Жоханның 3-хаты 1:1-15 KZB2010 - Bible AI

¹Ақсақалдан [1] өзі шын жүректен жақсы көретін қымбатты Гайға дұғай сәлем!

²Сүйікті бауырым! Сенің рухани өміріңнің сау болғанындай, саған барлық жағынан да Құдайдан игілік пен денсаулық тілеймін.

³Кейбір бауырластар келіп, сенің шындыққа адал болып, үнемі шындық жолымен жүріп келе жатқаныңды хабарлағанда, мен қатты қуандым.

⁴Рухани балаларымның шындық жолымен жүріп жатқанын естуден артық маған қуаныш жоқ.

⁵Сүйікті бауырым, сендерге сапарлап келген бауырластарымыз өзіңе таныс болмаса да, оларға демеу болып дұрыс істеп жүрсің.

⁶Олар осындағы қауым алдында сенің сүйіспеншілігіңе куәгер болды. Мұндайларды Құдайдың адамдарына лайық түрде жолға жабдықтап, шығарып салсаң, игі болады.

⁷Себебі олар бұл сапарға Оның атын таныту үшін [2] шықты және Оған сенбейтіндерден ешқандай жәрдем алмайды.

⁸Сондықтан осындай кісілерді қолдау — біздің міндетіміз; шындықты таратуға осылай үлесімізді қосамыз.

⁹Мен қауымға жазып жібердім, бірақ олардың басшысы болуға тырысып жүрген Диотреф бізді мойындамайды.

¹⁰Сондықтан барған кезде оның істегендерінің бәрін есіне саламын: ол бізді жаман сөзбен өсектеп жүр; ал соған да қанағаттанбай, сапармен келген бауырластарымызды өзі де қабылдамайды, басқаларға да қабылдатпайды. Оларды қарсы алғандарды тіпті қауымнан шығарып тастайды.

¹¹Сүйікті бауырым, жамандыққа еліктемей, жақсылыққа елікте! Жақсылық істейтін адам Құдайдікі, ал жамандық жасаушы Құдайды білмейді.

¹²Деметір туралы елдің бәрі жақсы пікір айтады. Ол шындыққа сай әрекет жасайды. [3] Біз де соған куәлік етіп жүрміз, ал сендер шындықты айтатынымызды білесіңдер.

¹³Саған әлі де көп нәрсе жазуым керек еді, бірақ оны жазғым келмейді.

¹⁴Сені жақын арада көретін шығармын деген үмітім бар, сонда екеуіміз ауызба-ауыз сөйлесеміз.

¹⁵Саған амандық пен тыныштық болсын! Бұл жақтағы достарың сәлем айтып жатыр. Сол жақтағы достардың бас-басына сәлем айт!