Еремия 1:1-19 KZB2010 - Bible AI

¹Мұнда Бунямин руының жеріндегі Анатотта [1] тұрған діни қызметкерлердің бірі — Хелкия ұлы Еремияның пайғамбарлық сөздері берілген.

²Жаратқан Ие оған алғаш рет Яһудаға Амон ұлы Жосия патшалық құрған он үшінші жылы сөзін арнады.

³Содан кейін Яһуда патшасы Жосия ұлы Жохақымның [2] тұсында және Яһудаға Жосия ұлы Седекиях патшалық құрған он бірінші жылына дейін де Жаратқан Ие Еремияға хабарларын жеткізіп отырды. Сол жылдың бесінші айында Иерусалимнің халқы Бабылға жер аударылды.

⁴Жаратқан Ие маған сөзін арнап былай деді:

⁵— Мен сені шешеңнің құрсағында жаратпастан бұрын-ақ білген болатынмын. Анаңның құрсағынан шықпай тұрып-ақ сені өз қызметіме бағыштап, халықтарға пайғамбар болуға тағайындап белгіледім. —

⁶Сонда мен:

⁶— Уа, Жаратушы Тәңір Ие! Мен әлі тым жаспын, жұрт алдында сөйлей алмаймын ғой, — дедім.

⁷Бірақ Жаратқан Ие маған былай деді:

⁷— Әлі тым жаспын деме! Мен сені кімге жіберсем, солардың бәріне барып, не айт десем соның бәрін айтатын боласың!

⁸Адамдардан қорықпа. Мен саған жар болып, өзіңді аман сақтаймын. [3] Мен, Жаратқан Ие, осыны уәде етемін. —

⁹Бұдан соң Жаратқан Ие қолын созып, аузыма тигізді де: — Міне, сенің аузыңа сөздерімді салып беріп отырмын. [4]

¹⁰Бүгін сені ұлттар мен патшалықтарға үстемдік жүргізуге тағайындадым. Сен оларды түп-тамырымен жұлып ойсыратып, құлатып жоясың, әрі қайтадан тұрғызып, егіп отырғызатын боласың, [5] — деді.

¹¹Жаратқан Ие маған тағы да сөзін арнап: — Еремия, нені көріп тұрсың? — деген сұрақ қойды. Мен: — Бадам ағашының бір бұтақшасын көріп тұрмын! — дедім.

¹²Сонда Жаратқан Ие:

¹²— Көргенің дұрыс. Мен де сергек болып айтқан сөзімнің жуырда іске асуын қырағы бақылаймын, [6] — деді.

¹³Содан соң Жаратқан Ие маған екінші рет сөзін арнап: — Нені көріп тұрсың? — деген сауал қойды. Мен: — Бір қазанды көріп тұрмын. Ол қайнап, тасып, солтүстіктен бізге қарай төгілейін деп жатыр, — деп жауап бердім.

¹⁴Сонда Жаратқан Ие маған былай деді:

¹⁴— Дәл сол сияқты апат осы елдің күллі тұрғындарына солтүстіктен шүйілетін болады!

¹⁵Өйткені Мен солтүстіктегі барлық патшалықтардың ұлттары мен тайпаларын шақырып алмақпын. Мен, Жаратқан Ие, осыны нық айтамын.

¹⁵Солардың патшалары аттанып келіп, тақтарын Иерусалимнің қақпаларының жанына орнатады да, қаланы қоршаған қабырғаларына және Яһуданың барлық басқа қалаларына да шабуыл жасайды. [7]

¹⁶Халқымның Мені тастап кетіп, бөтен тәңірлерге хош иісті заттар түтетіп ұсынғандары және өз қолдарымен жасап алған мүсіндерге табынып кетіп істеген барлық зұлым істеріне бола Мен оларға жазалау үкімін шығарамын!

¹⁷Ал енді, жиналып беліңді буып, өзіңе тапсырғандарымның бәрін оларға жеткіз! Олардан қорықпа, әйтпесе Мен өзіңді олардың алдында қорқытамын.

¹⁸Біліп қой: бүгін Мен сені бекіністі қала іспетті еттім. Сен темір бағанадай, қола қабырғадай берік боласың. Енді осы жердегілердің бәріне: Яһуда елінің патшалары мен әміршілеріне, діни қызметкерлері мен халқына қаймықпай қарсы тұра аласың.

¹⁹Олар сенімен күрессе де, сені жеңе алмайды, өйткені Мен саған жар болып, өзіңді құтқаратын боламын! Осы уәдені берген Мен Жаратқан Иемін.