Жаратылыстың баст. 40:1-23 KZB2010 - Bible AI

¹Біраз уақыт өткенде сарайдағы бас шарапшы [1] және бас наубайшы өздерінің қожайыны — Мысырдың патшасының алдында кінәлі болып қалды.

²Содан перғауын осы екі уәзіріне қатты ашуланып,

³оларды бас қорғаушысы басқаратын түрмеге отырғызды. Мұнда Жүсіп те отырған болатын.

⁴Бас қорғаушы екеуін Жүсіптің қарамағына тапсырып, ол соларға қызмет етті.

⁴Шарапшы мен наубайшы түрмеде біраз күн өткізген соң,

⁵екеуі де бір түнде түс көрді. Әр түстің өзіндік мағынасы бар болатын.

⁶Келесі күні таңертең оларға кірген Жүсіп екеуінің жабырқау екенін байқап:

⁷— Бүгін неге мұңайып отырсыздар? — деп сұрайды.

⁸— Біз екеуіміз де түс көрдік, бірақ оны бізге жорып беретін ешкім жоқ, — дейді олар. Жүсіп: — Түс жору Құдайдың ісі емес пе? Маған айтып беріңіздер, — дегенде,

⁹бас шарапшы оған түсін әңгімелеп береді:

⁹— Түсімде бір жүзім бұтасын көрдім.

¹⁰Бұтаның үш сабағы бар екен. Көгере бастасымен гүлдеп, жүзім пісіп те үлгеріпті.

¹¹Қолымда перғауынның шарап ішетін тостағаны бар екен. Сонда мен жүзімді алып, сығып, шырынын тостағанға ағызып, перғауынның қолына беріппін. —

¹²Жүсіп оған:

¹²— Түстің жоруы былай: үш жүзім сабағы үш күнді білдіреді.

¹³Үш күннің ішінде перғауын басыңызды жоғары көтеріп, сізді қайтадан орныңызға қояды. Оған бұрынғысынша шарап ұсынатын боласыз.

¹⁴Ал ісіңіз оңғарылған шақта мені ұмытпай, перғауынға мен туралы айта көріңізші! Мені түрмеден босаттырып, жақсылық жасасаңыз екен.

¹⁵Себебі мені көшпенділердің елінен ұрлап алып келген болатын. Бұл жерде де түрмеге түсетіндей ешқандай қылмыс жасаған жоқпын, — дейді.

¹⁶Жүсіптің түсті жақсы жорығанын көріп, бас наубайшы да түсін айтып береді: — Мен түсімде басыма үш себет көтеріп жүріппін.

¹⁷Ең үстіңгі себеттің ішінде перғауынға арнап пісірілген тағамдар бар екен. Бірақ оларды басымдағы себеттің ішінен құстар шоқып жеп жатты. —

¹⁸Сонда Жүсіп:

¹⁸— Бұның жоруы мынау: үш себет үш күнді білдіреді.

¹⁹Үш күннің ішінде перғауын сіздің басыңызды көтеріп, дарға асып қояды. Құстар етіңізді шоқып жейтін болады, — деп түсіндіреді.

²⁰Үш күн өткен соң перғауынның туған күні болып, ол күллі нөкерлеріне той жасады. Сонда патша бас шарапшысы мен бас наубайшысын түрмеден шығарып алдыртып, нөкерлерінің алдында

²¹бас шарапшыны бұрынғысынша шарап құйып беру үшін қайтадан орнына қойды,

²²ал бас наубайшыны дарға асқызды. Бәрі де дәл Жүсіп алдын ала айтқандай болды.

²³Алайда бас шарапшы Жүсіптің тілегін есіне алмай, ұмытып кетті.