Жаратылыстың баст. 6:1-22 KZB2010 - Bible AI

¹Адамдар жер бетінде көбейе бастап, қыздары да көптеп туылғанда,

²өздерін Құдайдың ұлдарымыз деп есептейтін билеушілер [1] адамдардың қыздарының сұлу, бойшаң екенін көріп, таңдап алғандарына үйлене беретін.

³Сонда Жаратқан Ие: «Енді Менің Рухым әрдайым адам үшін арпалысқа түспейді, себебі адам әбден бүлінген. [2] Сондықтан ол бұдан былай жүз жиырма жыл ғана өмір сүрсін», — деді. [3]

⁴Сол кезде де, содан кейін де өздерін Құдайдың ұлдарымыз деп есептейтін билеушілер адамдардың қыздарымен жақындасып, олардан бұзақы алыптар туған болатын; бұлар өткен заманда ел танып білген батырлар еді.

⁵Жаратқан Ие адамдардың жер бетінде әбден азғындыққа салынғанын көрді: олардың жүректеріндегі барлық ой-ниеттері әр уақытта зұлымдыққа бейім болды.

⁶Сонда Жаратқан Ие жер бетінде жаратып шығарған адамдардың осындай күнәлі болып кеткеніне [4] қайғырып, қасірет шекті.

⁷Сондықтан Ол: «Мен Өзім жаратқан адамды да, онымен қоса малдарды, бауырымен жорғалаушыларды және аспандағы құстарды да жер бетінен құртып жібермекпін. Өзім жаратқандардың күнәкарға айналғандарына [5] қайғырамын», — деді.

⁸Жаратқан Иенің рақымына тек Нұх қана ие болды.

⁹Мынау Нұхтың шежіресі: Нұх замандастарының арасында әділ де кінәратсыз, Құдаймен тығыз байланыста жүрген адам еді.

¹⁰Нұхтың Шам, Хам және Япші деген үш ұлы болды.

¹¹Құдайдың көз алдында жер беті бүлінген үстіне бүліне беріп, зұлымдыққа толды.

¹²Дүниенің әбден бұзылғанына Құдай көзін жеткізді, себебі жер бетіндегі барлық адамдар азғын өмір сүрді.

¹³Сонда Ол Нұхқа үн қатып, былай деді: «Мен күллі тіршілік иелерінің өмір сүруін тоқтатамын. Жер беті солардың кесірінен зұлымдыққа толды, сол себепті оларды жермен қоса құртып жіберемін.

¹⁴Сен мықты ағаштан [6] сандық тәрізді кеме тұрғыз, оны бірнеше бөлімдерден тұратын етіп жасап, іші-сыртын қара шайырмен майла.

¹⁵Оны былай жаса: ұзындығы үш жүз, ені елу, биіктігі отыз шынтақ болсын.

¹⁶Кеменің үстіне шатыр тұрғыз. Ішін ойып, терезелер жаса, оларды ең жоғарғы жерінде бір шынтақ етіп айналдыра орналастыр. [7] Ал есігін бүйірінен шығар. Кеменің төменгі, ортаңғы, жоғарғы қабаттары болсын.

¹⁷Біліп ал: Мен аспан астындағы жанды мақұлықтардың бәрін құрту үшін жер бетіне топан су қаптатамын. Жер бетіндегінің барлығы құруға тиіс.

¹⁸Алайда сенімен Келісімімді жасамақпын. [8] Өзің де, ұлдарың, әйелің және келіндерің де кемеге кіресіңдер.

¹⁹Тірі жануарлардың әрқайсысынан екі-екіден кемеге бірге ала баруың керек, біреуі еркек, біреуі ұрғашы болсын.

²⁰Тіршілікті жалғастыру үшін құстардың, малдардың және бауырымен жорғалаушылардың әр түрінен — барлығынан қос-қостан сенімен бірге ішке кірулері керек.

²¹Ал сен өзіңді және оларды тамақтандыру үшін жеуге жарайтын тағамдардың бәрінен қор жасап ал».

²²Нұх бұларды мұқият орындады. Ол барлығын да Құдайдың өзіне бұйырғанындай істеді.