Жаратылыстың баст. 2:1-25 KZB2010 - Bible AI

¹Осылайша аспан мен жер және олардың рет-ретімен орналасқан барлық бөлшектері [1] толықтай жаратылды.

²Құдай жүргізген жарату жұмысының бәрін жетінші күні аяқтап, сол күні еңбек етпей демалды. [2]

³Жетінші күнге Құдай оң батасын беріп, оны қасиетті деп белгіледі. [3] Себебі Ол бұл күні Өзінің жарату жұмысының бәрін бітірген соң тынықты.

⁴Аспан мен жердің жаратылғаннан кейінгі тарихы мынау: Құдай Ие [4] жер мен аспанды жаратқан кезде

⁵жер бетінде әлі де даланың бұталары мен өсімдіктері көктеп, өспеген болатын. Себебі Құдай Ие жерге жаңбыр жауғызбаған еді; оны өңдейтін адам да жоқ болатын.

⁶Ал жер бетінен бу көтеріліп шығып, бүкіл даланы суландырып тұрды. [5]

⁷Сонда Құдай Ие жердегі топырақтан адамды қалыптастырып жасап, оның мұрнына тіршілік лебін үрледі. [6] Адам осылай тірі жан болып шыға келді.

⁸Құдай Ие шығыс жақта, Едем [7] деген жерге пейіш бағын [8] орнатып, Өзі жаратқан адамды сонда орналастырды.

⁹Құдай Ие көз тартарлық, жеуге жақсы жеміс беретін әр түрлі ағаштарды жерден өсіріп шығарды. Бақтың ортасында «мәңгілік өмірді сыйлайтын ағаш» және «жақсылық пен жамандықты танытатын ағаш» та өсіп тұрды.

¹⁰Бақты суландыратын өзен Едемнен ағып шығып жатты, ол әрі қарай төрт тармаққа бөлініп кететін.

¹¹Біріншісі Пишон деп аталады, ол алтын шығатын бүкіл Хауила өлкесін айналып ағады.

¹²Сол елдің алтыны ерекше бағалы, онда хош иісті шайыр мен оникс атты асыл тас та бар.

¹³Екінші өзенді Гихон деп атайды, ол бүкіл Құш өлкесін [9] айналып ағады.

¹⁴Үшінші өзеннің аты Тигр, ол Ассурдың шығыс жағынан өтеді. Төртінші өзен — Евфрат. [10]

¹⁵Құдай Ие пейіш бағын өңдеп, күтіп-бағу үшін адамды сонда орналастырды.

¹⁶Құдай Ие адамға бұйрық беріп: «Саған бақтағы күллі ағаштардың жемістерін жеуге болады.

¹⁷Бірақ жақсылық пен жамандықты танытатын ағаштың жемісін жеме! Себебі одан жесең, сол күні өлесің», [11] — деді.

¹⁸Содан кейін Құдай Ие: «Адамның жалғыз болғаны жақсы болмас. Мен оған өзіне сай көмекші [12] жасап берейін», — деді.

¹⁹Құдай Ие даладағы барлық жануарларды және аспандағы күллі құстарды топырақтан қалыптастырып жасаған еді. Енді адамның оларды қалай атайтынын білу үшін бәрін оған алып келді. Адам қандай ат қойса, олар солай аталатын болды.

²⁰Сонымен адам малдар мен аңдардың және аспандағы құстардың барлық түрлеріне де өз аттарын берді.

²⁰Ал адамға [13] өзіне сай көмекші табылмады.

²¹Сонда Құдай Ие адамды терең ұйқыға батырып, ұйықтап жатқанда оның бір қабырғасын [14] алып, соның орнын етімен жауып тастады.

²²Құдай Ие осы қабырғадан әйел жасап шығарып, оны адамға алып келді.

²³Риза болған адам былай деді:
«Міне, бұл — сүйек, өз сүйегімнен шыққан, Әрі тән, өз тәнімнен шыққан! Ол әйел [15] деп аталатын болсын, Себебі ол еркектен алынып жасалған».

²⁴Сондықтан еркек әке-шешесін тастап, әйеліне берік қосылады, сөйтіп екеуі біртұтас болады. [16]

²⁵Адам мен оның әйелі жалаңаш еді, ал олар бұған ұялған жоқ.