Езекиел 28:1-26 KZB2010 - Bible AI

¹Бұдан кейін Жаратқан Ие маған сөзін арнап былай деді:

²«Пендем, Тирдің әміршісіне мына хабарымды жеткіз: Жаратушы Тәңір Ие мынаны айтады: Жүрегің мейлінше асқақтап сен өзің туралы: «Мен тәңірмін, теңіз ортасындағы тәңір тағында отырмын!» дейсің. Өзіңді тәңірмін деп [1] сезінесің, бірақ сен Құдай емес, жай ғана пендесің!

³Әрине, сен Даниялдан да дана екенсің. [2] Саған беймәлім бірде-бір құпия жоқ екен.

⁴Өзіңнің даналығың мен ақыл-парасатың арқылы байлыққа қол жеткізіп, қазына қоймаларыңа алтын-күмісті молынан жинап алыпсың.

⁵Расында да сауданы жетік білуіңмен сен байлық-дәулет пен күш-қуатыңды нығайттың. Содан да жүрегің мейлінше менменсіп кетті».

⁶Сондықтан Жаратушы Тәңір Ие тағы мынаны айтады: «Өзіңді тәңір іспетті данамын деп санайтындығыңнан,

⁷біліп қой: Мен саған қарсы жат жерліктерді, халықтардың арасындағы ең қатыгезін [3] жіберемін. Олар сенің көрікті даналығыңды семсерлерімен шауып, нұрлы салтанатыңды аяқ асты етіп арамдайды.

⁸Сөйтіп сені о дүниеге тастайды. Теңіздің ортасында арам өліммен құрисың!

⁹Өзіңді өлтіруге келгендердің алдында «Мен тәңірмін!» деп айтасың ба сонда? Өлтірушілеріңнің қолына түскенде сен тәңір емес, жай ғана пенде боласың ғой.

¹⁰Сонда сүндеттелмеген [4] жат жерліктердің қолынан арам өлесің. Мен осыны нық айтамын», — деп ескертеді Жаратушы Тәңір Ие.

¹¹Жаратқан Ие маған тағы да сөзін арнап былай деді:

¹²«Ей, пендем, Тир патшасын жоқтап, оған былай де: Жаратушы Тәңір Ие мынаны айтады: Сен даналыққа кенелген, мінсіз келбетті әрі кемелділіктің үлгісі [5] болатынсың.

¹³Сен Едемде, Құдайдың пейіш бағында [6] болыпсың. Үстіңдегі киімің рубин, топаз, алмас, зүбәржат, [7] оникс, яспис, сапфир, лағыл, [8] изумруд сияқты әр түрлі асыл тастармен безендіріліпті. Жиектемелерің мен қондырғыларыңның бәрі алтыннан жасалыпты. [9] Олар сен жаратылған күні дайындалған болатын.

¹⁴Мен сені қанаттарын жайған (керуб атты) күзетші періштемен бірге орналастырдым. [10] Құдайдың қасиетті тауында [11] оттай жарқылдаған асыл тастардың арасында жүретін едің. [12]

¹⁵Сен жаратылған күніңнен бастап жүріс-тұрысыңда кінәратсыз болып келдің. [13] Алайда бір күні өзіңнен әділетсіздік табылды. [14]

¹⁶Саудаңның молдығынан зорлық жасауға әбден салынып, күнәға баттың. Сондықтан Мен сені арамданған деп санап, Құдайдың тауынан лақтырып тастадым. Күзетші періште (керуб) сені оттай жарқылдаған асыл тастардың арасынан аластатып қуды. [15]

¹⁷Өйткені әсем келбетіңнен асқақтап кеткен едің. Нұрлы салтанатыңа салынғаныңа бола даналығыңды бүлдірдің. Содан Мен сені жерге, басқа патшалардың алдына лақтырдым, олар саған қызыға қарайтын болды.

¹⁸Саудаңды әділетсіз жасап, көптеген қылмыстарыңмен ғибадатханаларыңды арамдадың. Сондықтан Мен ортаңнан от шығарып, ол сені жалмап қояды. Осылай Мен өзіңе қарап тұрғандардың көзінше сені күлге айналдырып, құртатын боламын.

¹⁹Халықтардың арасындағы өзіңді білетіндер саған қарап аңтарылып, жандары түршігетін болады. Сен өте қорқынышты апатқа тап болып, енді қайтып болмайсың!»

²⁰Жаратқан Ие маған тағы да сөзін арнап былай деді:

²¹«Пендем, бет-жүзіңді Сидон қаласына қарай бұр да, оған қарсы Менің хабарымды жариялап

²²былай де: Жаратушы Тәңір Ие мынаны айтады: Біліп ал, ей, Сидон, Мен саған қарсы шығамын! [16] Сенің араңда құрмет-даңқым шығатын болады! Саған шығарған үкімімді жүзеге асырып, Өзімнің киелілігімді [17] аян еткенімде, соны көргендердің бәрі Менің Жаратқан Ие екенімді білетін болады.

²³Себебі Мен Сидонға жұқпалы індет пен қантөгіс жіберемін, сонда көшелерінде қан судай ағатын болады. Семсерлі жау Сидонға жан-жақтан тап беріп, тұрғындары қаланың ортасында шабылып, құлап жатады. Мұны көргендер Менің Жаратқан Ие екенімді білетін болады».

²⁴«Бұдан былай айналасындағы көршілері Исраил халқына менсінбей қарамайды, әрі жаңқадай қадалып, өткір тікендей ауыртпайды. Өйткені олар Менің Жаратушы Тәңір Ие екенімді түсінетін болады».

²⁵Жаратушы Тәңір Ие тағы мынаны айтады: «Мен Исраил халқын өздері арасына шашырап кеткен елдердің ішінен жинап аламын. Олар арқылы сол халықтардың көзінше Өзімнің киелілігімді жария етемін. [18] Сонда Исраил халқы Мен кезінде қызметшім Жақыпқа уәде еткен елге [19] қайтадан қоныстанатын болады.

²⁶Олар сол елде еш қауіпсіз тұрып, үйлерін салып, жүзімдіктерін отырғызбақ. Мен оларды жәбірлеген көрші халықтарға шығарған үкімімді жүзеге асырған кезде исраилдіктер аман-есен тұратын болады. Сонда олар өздерінің Құдайы Жаратқан Иенің Мен екенімді түсінеді. [20]