Езекиел 27:1-36 KZB2010 - Bible AI

¹Жаратқан Ие маған тағы сөзін арнап былай деді:

²«Ей, пендем, Тирге арнап жоқтау айт.

³Тир теңізге шығар қақпада билік етіп, көптеген аралдармен және жағалаулардағы халықтармен сауда-саттық жасайтын. Сонымен Тир жайлы былай де: Жаратушы Тәңір Ие мынаны айтады:

³Уа, Тир, сен өзіңді: «Мен керемет көріктімін!» деген едің.

⁴Сенің шекараларың теңіздің ортасына дейін жететін. [1] Сәулетшілерің көркіңді кемеліне келтірді.

⁵Сен бір кеме сияқты болдың, тақтайларыңды Хермон тауының қарағайынан [2] дайындады. Діңгегің ливандық самырсыннан болды.

⁶Ескектеріңді Башанның емендерінен ойып жасады. Үстіңгі қабатыңның еденін Кипр жағалауынан әкеліп, пілдің сүйегімен әшекейленген кипарис ағашынан төседі.

⁷Желкендеріңді мысырлық кестелі бәтестен тікті. Олар жалауың іспетті үстіңде жайқалып тұрды. Үстіңгі шатырың (Кипр аралындағы) Елишаның жағалауларынан әкелінген қою күлгін және күрең қызыл бәтестен жасалды.

⁸Ескекшілерің Сидон мен Аруадтан шыққан финикиялықтар, ал епті кеме жүргізушілерің өз шеберлеріңнен еді, уа, Тир қаласы!

⁹Кеме түбінің тесік-саңылауын бітеп жөндеу үшін гебалдық тәжірибелі аға шеберлер де өзіңде бар болатын, теңізде жүзетін күллі кемелер саудаласу үшін саған тоқтайтын.

¹⁰Ей, Тир қаласы, парсылар, лүдиялық және либиялық адамдар [3] жасақшы болып сенің қалың қолыңда қызмет ететін. Олар қамалыңның қабырғаларына қалқан-дулығаларын іліп, өзіңе салтанат әперген болатын.

¹¹Аруадтықтар кіликиялықтармен [4] бірге бар қамал қабырғаларыңның үстінде орналасып, ғамадтықтар мұнараларыңда қызмет атқаратын. Олар қамалыңның қабырғаларын айналдыра іліп қойған қалқан-қорамсақтарымен көркіңді кемеліне жеткізді.

¹²Сен әр түрлі тауарларға бай болғандықтан Тарсис [5] та сенімен сауда-саттық жасады. Олар тауарларыңды күміс, темір, қалайы және қорғасынға айырбастап сатып алатын.

¹³Грекиялық, тұбалдық және мешехтік [6] саудагерлер де өзіңмен саудаласып, тауарларыңа адам басымен [7] және қола бұйымдармен төлейтін.

¹⁴Бет-Тоғарма [8] алып келген жұмыс жылқыларын, шайқаста мінетін аттарын және қашырларын сенің тауарларыңмен алмастыратын.

¹⁵Өзіңмен дедандықтар да сауда-саттық жасайтын, көптеген басқа аралдар мен жағалау елдері де сенімен тауарларын айырбастайтын. Олар саған төлем ретінде пілдің азу сүйегі мен қара ағаш әкелетін. [9]

¹⁶Бұйымдарың ағыл-тегіл мол болғандықтан, Арама [10] елі де сенімен алыс-беріс жасайтын. Олар тауарларыңды зүбәржат, інжу-маржан, лағыл іспетті асыл тастар және күрең қызыл, кестелі не ақ бәтес маталар беріп, сатып алатын.

¹⁷Яһуда мен Исраил елдері де өзіңмен саудаласатын. Тауарларыңа олардың беретіні — (Аммон елінен әкелінген) миниттік бидай, тәтті тағамдар, [11] бал, зәйтүн майы және май дәрі [12] болатын.

¹⁸Бұйымдарың ағыл-тегіл мол әрі байлығың зор болғандықтан Дамаск қаласы саған хелбондық [13] шарап және ақшыл жүн әкеліп, сауда-саттық жасайтын.

¹⁹Узалдан дандықтар мен гректер де келіп, сенің тауарларыңның орнына қақталған темір, дәмқабық ағашының кептірілген гүлдерін және хош иісті құрақ [14] беретін.

²⁰Дедан шұратының саудагерлері мініс малына арналған ер-тоқымдық матамен сауда жасайтын.

²¹Сен Арабиямен және Қидардың [15] барлық әміршілерімен де саудаласып, олардан тоқты, қошқар, ешкі сатып алатынсың.

²²Сәба мен Рахаманың [16] саудагерлері де сенімен сауда-саттық жасасты. Олар тауарларыңа ең сапалы дәмдеуіштерін, асыл тастары мен алтынын алып келетін.

²³(Арамадағы) Харан, Хане, Еден қалалары [17] және Сәбаның, Ассур мен Хилмадтың саудагерлері де өзіңмен алыс-беріс жасайтын.

²⁴Сенің базарыңда олар қымбат, сәнді шапандар, көк, қою күлгін және кестелі маталармен, әрі баулары берік иіріліп, тығыз байланған түрлі түсті кілемдермен [18] сауда-саттық жасайтын.

²⁵Алып сауда кемелері [19] тауарларыңды басқа жақтарға жеткізетін. Осылайша теңіздегі аралда орналасқан сен байлыққа кенелдің де, даңқың кеңінен жайылды.

²⁶Ескекшілерің сені ашық теңізге алып шығатын. Ал енді шығыстан соққан «дауылды жел» [20] теңіздегі сені қиратпақ.

²⁷Бар байлығың, тауарларың мен бұйымдарың, теңізшілерің мен кеме бастықтарың, тесік-саңылауларды бітеп жөндеуші шеберлерің, саудагерлерің және барлық жасақшыларың өзіңде болғандардың бәрімен бірге талқаның шыққан күні теңіз түбіне кетіп құриды.

²⁸Кеме басқарушыларыңның айқайынан тіпті жағалаудағы дала да сілкінбек.

²⁹Күллі ескекшілер де кемелерін тастап кетіп, теңізшілер мен кеме басқарушылары да жағада тұрып,

³⁰сені ойлап бар дауыспен зар еңіреп, жоқтау айтып ащы көз жастарын төгеді. Олар бастарына топырақ шашып, қатты қайғырып күлге аунайды, [21]

³¹әрі сені жоқтап шаштарын тақырлап алып тастап, азалы киім [22] киеді. Содан олар жүректері сыздап, зар еңіреп жылап,

³²сен үшін былай деп жоқтау айтатын болады:

³²— Теңіз ортасындағы Тир сияқты үні өшкен қала болды ма екен, сірә?

³³Тауарларың теңіздің ар жағынан келгенде, көптеген халықты қамтамасыз еттің. Өзіңнің мол байлығыңмен, саудаңмен әлемдегі патшаларды байытатын едің.

³⁴Ал енді сен теңізде ойрандалып, тұңғиыққа шөгіп жоғалдың. Барлық тауарларың мен адамдарың өзіңмен бірге суға батып кетті.

³⁵Аралдар мен жағалаудағы елдердің бәрі саған қарап аңтарылып, жандары түршігеді. Олардың патшаларының зәре-құты қалмай, өңдері қашқан.

³⁶Басқа ұлттардың саудагерлері саған қарап мазақтап ысқырады. Себебі сен қорқынышты күйреуге ұшырап, бұдан былай еш болмайсың».