Жохан 4:1-54 KZB2010 - Bible AI

¹Иса Жақиядан гөрі көбірек шәкірттер тауып, шомылдыру рәсімінен өткізіп жатыр деген хабар парызшылдарға жетті. [1]

²Шынында оны істеп жүрген Исаның Өзі емес, шәкірттері еді.

³Сондай хабардың парызшылдарға жеткенін білген Иеміз Иса Яһудея аймағынан Ғалилеяға қайта оралды.

⁴Құдайдың еркімен Иса Самария аймағы арқылы жол жүруге тиісті болды.

⁵Осылай Ол Самариядағы Сихар қаласына [2] келді. Бұл қала (ежелде Исраил халқының түп атасы) Жақыптың өз ұлы Жүсіпке мұра етіп қалдырған жеріне жақын орналасқан. [3]

⁶Сол жерде «Жақыптың құдығы» бар еді. Жол жүріп шаршаған Иса құдықтың қасына отыра кетті. Түс мезгілі болатын,

⁷[7-8] ал шәкірттері қалаға тамақ алуға кеткен еді. Сол кезде құдықтан су алу үшін самариялық бір әйел келді. Иса одан:

⁷— Маған ішетін су берші, — деп сұрады.

⁹Самариялық әйел таңғалды. Себебі яһудилер (діни сенім бойынша арамданбау үшін) самариялықтармен араласпайды. [4] Сондықтан әйел:

⁹— Өзің яһуди бола тұра, қалайша менен, самариялық әйелден, су сұрайсың? — деген сауал қойды.

¹⁰Иса:

¹⁰— Егер Құдайдың өзіңе не сыйлағысы келгенін және су сұраған Адамның кім екенін білсең, сен Оның Өзінен су сұрар едің. Сонда Ол саған «өмір суын» [5] берер еді, — деп жауап қатты.

¹¹— Мырза, құдықтан су алатын Сіздің ыдысыңыз жоқ, ал құдық терең ғой. Онда сол өмір суын қайдан аласыз?

¹²Мына құдықты қалдырған арғы атамыз Жақыптан да ұлысыз ба? Өзі де, балалары да, малы да одан су ішкен, [6] — деді әйел.

¹³Иса оған былай деді:

¹³— Мына судан ішкен адам тағы шөлдейді.

¹⁴Ал кімде-кім Мен беретін «судан» ішсе, ол мәңгі бақи шөлдемейтін болады. Мен беретін «су» оның ішінде мәңгілік өмір сыйлайтын, бұрқылдап жатқан «қайнарға» айналады. [7] —

¹⁵Сонда әйел:

¹⁵— Мырза, бұдан былай шөлдеп, су алуға мұнда келе бермеуім үшін маған осы судан беріңізші! — деп өтінді.

¹⁶Иса оған:

¹⁶— Барып, күйеуіңді шақыр, өзің де кел! — деді.

¹⁷— Менің күйеуім жоқ, — деді әйел. Ал Иса оған: — Күйеуім жоқ деп шыныңды айттың.

¹⁸Бес рет күйеуге шыққансың, ал қазіргің күйеуің емес. Мұны дұрыс айттың, — деп жауап берді.

¹⁹Сонда әйел:

¹⁹— Мырза, Сіздің пайғамбар екеніңізге көзім жетіп тұр!

²⁰Ал енді, біздің ата-бабаларымыз Тәңір Иеге мына таудың басында [8] сиынып мінажат еткен, ал сіздер сиынатын орын Иерусалимде болуға тиіс дейсіздер, [9] қайсысы дұрыс? — деп сұрады.

²¹Иса оған былай деді:

²¹— Айтқаныма илан: көктегі Әкеге не осы таудың басында, не Иерусалимде сиынбайтын замандарың [10] келе жатыр.

²²Сендер өздерің білмейтін Біреуге табынып келесіңдер, ал біз Кімге ғибадат етіп жүргенімізді білеміз, өйткені Құдай яһудилер арқылы адамзатты құтқармақ. [11]

²³Нағыз сиынушылардың Құдайдың Рухына кенеліп, Әкеге шындап мойынсұнып сиынатын уақыты [12] болады, ол тіпті жетіп те қалды: Әке Өзіне осылай мойынсұнып сиынушыларды қалайды.

²⁴Құдайдың Өзі — Рух. Сондықтан Оған сиынатындар Оның Рухына кенеліп, шындықпен сиынуға тиіс. —

²⁵Сонда әйел:

²⁵— Мәсіх деген Құтқарушы Патшамыздың [13] келетінін білемін. Ол келгенде бізге бәрін ашық айтып береді, — деді.

²⁶Иса:

²⁶— Сенімен сөйлесіп тұрған Мен Соның Өзімін, — деп әйелге жауап берді.

