Жаратылыстың баст. 25:1-34 KZB2010 - Bible AI

¹Ыбырайым тағы да үйленіп, Кетура есімді әйел алған болатын.

²Одан Ыбырайымның Зимран, Жоқшан, Медан, Мадиян, [1] Ишбақ, Шуах деген ұлдары дүниеге келді.

³Жоқшаннан Сәба мен Дедан туды. Деданнан кезінде ашурлықтар, [2] летуштіктер және леумдіктер тарады.

⁴Мадиянның ұлдарының аттары мыналар: Ефа, Ефер, Ханох, Абида, Елдаға. Бұлардың барлығы да Кетурадан тараған ұрпақтар болатын.

⁵Алайда Ыбырайым жинаған бар дүние-мүлкін Сарадан туған Ысқаққа мұра етіп қалдырды. [3]

⁶Өзінің көзі тірісінде ол кәнизактарынан [4] туған ұлдарына енші беріп, оларды шығыс жаққа, өз ұлы Ысқақтың маңынан алшақтау жерге, жіберді.

⁷Ыбырайым барлығы жүз жетпіс бес жыл жасады.

⁸Ол мағыналы өмір сүріп, жасы ұлғайған шағында о дүниеге, ата-бабаларының қасына аттанды.

⁹[9-10] Ысқақ пен Ысмағұл әкелерінің мәйітін Мамренің қасында, хеттік Сохар ұлы Ефронның егістігінде орналасқан Махпела үңгіріне апарып, марқұм әйелі Сараның қасына қойды. Бұл жер танабы мен үңгірді Ыбырайым кезінде хеттіктерден сатып алған болатын. [5]

¹¹Ыбырайым өлгеннен кейін Құдай оның ұлы Ысқақты да жарылқап жүрді. Ол «Қамқоршым — тірі Құдай» деген құдықтың маңайында [6] өмір сүріп жатты.

¹²Ыбырайымның Сараның мысырлық күңі Ажардан туған ұлы Ысмағұлдың үрім-бұтағының шежіресі мынау:

¹³Ысмағұлдың ұлдарынан тараған ұрпақтар рет-ретімен былай аталады: Ысмағұлдың тұңғышы Набайот, одан кейін Қидар, [7] Адбел, Мипсам,

¹⁴Мишма, Дума, Масса,

¹⁵Хадад, Тема, Етур, Нафиш, Кедмах туды.

¹⁶Бұлар Ысмағұлдың он екі ұлынан тарап, жартылай көшпенді, жартылай отырықшы болып, мекендеген жеріне қарай бөлінген рулардың он екі көсемі болды.

¹⁷Ысмағұл барлығы жүз отыз жеті жыл өмір сүріп, ата-бабаларының қасына аттанды.

¹⁸Оның ұрпақтары Мысырдың шығысындағы Шурдан Ассур еліндегі [8] Хауилаға қарай созылған аралықты мекендеп, барлық бауырлас тайпалармен жауласып өмір сүрді. [9]

¹⁹Ыбырайымның ұлы Ысқақтың үрім-бұтағының шежіресі мынау: Ыбырайымнан Ысқақ туды.

²⁰Ысқақ қырық жасында солтүстік Месопотамияда [10] тұратын арамалық Бетуелдің қызы, Лабанның қарындасы Рабиғаға үйленді. [11]

²¹Әйелі бала көтермегендіктен, Ысқақ ол үшін Жаратқан Иеге жалына сиынды. Оның тілегін Иеміз қабыл алып, күндердің күнінде Рабиға жүкті болды.

²²Оның құрсағындағы екі нәресте бір-бірімен тебісетін. Сонда ол: «Менде не үшін бұлай?» — деп ойлап, осыны білмекші болып Жаратқан Иеге жүгінді.

²³Иеміздің жауабы мынау болды:
Құрсағыңнан екі ұлт тарамақ. Біреуі екіншісінен күштірек болып, Ағасы інісінің қызметшісі болмақ». [12]

²³«Сенің ішіңде екі тайпа жатыр,

²⁴Босанатын уақыты келіп, Рабиға егіз ұл тапты.

²⁵Бірінші туған баланың денесін киім іспетті қалың қызыл түк басып кеткендіктен, оған Есау (яғни «Түкті») деп ат қойды.

²⁶Одан соң оның сыңары көрінді, ол бір қолымен Есауды өкшесінен ұстап алыпты. Оны Жақып (яғни «Өкшеден ұстаушы, Алдамшы») деп атады. Егіз ұлды болғанда, Ысқақ алпыста еді.

²⁷Балалар ер жетті. Есау дала кезіп жүретін білікті аңшы болса, Жақып шатыр маңайында тыныш жүретін жігіт еді.

²⁸Ысқақ баласы аулаған аңның етін ұнатқандықтан, Есауды жақсы көретін. Ал Жақып Рабиғаның сүйікті ұлы болды.

²⁹Бір күні Жақып тамақ пісіріп жатқанда, Есау шаршап, қарны ашып даладан келді.

³⁰Ол Жақыпқа:

³⁰— Маған тезірек мына бір қызғылт түсті көжеңнен берші, мен ашпын, — деді. Сондықтан ол кейін Едом (яғни «Қызыл») деп аталды. [13]

³¹Жақып:

³¹— Онда қазір маған өзіңнің тұңғыштық жолыңды сат, — деп қолқа салды.

³²Есау:

³²— Аштықтан өлейін деп тұрғанымда, маған тұңғыш боп туғандығымның керегі қанша? — деді.

³³Жақып:

³³— Алдымен маған ант бер, — деп талап етті. Есау ант беріп, өзінің тұңғыштық жолын Жақыпқа сатып жіберді.

³⁴Сонда Жақып оған нан және қызыл жасымықтан пісірген көжені ұсынды. Есау ішіп-жеп болған соң жөніне кетті. Осылайша ол тұңғыштық жолына немқұрайды қарап, одан бас тартты.