Жаратылыстың баст. 11:1-32 KZB2010 - Bible AI

¹Жер бетіндегі бүкіл адамзат бір тілді, бірдей сөздерді қолданды.

²Адамдар шығыс жақта көшіп қонып жүргенде [1] Шинар жерінде [2] бір жазық алқапты тауып, соған қоныс тепті.

³Олар бір-біріне: «Келіңдер, кірпіш құйып, отқа күйдірейік!» — деді. Сонымен олар тас орнына күйген кірпіш, әк орнына қарамай [3] қолданды.

⁴«Өзімізге қала және төбесі көкке жететін зәулім мұнара тұрғызып алайық. Осылайша өз атымызды шығарайық, сонда біз жердің түкпір-түкпіріне бытырап кетпейміз», — десті.

⁵Ал Жаратқан Ие көктен түсіп, адамдар тұрғызып жатқан қала мен мұнараға көз салып,

⁶былай деді: «Олар біртұтас халық болып, бірдей тілде сөйлеп, мынаны істей бастады. Бұдан былай олар ойындағыларын жүзеге асырмай қоймайтын болады.

⁷Енді Біз жерге түсіп, бірін-бірі түсінбеулері үшін олардың тілін шатастырып жіберейік».

⁸Осылайша Жаратқан Ие адамдарды сол жерден бүкіл жер бетіне бытыратып жіберіп, қала құрылысын тоқтатты.

⁹Сондықтан қалаға Бабыл [4] деген ат қойылды, өйткені Жаратқан Ие сол жерде бүкіл әлемдегі тілді шатастырып, адамдарды жер бетіне бытыратып жіберді.

¹⁰Мынау Шамнан тараған ұрпақтардың шежіресі. Топан судан кейін екі жыл өткенде Шам жүзге толып, ұлы Арпақсат дүниеге келді.

¹¹Сонан соң ол тағы бес жүз жыл өмір сүріп, басқа да ұл-қыздары болды.

¹²Арпақсат отыз беске келгенде одан Шелах туды.

¹³Шелах туған соң, Арпақсат төрт жүз үш жыл өмір сүріп, басқа да ұл-қыздарға әке болды.

¹⁴Шелах отызға келгенде одан Ебер дүниеге келді.

¹⁵Ебер туғаннан кейін де Шелах тағы төрт жүз үш жыл өмір сүріп, басқа да ұл-қыздарға әке болды.

¹⁶Ебер отыз төрт жасқа келгенде одан Пелек туды.

¹⁷Пелек туғаннан кейін де Ебер төрт жүз отыз жыл өмір сүріп, тағы да ұл-қызды болды.

¹⁸Пелек отыз жасқа келгенде одан Рәгу туды.

¹⁹Рәгу туған соң, Пелек екі жүз тоғыз жыл өмір сүріп, басқа да ұл-қыздарды дүниеге келтірді.

²⁰Рәгу отыз екі жасқа келгенде одан Серук туды.

²¹Серук туған соң, Рәгу екі жүз жеті жыл өмір сүріп, басқа да ұл-қыздарға әке болды.

²²Серук отыз жасқа толғанда ұлы Нахор туды.

²³Нахор туған соң, Серук екі жүз жыл өмір сүріп, басқа да ұл-қыздары дүниеге келді.

²⁴Нахор жиырма тоғыз жасқа келгенде одан Тарах туды.

²⁵Тарах туған соң, Нахор жүз он тоғыз жыл өмір сүріп, басқа да ұл-қыздарды дүниеге келтірді.

²⁶Тарах жетпіс жасқа толғаннан кейін, одан Ыбырам, [5] Нахор, Харан дүниеге келді.

²⁷Мынау Тарахтан тараған ұрпақтардың шежіресі: Тарахтан Ыбырам, Нахор, Харан атты ұлдары дүниеге келді. Хараннан Лут туды.

²⁸Бірақ Харан Халдейлер елінде өзі туған Ур қаласында [6] дүние салды. Сол кезде оның әкесі Тарах әлі де тірі болатын.

²⁹Ыбырам мен Нахор да үйленді. Ыбырамның әйелі Сарай, ал Нахордың әйелі Мылқа болды. Мылқа мен Ысқа Харанның қыздары еді.

³⁰Сарай құрсақ көтермегендіктен, Ыбырамның балалары болмады.

³¹Тарах өз ұлы Ыбырамды, немересі Лутты және келіні Сарайды ертіп алып, бәрі бірігіп халдейлер еліндегі Ур қаласынан жолға шықты. Олар Қанахан жеріне бармақшы еді, алайда Харан [7] аймағына жеткен соң, сол жерге қоныс теуіп, тұрып қалды.

³²Тарах екі жүз бес жыл өмір сүріп, Харанда қайтыс болды.