Елшіл. істері 23:1-35 KZB2010 - Bible AI

¹Пауыл Жоғарғы кеңеске тіке қарап: — Бауырластар! Бүгінге дейін мен Құдай алдында ар-ұжданым кіршіксіз таза өмір сүріп келдім, — деді.

²Ал бас діни қызметкер Анани Пауылдың қасында тұрғандарға оны аузынан ұруға бұйырды.

³Сонда Пауыл оған:

³— Әктелген қабырға, сізді Құдай ұрады! [1] Осы жерде мені Таурат заңы бойынша соттау үшін отырғанмен, заңды бұзып мені ұрғыздыңыз, — деді.

⁴Қасында тұрғандар:

⁴— Құдайдың бас діни қызметкеріне ұрсуға қалай батылың барады? — деп ескертті.

⁵Пауыл былай деп жауап берді:

⁵— Бауырластар, оның бас діни қызметкер екенін білмедім! [2] «Халқыңның басшысына балағат сөз айтпа!» [3] деп (Тауратта) жазылған ғой.

⁶Жоғарғы кеңестің бір бөлігінің саддукейлер, ал қалғандарының парызшылдар [4] екенін білген Пауыл дауыстап: — Бауырластар, мен парызшылмын, парызшылдар әулетіненмін де. Өлгендердің қайта тірілуіне үміт етіп жүргенім үшін сотталып жатырмын! — деді.

⁷Осы сөзден кейін парызшылдар мен саддукейлер айтысып қалды да, жиналғандар екіге бөлініп кетті.

⁸Себебі саддукейлер ешқандай қайта тірілу де, періштелер де, рухтар да жоқ десе, [5] парызшылдар бұлардың бәрін мойындайды.

⁹Жиналыс айқай-шуға ұласты. Парызшылдардың кейбір дін мұғалімдері орындарынан тұрып:

⁹— Бұл кісіден ешқандай жамандық таппай тұрмыз. Оған бір рух немесе періште аян берген болса (біз Құдайға қарсы шықпаймыз)! — деп қызулана айтысты.

¹⁰Айтыс үлкен жанжалға айналып, мыңбасы олар Пауылды паршалап тастар деп қауіптенді. Содан ол жасақшыларға төмен түсіп, оны әлгілердің араларынан күшпен алып шығып, қамалға апаруға бұйырды.

¹¹Сол түні Иеміз Пауылдың жанында пайда болып: [6] «Батыл бол! Маған Иерусалимде куә болғаныңдай, Римде де куә болуға тиістісің», — деп аян берді.

¹²Келесі күні таңертең бірсыпыра яһудилер жасырын жиналып, Пауылды өлтірмейінше ешқандай нәр татпаймыз деп қарғанып ант берісті.

¹³Бұл ант байланысқан топта қырықтан аса адам бар еді.

¹⁴Олар басты діни қызметкерлер мен рубасыларына барып:

¹⁴— Пауылды өлтіргенше нәр татпаймыз деп қарғанып ант берістік.

¹⁵Сонымен Жоғарғы кеңес ретінде мыңбасына хабарлап: «Пауылдың ісімен жақынырақ танысқымыз келеді» деген сылтаумен оны өздеріңізге әкелдіріңіздер. Ал біз оны осында жеткізбей жолшыбай өлтіруге дайын тұрамыз», — деді.

¹⁶Бұл қаскүнемдік туралы Пауылдың жиен інісі [7] біліп қойды. Ол қамалға кіріп, Пауылға барды да, осы туралы хабарлады.

¹⁷Пауыл бір жүзбасын шақырып алып, оған: «Мына жас жігітті мыңбасына апарыңызшы, оған айтатын хабары бар», — деді.

¹⁸Жүзбасы бозбаланы ертіп мыңбасына кіріп:

¹⁸— Әлгі тұтқын Пауыл мені шақыртып алып, мына жас жігітті өзіңізге әкелуімді өтінді. Оның сізге айтатын бірдеңесі бар екен, — деді.

¹⁹Мыңбасы жігіттің қолынан ұстап, оңашаға шығарып:

¹⁹— Маған не айтайын деп едің? — деп сұрады.

²⁰Ол:

²⁰— Яһудилер өзара келісіп, Пауылдың ісін одан да мұқият тексеру сылтауымен оны ертең Жоғарғы кеңеске апаруыңызды сұрамақ.

²¹Ал сіз бұған келіспесеңіз игі болар еді. Өйткені олардың қырықтан аса адамы оны жол бойы торуылдап аңдып отырады. Бұлар Пауылды өлтірмейінше ешқандай нәр татпаймыз деп анттасты; енді келісіміңізді күтіп, дайын отыр, — деді.

²²Мыңбасы жас жігітке ескертіп:

²²— Маған осыны айтқаның туралы ешкімге де тіс жарма! — деп қайтарып жіберді.

²³Содан ол жүзбасылардың екеуін шақырып алып: «Кешкі сағат тоғызға екі жүз жауынгер, жетпіс атты әскер және екі жүз мергенді Кесарияға [8] баруға дайындаңдар!

²⁴Пауылға мінуге көлік дайындап, әмірші Феликске аман-есен апару жағын қадағалаңдар!» — деп бұйырды.

²⁵Содан соң төмендегідей хат жазды:

²⁶«Жоғары мәртебелі әмірші Феликске Клауди Лүсиден сәлем!

²⁷Мына кісіні яһудилер ұстап алып, өлтірейін деп жатқан сәтте мен оның Рим азаматы екенін біліп, жасақшылармен үстінен түсіп, құтқарып алдым.

²⁸Не үшін айыптайтындарын білмек болып, оны солардың Жоғарғы кеңесіне алып бардым.

²⁹Сонда аңғарғаным, олар мұны өз заңдары туралы даулы мәселелерге бола айыптайды екен. Бірақ оған өлім жазасына кесетіндей немесе түрмеге жабатындай ешбір кінә таққан жоқ.

³⁰Мен оған қарсы астыртын әрекет ұйымдастырылғанын біліп қалып, оны дереу сізге жіберіп отырмын. Айыптаушыларға тағатын кінәларын өзіңізге апаруға бұйырдым. Қош-сау болыңыз!»

³¹Жасақшылар бұйрықты орындап, Пауылды сол түні Антипатрис [9] қаласына жеткізді.

³²Келесі күні тұтқынды атты жасақпен әрі қарай жөнелтіп, өздері қамалға қайтып кетті.

³³Кесария қаласына келісімен атты жасақ хатты тапсырып, Пауылды әміршіге табыс етті.

³⁴Әмірші хатты оқып, Пауылдан қай аймақтан екенін сұрап, Кіликиядан екенін біліп алды:

³⁵«Сені айыптаушыларың келгенде тергеймін», — деп шешіп, оны Ирод атындағы сарайда ұстауға бұйырды.