерлердің әрбіреуінің жанында бір-бір дөңгелектен болды.

¹⁶Төрт дөңгелек зүбәржат [13] асыл тасы іспетті алтын түспен жарқылдап тұрды. Төртеуінің де сыртқы түрі мен жасалуы бірдей екен. Әр дөңгелектің ішінде өзімен қиылысқан екінші дөңгелегі болды. [14]

¹⁷Нөкерлер қай бағытқа қозғалмасын, дөңгелектер де бұрылмай-ақ кез келген бағытқа жылжи алатын.

¹⁸Дөңгелектердің шеңберлері үлкен әрі қорқынышты болды. Төртеуі де айналдыра көздерге толы еді. [15]

¹⁹Нөкерлер қозғалғанда, жандарындағы дөңгелектер де қозғалатын және нөкерлер жерден көтерілгенде, дөңгелектер де көтерілетін.

²⁰Нөкерлердің рухы дөңгелектерде болатын. Сондықтан рух қайда бағыт алса, нөкерлер мен дөңгелектер де тұрып, солай қарай бірге жылжитын.

²¹Нөкерлер қозғалғанда дөңгелектер де қозғалатын, тоқтағанда, дөңгелектер де тоқтайтын, ал жоғары көтерілгенде, солармен бірге дөңгелектер де көтерілетін. Өйткені нөкерлердің рухы дөңгелектерде болатын.

²²Нөкерлердің бастарының үстіңгі жағында шыныдай [16] жалтыраған күмбез тәрізді бір әуе кеңістігі [17] жайылып тұрды.

²³Нөкерлер күмбез тәрізді кеңістіктің астында әр жағындағы бір қанатын бір-біріне созып, қалған екі қанатымен денелерін жауып тұрды. [18]

²⁴Нөкерлер қозғалғанда, мен қатты ағып жатқан судың гүріліндей, құдіреті шексіз Құдайдың дауысындай, әрі зор әскердің тұрағындағы ұрандаған атойдай қанаттарының сусылын естідім. Нөкерлер тоқтағанда қанаттарын түсіріп отырды.

²⁵Ал енді, олар осылай қанаттарын түсіріп тыныш тұрған кезде, күмбез тәрізді кеңістіктің жоғарғы жағынан бір дауыс естілді.

²⁶Сол кеңістіктің жоғарғы жағында саф көк асыл тастан [19] жасалған таққа ұқсас бір нәрсе тұрды, ал оның үстінде сырт кейпі адамға ұқсас Біреу отырды. [20]

²⁷Оның денесі белінен жоғары қарай жалындап жалтыраған қоладай екенін әрі белінен төмен қарай оттай жарқырап тұрғанын көрдім. Және Оның айналасын жарқыраған нұр [21] көмкеріп тұрды.

²⁸Оның айналасындағы жарқыраған нұр жаңбырлы күні бұлттарда пайда болатын кемпірқосаққа ұқсас еді.