Елшіл. істері 4:1-37 KZB2010 - Bible AI

¹Петір мен Жохан жиналған жұртқа әлі де сөйлеп тұрған кезде оларға діни қызметкерлер, ғибадатхана сақшыларының басшысы және өзге саддукейлер [1] де келді.

²Олар екеуінің халыққа тәлім беріп, «Иса өлімнен қайта тірілді» [2] деп жариялап жүргендеріне наразы болды.

³Содан олар Петір мен Жоханды тұтқындап, келесі күнгі таңертеңге дейін түрмеде ұстады. Себебі мезгіл кеш болып қалған еді.

⁴Петірдің уағызын тыңдағандардың көбі сенімді қабылдап, қауымдағы ер адамдардың саны бес мың шамасында болды. [3]

⁵Келесі күні таңертең яһудилердің басшылары, рубасылары және дін мұғалімдері Иерусалимде жиналды.

⁶Бас діни қызметкер Ханна әрі Қаяфа, Жохан, Ескендір және басты діни қызметкер әулетінің тағы басқа кісілері де түгел сол жерде болды.

⁷Олар екі елшіні ортаға шығарып:

⁷— Сендер мұны қандай күшпен, кімнің атынан істедіңдер? — деген сұрақ қойды.

⁸Киелі Рухқа ерекше кенелген Петір оларға былай жауап берді:

⁸— Халықты басқарушылар мен рубасылары!

⁹Біз бүгін: «Ол кім арқылы сауықты?» деп, ауруға жасаған жақсылығымыз үшін тергелмек болып жатырмыз.

¹⁰Ендеше бәріңіз де біліп алыңыздар, бүкіл Исраил халқына да мәлім болсын: сіздер айқышқа шегелетіп өлтірткен, ал Құдай өлімнен қайта тірілткен назареттік Иса Мәсіхтің атынан [4] мына кісі сауығып, қарсы алдарыңызда тұр.

¹¹Иса — құрылысшылар, яғни сіздер, менсінбей бас тартқан Тас. [5] Ол «енді үйдің басты іргетасына айналды!»

¹²Исадан басқа ешкім де бізді (Құдайдың қаһарынан) құтқара алмайды! Аспан астында бізді құтқаратын басқа ешкімнің есімі адамдарға бұйырылмаған! [6]

¹³Кеңес мүшелері Петір мен Жоханның батылдығын көріп, олардың арнайы діни даярлықтан өтпеген қарапайым адамдар екенін байқағанда таңғалды. Сондай-ақ, олар екеуінің Исаның шәкірті болғанын білді.

¹⁴Алайда қастарында тұрған сауыққан кісіні көріп, қарсы ештеңе айта алмады.

¹⁵Оларға: «Жоғарғы кеңестен шығыңдар!» — деп бұйырды да, өзара ақылдасып:

¹⁶«Мына кісілерге не істесек екен? Олар арқылы бір кереметтің жасалғаны анық, бұл Иерусалимде тұрып жатқандардың бәріне белгілі, онымен таласа алмаймыз.

¹⁷Дегенмен бұл іс халыққа одан бетер тарап кетпес үшін, бұдан былай сол Есімді атап ешкімге сөйлемеңдер, олай етпеген күнде жазаға тартамыз деп қатаң тыйым салайық», — десті.

¹⁸Әлгілерді шақырып алып, оларға:

¹⁸— Исаның атымен ешқандай уағыз айтпаңдар да, тәлім бермеңдер де! — деп тыйым салды.

¹⁹Бірақ Петір мен Жохан оларға:

¹⁹— Құдайды емес, сіздерді тыңдау Оның алдында жөн болар ма екен? Мұны өздеріңіз ойлап көріңіздерші!

²⁰Ал біз көріп-естігендеріміз туралы үнсіз қала алмаймыз, — деп жауап берді.

²¹Жоғарғы кеңес болған оқиғаға бола Құдайды дәріптеп жүрген халықты ескеріп, екі елшіні жазалаудың ретін таппай, оларды қорқыта түсіп, жөндеріне жіберді.

²²Себебі көп жылғы ауруынан сауығып, кереметті басынан кешірген кісінің жасы қырықтан асып кеткен еді. [7]

²³Өздерін босатқаннан кейін Петір мен Жохан қауымдастарына барып, басты діни қызметкерлер мен рубасыларының өздеріне айтқандарын түгел баяндап берді.

²⁴Сенушілер осыны естігенде ниеттес көңілмен Құдайға сиынып, дауыстап былай деді:

²⁴— Уа, Әлемнің Әміршісі, көк пен жерді, теңізді және олардағы нәрселердің бәрін жаратқан Сенсің!

²⁵Өзіңнің қызметшің — арғы атамыз Дәуіттің аузымен Киелі Рух арқылы былай дедің:
Ұлттар іске аспайтын жоспарлар құрып?

²⁵«Неге халықтар жатыр ашуланып, [8]

²⁶Жаратқан мен Оның қойған Патшасына [9] Әлемнің патшалары қарсы тұрып, Әкімдер кеңесіп жатыр бірігіп». [10]

²⁷Рас, осы қалада Ирод пен Понти Пилат [11] Өзіңе бағынбаған ұлттармен және Исраилдің руларымен бірігіп, Өзің Патша етіп тағайындаған қасиетті Қызметшің [12] Исаға қарсы одақтасты.

²⁸Алайда олардың іске асырғаны — Сенің құдіретті еркің алдын ала белгілеген жоспарың ғана.

²⁹Ал енді, уа, Иеміз, олардың қоқан-лоқысын көріп, құлдарыңа Сенің сөзіңді зор батылдықпен уағыздайтын күш бере гөр!

³⁰Қолыңды созып ауруларды сауықтыра гөр, қасиетті Қызметшің Исаның атынан кереметтер мен ғажап істер жасап құдіретіңді көрсете гөр! [13]

³¹Олар сиынып болғаннан кейін өздері жиналып отырған жер қозғалып кетті. Бәрі Киелі Рухқа кенеліп, [14] Құдай сөзін батылдықпен уағыздады.

³²Сенушілердің қауымы ой-ниеттері бірдей шын жүректен ынтымақтас болды. [15] Ешкім қолындағы мал-мүлкін өз меншігім демей, олар барлығымен бөлісті. [16]

³³Елшілер Иеміз Исаның қайта тірілгендігі туралы зор жігермен куәлік берді. Осылайша олардың бәріне Құдайдың мол рақымы жауды.

³⁴Араларында жоқшылық көрген ешкім болған жоқ. Себебі жері немесе үйлері барлар керек болғанда меншіктерін сатып, ақша түсіріп,

³⁵оны елшілердің алдына әкеліп қойып отырды. Осыдан әркімге керегінше берілді.

³⁶Мысалы, Леуі руынан шыққан кипрлік Жүсіп есімді адам болды. Елшілер оған Барнаба [17] — аударғанда Жігерлендіруші деген қосымша ат берген еді.

³⁷Барнаба өзінің меншікті егістік жерін сатып, түскен ақшаны алып келіп, елшілердің алдына қойды.