Жаратылыстың баст. 4:1-26 KZB2010 - Bible AI

¹Адам әйелі Хауамен жақындасқан соң, әйелі жүкті болып, Қабылды [1] туды. Сонда Хауа: «Жаратқан Иенің жарылқауымен бір ұл балаға ие болдым», [2] — деді.

²Хауа қайтадан жүкті болып, Қабылдың інісі Әбілді туды.

²Әбіл мал бағушы, ал Қабыл жерді өңдейтін егінші болды.

³Біраз уақыт өткеннен кейін Қабыл Жаратқан Иеге арнап жерден жинап алған өнімінен тарту ұсынды.

⁴Ал Әбіл малының алғашқы төлдерінен әкеліп, құрбандыққа шалып, олардың майлы бөліктерін де тарту етті. Жаратқан Ие Әбілге және оның құрбандығына ризашылықпен қарады, [3]

⁵бірақ Қабылға және оның ұсынған тартуына риза болмады. Бұған Қабыл қатты ашуланып, қабағын түйіп безеріп алды.

⁶Сонда Жаратқан Ие Қабылға:

⁶— Сен неге ашуланасың? Неліктен қабағыңды түйіп безересің?

⁷Егер істегенің дұрыс болса, онда сені қабылдар едім. [4] Ал істегенің дұрыс болмаса, онда босағаңды күнәнің жағалағаны: күнә сені иемденуге құштар, бірақ сен оған жол бермеуің керек, [5] — деп сөзін арнады.

⁸Алайда Қабыл інісі Әбілге: «Далаға барайық», — деді. Олар далаға шыққан соң, Қабыл інісін бас салып, ұрып өлтірді.

⁹Кейін Жаратқан Ие Қабылдан: — Інің Әбіл қайда? — деп сұрады. Ол: — Білмеймін, мен інімнің күзетшісі ме едім? — деп жауап қайырды.

¹⁰Жаратқан Ие: — Сен не істедің? Ініңнің төгілген қаны Маған жерден үн қатып, кегін алуды сұрап тұр!

¹¹Сені қарғыс атқан! Енді өз қолыңмен өлтірген ініңнің қаны сіңген жердің топырағынан аулақ жүресің.

¹²Сен оны өңдегенде, түк өнім ала алмайсың. Сондықтан жер бетінде тұрағы жоқ кезбеге айналасың, — деді.

¹³Қабыл Жаратқан Иеге жауап беріп: — Менің тартатын жазам [6] көтере алмастай ауыр.

¹⁴Бүгін мені егіндік жерден қуып отырсың, Сенің көзіңнен таса жүретін боламын. Жер бетінде тұрағы жоқ кезбеге айналамын. Кім кездессе, сол мені өлтіретін болады, — деді.

¹⁵Бірақ Жаратқан Ие:

¹⁵— Жоқ, Қабылды кім өлтірсе, содан жеті есе кек алынады, — деді. Сондықтан Ол кездескендер өлтіріп қоймау үшін Қабылға таңба салып берді.

¹⁶Ал Қабыл Жаратқан Иенің көз алдынан кетіп, Едемнің шығысында орналасқан Нод (яғни «Кезбелік») деген жерге қоныстанды.

¹⁷Қабыл әйелімен жақындасып, ол жүкті болып, Енохты туды. Кейін Қабыл қала салып, оған ұлының атын қойды.

¹⁸Ал Енохтан Ирад, Ирадтан Мехуел, Мехуелден Метушаил, Метушаилдан Ләмех дүниеге келді.

¹⁹Ләмех екі әйел алды, біреуінің есімі Ада, екіншісінікі Зилла еді.

²⁰Ададан Ябал туды. Ябалдан шатырларда тұрып, мал бағатындар тарады.

²¹Оның інісінің аты Юбал еді. Ол ішекті аспаптар мен сыбызғыда ойнаушылардың түп атасы болды.

²²Зилланың да Тұбалқабыл есімді бір ұлы болатын. Ол мыс пен темірден әр түрлі құрал-жабдықтарды жасап шығарды. [7] Тұбалқабылдың қарындасының аты Нағама еді.

²³Ләмех әйелдеріне тіл қатып: «Әй, Ада мен Зилла, Ләмехтің әйелдері, мені тыңдап, сөзіме құлақ түріңдер! Мені жаралағаны үшін бір еркекті, денемді көгерткені үшін бір жас жігітті өлтірдім.

²⁴Қабыл үшін жеті есе кек алынатын болса, Ләмех үшін жетпіс жеті есе кек алынатын болады», — деді.

²⁵Адам ата әйелімен тағы да жақындасқан соң, Хауа ұл туып, оның атын Сет (яғни «Сыйланған») деп қойды. Себебі ол: «Қабыл Әбілді өлтірген соң, Құдай маған оның орнына басқа бір ұрпақ сыйлады», — деді.

²⁶Сет те ұлды болып, атын Енос деп қойды.

²⁶Сол кезден адамдар Жаратқан Иеге сиынып мінажат ете бастады. [8]