²⁷Сол арада шәкірттері қайтып келіп, Исаның бір әйелмен сөйлесіп отырғанына таңғалды. [14] Бірақ ешқайсысы «Одан нені сұрайсыз?» немесе «Онымен неге сөйлесесіз?» деп сұраған жоқ.

²⁸Әйел су алатын ыдысын қоя салып, қалаға қайта оралды да, жұртқа:

²⁹«Жүріңдер, менің құпия іс-әрекеттерімнің бәрін дәл айтып берген Кісіні көріңдер! Ол Құдай жіберген Мәсіх емес пе екен?» — деді.

³⁰Сонда жұрт қаладан шығып, Исаға қарай бет алды.

³¹Осы екі арада шәкірттері: — Ұстаз, тамақ ішіп алыңыз, — деп өтінді.

³²Ал Иса:

³²— Менің сендер білмейтін «тамағым» бар, — деді.

³³Шәкірттері:

³³— Оған біреу тамақ әкеп берген бе? — десті.

³⁴Иса оларға астарлап былай деді:

³⁴— Өзімді Жібергеннің еркін іске асырып, Оның тапсырғанын толық орындау Маған «нәр» болады.

³⁵Сендер «төрт айдан кейін егін орамыз» дейсіңдер. Ал Мен сендерге былай деймін: көздеріңді ашып, егіндіктерге қараңдар, олар жинауға дайын пісіп тұр.

³⁶Қазір-ақ орушылар жалақыларын алып, мәңгілік өмірге арналған өнімді жинап жатыр. Осылай егінді еккен де, жинаған да бірге қуанады. [15]

³⁷«Біреу еккенді біреу орады» деген мақал осы жағдайда рас болып тұр.

³⁸Мен сендерді Маған адам әкелу үшін өздерің еңбек етпеген жерге жұмсадым. Басқалар жұмыс істеді, ал олардың еңбегінің жемісін сендер көріп жатырсыңдар.

³⁹Сол қаладағы самариялықтардың көпшілігі әлгі әйелдің «Ол менің құпия іс-әрекеттерімнің бәрін дәл айтып берді» деп куәлік еткен сөзі арқылы Исаға сене бастаған еді.

⁴⁰Сондықтан олар Исаның қасына келгенде, Оның өздерімен бірге қалуын өтінді. Содан Иса екі күн осы жерде болды.

⁴¹Оның сөзін естігенде, тағы көбірек кісілер Исаға сенді. Олар әйелге:

⁴²— Біз енді тек сенің айтқаның бойынша сеніп қоймай, Оның сөзін өзіміз естіп, шынында дүниені Құтқарушы Осы екеніне көз жеткіздік, — деді.

⁴³Екі күннен кейін Иса сол жерден әрі қарай Ғалилеяға кетті.

⁴⁴Ал Оның Өзі: «Өз елінде пайғамбардың қадірі болмас», — деп ашық айтқан еді. [16]

⁴⁵Бірақ Иса Ғалилеяға келгенде, ғалилеялықтар Оны жылы қабылдады. Өйткені олар да Иерусалимдегі Құтқарылу мейрамына барып, Исаның істеген барлық кереметтерін көрген еді. [17]

⁴⁶Осылай Иса үйлену тойында суды шарапқа айналдырған Ғалилеядағы Қана қаласына [18] тағы да келді. Сол кезде Қапарнаумда патшаның бір қызметкері болды, оның ұлы ауырып жатты.

⁴⁷Қызметкер Исаның Яһудея аймағынан Ғалилеяға келгенін естіп, Оған барды да:

⁴⁷— Келіп, баламды сауықтырып берсеңіз екен! Ол өлім аузында жатыр, — деп өтінді.

⁴⁸Иса:

⁴⁸— Құдіретімді дәлелдейтін кереметтерімді көрмесеңдер, сендер еш сенбейсіңдер, [19] — деді.

⁴⁹Ал баланың әкесі Оған:

⁴⁹— Мырза, ұлым өлмей тұрғанда келіңізші! — деп жалбарынды.

⁵⁰Сонда Иса:

⁵⁰— Үйіңе бара бер, балаң аман-сау! — деді. Қызметкер Исаның айтқан сөзіне сеніп, кетіп қалды.

⁵¹Келесі күні жолшыбай оның қызметшілері кездесіп:

⁵¹— Балаңыз аман-сау, — деді.

⁵²Сонда ол қызметшілерінен баласының жағдайы қай сәтте жақсарғанын сұрады. Олар:

⁵²— Кеше түс кезінде сағат бірде [20] ыстығы қайтты, [21] — деді.

⁵³Сонда әкесі Исаның өзіне «балаң аман-сау» деген кезі дәл сол сәтте болғанын біліп, үй ішімен Исаға сенді.

⁵⁴Осылай Иса Яһудея аймағынан Ғалилеяға келгеннен кейін екінші рет керемет іс жасап, Өзінің құдіретін танытты.