Жаратылыстың баст. 15:1-21 KZB2010 - Bible AI

¹Осы оқиғалардан кейін Жаратқан Ие Ыбырамға аян беріп: — Ыбырам, қорықпа! Мен сені қалқандай қорғаймын. Саған берілер сыйлық аса зор болады, [1] — деді.

²Бірақ Ыбырам жауап беріп былай деді:

²— Уа, Жаратушы Тәңір Ие, Сен маған қандай сыйлық бермексің? Мен әлі де ұрпақсыз келемін. [2] Үйіме дамаскілік қызметшім Елиезер иелік етпек. —

³Ыбырам тағы: — Сен маған бала сыйламадың, сондықтан мұрагерім үйімдегі бір қызметшім болады, — деп те мұңын шақты.

⁴Ал Жаратқан Ие оған сөзін арнап:

⁴— Мұрагерің ол емес, сенен туатын ұл болады! — деді.

⁵Содан оны сыртқа алып шығып: — Аспанға қарап жұлдыздарды санашы! Сен оларды санай алар ма екенсің? Сенің үрім-бұтағың да осындай сансыз көп болады! — деп уәде берді.

⁶Ыбырам Жаратқан Иеге сенді, сондықтан Жаратқан Ие оны Өзінің алдында ақтады. [3]

⁷Тәңір Ие Ыбырамға тағы да тіл қатып: — Мен Жаратқан Иемін. Сені осы елді иемденсін деп халдейлік Ур қаласынан алып шыққан Менмін, — деді.

⁸Ал Ыбырам:

⁸— Уа, Жаратушы Тәңір Ие, оны иемденетінімді мен қалай нақты біле аламын? — деп сұрады.

⁹Сонда Иеміз оған:

⁹— Маған бір-бірден үш жасар сиыр, ешкі, қошқарды [4] әрі орман кептері мен жас көгершінді алып кел, — деп бұйырды.

¹⁰Ыбырам соның барлығын әкеліп, оларды сойып, ортасынан қақ бөліп, бөліктерді бір-біріне қарсы қойды. [5] Ол тек құстарды ғана бөлмеді.

¹¹Жыртқыш құстар сойылған малдардың етіне қонды, бірақ Ыбырам оларды қуып жіберді.

¹²Күн батқанда Ыбырамды керемет ұйқы басты. Сол сәтте ол түсінде қара түнекті көріп, қатты қорқып кетті.

¹³Ал Жаратқан Ие Ыбырамға тіл қатып:

¹³— Біліп ал: сенің ұрпақтарың бөтен елде жат жұрттық келімсектер ретінде тұратын болады. Сол жерде олар төрт жүз жыл бойы құлдықта болып жәбірленеді.

¹⁴Бірақ оларды құл еткен халықты Мен жазалаймын. Бұдан кейін сенің ұрпақтарың сол елден мол дүние-мүлікпен көшіп шығады.

¹⁵Ал сен болсаң, жасың ұлғайған шағыңда ақ өліммен [6] бабаларыңның қасына аттанып, жер қойнына кіресің.

¹⁶Сенің үрім-бұтағың осы елге төрт ұрпақтан кейін ғана қайтып келеді. Себебі аморлықтардың күнәлары әлі шегіне жеткен жоқ, — деді.

¹⁷Күн батып, қараңғылық орнаған кезде, міне, пештен шыққан іспетті түтін мен лаулап жалындаған от [7] бір-біріне қарсы жатқан мал бөліктерінің ортасынан өте шықты.

¹⁸Сол кезде Жаратқан Ие Ыбыраммен Келісім жасап: — Мен сенің үрім-бұтағыңа Мысырдың шетіндегі өзеннен бастап үлкен өзен — Евфратқа дейін жайылған осы елді беремін.

¹⁹Онда кендіктер, кеназдықтар, қадмондықтар,

²⁰хеттіктер, перездіктер, рафалықтар,

²¹аморлықтар, қанахандықтар, гергестіктер және ебустіктер тұрып жатыр, — деді.