Елшіл. істері 8:1-40 KZB2010 - Bible AI

¹Саул [1] да Степанды өлтіруді қоштаған еді. Сол күннен бастап Иерусалимдегі сенушілер қауымын қатты қудалау басталды. Елшілерден басқалардың бәрі Яһудея мен Самария аймақтарына бытырап кетті. [2]

²Ал Құдайды қастерлейтін бірнеше кісі Степанды қабірге қойып, қатты аза тұтып жоқтады.

³Саул болса, қауымға қырғидай тиді; үй-үйді аралап, әйелдер мен еркектерді сүйреп шығарып, түрмеге жапқызды.

⁴Бытырап кеткен сенушілер ел аралап, Ізгі хабарды таратып жүрді.

⁵Қауым қызметшісі Філіп Самарияның астанасына [3] келіп, оның тұрғындарына Мәсіх туралы Ізгі хабарды жариялады.

⁶Көптеп жиналған халық Філіптің уағыздарын естіп, оның Құдайдың құдіретін көрсеткен кереметтерін көргенде, барлығы бірдей Філіптің айтқандарына зейін қойды.

⁷Өйткені көп кісілердің буып жүрген жындары қатты айқайлап бойларынан шығып кетті, әрі көптеген сал, мүгедек болғандар сауықтырылды.

⁸Содан қала халқы зор қуанышқа кенелді.

⁹Осы қалада бұрыннан сиқырлықпен айналысып келген Шимон есімді кісі тұрушы еді. Ол ұлы адаммын деп мақтанып, Самария халқын таңырқататын.

¹⁰Қатардағылардан бастап атақтыларға дейін бәрі оны жоғары санап: «Мына кісіде Ұлы күш деген тәңірдің құдіреті бар!» [4] дейтін.

¹¹Шимон оларды едәуір уақыт бойы сиқырлық өнерімен баурап алғандықтан, халық оны пір тұтты.

¹²Ал енді Філіп Құдайдың Патшалығы және Исаның Мәсіх екендігі туралы Ізгі хабарды жариялағанда, олар соған сенді. Көптеген ер адамдар мен әйелдер (Мәсіхтің жолына түсіп) шомылдыру рәсімінен өтті.

¹³Шимонның өзі де сеніп, осы рәсімнен өтіп, Філіптен бір елі қалмай қойды. Ол Құдайдың құдіретін танытатын ұлы кереметтерді байқағанда қайран қалып жүрді.

¹⁴Иерусалимдегі елшілер «Самарияның халқы [5] Құдайдың Ізгі хабарын қабыл алды» дегенді естігенде, оларға Петір мен Жоханды жіберді.

¹⁵Екеуі келген соң, Киелі Рухты қабылдасын деп солар үшін сиынып мінажат етті.

¹⁶Себебі Киелі Рух әлі олардың ешқайсысына қонбаған еді. Олар тек Иеміз Исаның атынан [6] шомылдыру рәсімінен өткен болатын.

¹⁷Екі елші олардың үстеріне қолдарын қойғанда, самариялық сенушілер де Киелі Рухты қабылдады. [7]

¹⁸Шимон елшілердің алақан тигізуі арқылы адамдарға Киелі Рух берілгенін байқағанда оларға ақша ұсынып:

¹⁹— Маған да осындай билік беріңдерші, үстіне қолымды қойған әркім Киелі Рухты қабылдап жүрсін, — деді.

²⁰Петір оған былай деп жауап берді:

²⁰— Құдайдың беретін дарынын [8] ақшаға сатып аламын дегенің үшін, ақшаң өзіңмен бірге құрысын.

²¹Осы қызметті атқаруға сенің қақың жоқ, [9] себебі Құдайдың алдында жүрегің таза емес.

²²Сондықтан осы жаман қылығыңа өкініп, Құдай Иеге сиынып жалбарын! Мүмкін, Ол жүрегіңдегі қара ниетіңді кешірер.

²³Жаман қызғаныш пен әділетсіздікпен шырмалғандығыңды [10] байқап тұрмын. —

²⁴Ал Шимон олардан:

²⁴— Айтқандарыңның бірі де басыма келмесін деп сендер мен үшін Құдай Иеге жалына көріңдерші! — деп өтінді.

²⁵Екі елші халық алдында Иеміз туралы Ізгі хабарға куәлік келтіріп, уағызын аяқтағаннан кейін, Иерусалимге қайта оралып, жол-жөнекей Ізгі хабарды Самарияның көптеген ауылдарында уағыздай жүрді.

²⁶Бір күні Жаратқан Иенің періштесі Філіпке: «Жиналып, оңтүстікке қарай [11] Иерусалимнен Газаға баратын елсіз жолға шық!» — деп тапсырды.

²⁷Содан Філіп дайындалып, жүріп кетті. Жол бойында оған бір эфиопиялық адам [12] кез болды. Бұл Эфиопияның патшайымы Қандақидың барлық қазынасын басқаратын уәзірі екен. Ол Иерусалимге Құдайға ғибадат етуге келіп,

²⁸енді еліне қайтып бара жатты. Уәзір күймесінде Ишая пайғамбардың жазбасын оқып отыр екен.

²⁹Киелі Рух Філіпке: «Күймеге жақындап, қатарласып жүр!» — деді.

³⁰Філіп күймеге жүгіріп барғанда, сол кісінің Ишая пайғамбардың жазбасын оқып отырғанын естіді. Оған:

³⁰— Оқығаныңыз түсінікті ме? — деген сұрақ қойды.

³¹Уәзір:

³¹— Біреу түсіндірмесе, қайдан түсінейін? Күймеге мініп, қасыма отырыңызшы, — деп Філіптен өтінді.

³²Жазбадан оқып отырған жері мынау еді: Оны қой сияқты сойылатын жерге алып барды. Ол қырқылып жатқанда үні шықпайтын тоқты секілді тіс жармады.

³³Ол жәбірленіп, әділ сотталу құқығынан айырылды. Оның ұрпақтары туралы кім айтып бере алады? Өйткені Оның жаны бұ дүниеден аластатылды. [13]

³⁴Уәзір Філіптен: — Өтінемін, айтыңызшы: пайғамбар осы сөздерді өзі туралы айтып тұр ма, әлде басқа біреу туралы ма? — деп сұрады.

³⁵Сонда Філіп Киелі жазбаның осы жерінен бастап, Иса туралы Ізгі хабарды айтып берді.

³⁶Жолда осылай келе жатып, олар бір суға тап болды. Уәзір сонда: — Мынау су ғой, менің шомылдыру рәсімінен өтуіме болмай ма? — деп өтінді.

³⁷(Філіп: — Мен Исаның Құдайдың рухани Ұлы [14] екеніне сенемін, — деді.)

³⁷— Шын жүректен сенсеңіз, болады, — деп жауап берді. Бұған ол:

³⁸Уәзір күймені тоқтатуға бұйырды. Екеуі суға түсіп, Філіп уәзірді суға шомылдыру рәсімінен өткізді.

³⁹Олар судан шыққанда, Жаратқан Иенің Рухы Філіпті білдірмей алып кетті. [15] Содан қайтып уәзір оны көрген жоқ. Солай болса да, ол қуанышқа кенеліп, өз жөніне кетті.

⁴⁰Бұдан кейін жұрт Філіпті Азоттан көрді. Ол сол жерден ел аралап, Кесарияға [16] жеткенше Ізгі хабарды барлық қалаларға таратып жүрді.