Жохан 6:1-71 KZB2010 - Bible AI

¹Біраз уақыт өткеннен кейін Иса Ғалилея көлінің шығыс бетіне жөнелді. Сол көл Тіберия [1] көлі деп те аталады.

²Исаның ауруларға жасаған кереметтерін көргендіктен көп халық Оған ерді.

³Ол тауға шығып, сол жерде шәкірттерімен отырды.

⁴Бұл яһуди халқының Құтқарылу мейрамының [2] қарсаңы болатын.

⁵Иса басын көтеріп қарағанда, қарақұрым халықтың Өзіне қарай ағылып келе жатқанын көрді. Содан Иса Філіпке: [3] — Бұларды тамақтандыратын нанды қайдан сатып аламыз? — деді.

⁶Иса осы сөзін оны сынау үшін айтты, себебі не істемекші болғанын Өзі біліп тұрды.

⁷Філіп Оған:

⁷— Бізде тіптен екі жүз күндік жалақыға [4] келетін нан болып, әркім бір жапырақтан ғана жегеннің өзінде бәріне бірдей жетпес еді, — деп жауап берді.

⁸Сонда басқа бір шәкірті, Шимон Петірдің інісі Әндір, [5] Исаға былай деді:

⁹— Осында бір бала жүр, оның бес күлше арпа наны мен екі кепкен балығы [6] бар. Бірақ олар осынша көп кісіге не болады? —

¹⁰Ал Иса:

¹⁰— Адамдарды жайғастырып отырғыза беріңдер! — деп тапсырды. Сол жерде шөп қалың болып, бес мыңдай ер адам [7] жайғаса алды.

¹¹Иса күлшелерді алып, шүкірлік етті [8] де, жайғасқандарға үлестірді; кепкен балықтардан да жұртқа қалағандарынша берді.

¹²Бәрі жеп тойған соң, Иса шәкірттеріне: «Босқа ысырап болмас үшін нанның қалдықтарын жинап алыңдар», — деді.

¹³Олар жұрт жеген бес күлше арпа нанының қалдықтарын жинап, он екі себетті толтырды.

¹⁴Адамдар Иса жасаған осы кереметті көргенде: — Дүниеге келуге тиіс Пайғамбар [9] — шынымен Осы! — десті.

¹⁵Иса олардың Өзін патша ету [10] үшін келіп, кенеттен ұстап алмақшы болғанын білді. Содан Ол тағы да жалғыз Өзі қыратты жерге қарай кетіп қалды.

¹⁶Кешке Исаның шәкірттері көл жағасына ылдилап барды.

¹⁷Сол жерде бір қайыққа мініп, көлдің батыс жағындағы Қапарнаумға қарай бет алды. Қараңғы түскен кез еді, ал Иса оларға әлі келген жоқ болатын.

¹⁸Сонда қатты жел соғып, көлдің астан-кестені шығып, толқи бастады.

¹⁹Шәкірттер бес-алты шақырымдай қайықпен жүргеннен кейін, кенеттен көл бетімен жаяу жүріп қайыққа таяп қалған Исаны көрді. Олар қорқып кетті, [11]

²⁰ал Иса: «Қорықпаңдар, келе жатқан Менмін ғой!» — деп көңілдерін орнықтырды.

²¹Сонда шәкірттері Оны қайыққа мінгізіп алғылары келді. Сол сәтте-ақ қайық олар бет алған жағаға жетіп қалды.

²²Келесі күні көлдің шығыс бетінде қалған халық Исаның шәкірттері мінген жалғыз қайықтан басқа ешбір қайықтың болмағанын естеріне түсірді. Олар Исаның шәкірттерімен бірге қайыққа мінбей, тек шәкірттерінің өздерінің ғана кетіп қалғанын жақсы білетін.

²³Ал Иеміз шүкірлік еткеннен кейін халық нан жеп тойған кешегі жерге басқа да қайықтар Тіберия қаласынан жақындап келіп жатты.

²⁴Иса мен шәкірттерінің бұл жерде жоқ екеніне көздері жеткен жұрт сол себептен әлгі қайықтарға мініп, Исаны іздеп Қапарнаумға беттеді.

²⁵Олар Оны көлдің батыс бетінен тапқанда:

²⁵— Ұстаз, бұл жерге қашан келдіңіз? — деп сұрады.

²⁶Иса былай деп жауап берді:

²⁶— Сендерге өте маңызды шындықты айтамын: Құдайдың өздеріңе кереметтер арқылы не білдіргенін түсінгілерің келмейді. Тек нан жеп тойып алғандықтан ғана Мені іздеп жүрсіңдер.

²⁷Өткінші тамаққа емес, мәңгілік өмір беретін рухани нәрге ұмтылыңдар! Оны сендерге көктен келген Мен ғана бере аламын, өйткені Құдай Әке Маған билігін берді. [12] —

²⁸Сонда олар:

²⁸— Құдайдың еркін іске асыру үшін не істеуіміз керек? — деп сұрады.

²⁹Иса:

²⁹— Ол Жібергенге сеніңдер, Құдайдың еркі сол, — деп жауап берді.

³⁰Олар:

³⁰— Өзіңізді Құдай жібергеніне көзімізді жеткізіп, сенуіміз үшін қандай керемет көрсетесіз, не істейсіз? [13]

³¹«Оларға жейтін нанды аспаннан жіберді» деп (Забурда) жазылғандай, ата-бабаларымыз айдалада тәтті нан [14] жеп жүрді, — деді.

³²Иса:

³²— Сендерге өте маңызды шындықты айтайын: сол заманда көктен нан берген — Мұса пайғамбар емес, Менің Әкем. Қазір де Әкем сендерге көктен шынайы «нанды» ұсынып тұр.

³³Себебі көктен түсіп, адамзатқа өмір Беруші — «Құдайдың наны», — деп жауап қайтарды.

³⁴Олар:

³⁴— Мырза, бізге әрқашан осындай нан беріп тұрыңызшы! — деп өтінді.

³⁵Сонда Иса оларға былай деді:

³⁵— Шынайы өмір сыйлайтын «нан» Менмін. Маған келгендер рухани нәрден тарықпайды, Маған сенгендер ешқашан шөлдемейді!

³⁶Бірақ Мен сендерге: «Мені көрдіңдер, алайда сенбейсіңдер» дегенмін.

³⁷Әкем қарамағыма берген адамдардың барлығы [15] Маған келеді, ал Мен Өзіме келгендерді ешқашан қуып жібермеймін.

³⁸Себебі өз еркімді емес, Мені жіберген Әкемнің еркін орындау үшін көктен келдім.

³⁹Ал Әкемнің еркі — Оның қарамағыма берген адамдарының бірде-біреуін тозаққа түсірмей, бәрін де ақырғы күні қайта тірілтуім. [16]

⁴⁰Себебі Әкемнің еркі мынау: Өзінің рухани Ұлына назар аударып, сенім артқан барлық адамдарға мәңгілік өмір сыйлау. [17] Мен соларды ақырғы күні қайта тірілтіп аламын.

⁴¹Сонда Исаның көктен түскен «нан» Менмін дегеніне [18] діндар яһудилер күңкілдеп наразылық білдірді:

⁴²— Мынау біз әке-шешесін білетін Жүсіп ұлы Иса емес пе? [19] Онда Ол қалайша «Мен көктен түстім» дейді? —

⁴³Иса оларға былай деп жауап берді:

⁴³— Өзара күңкілдеспеңдер!

⁴⁴Мені жіберген Әкем Өзіме жақындатып тартса ғана, адамдар Маған келе алады; [20] ал Мен оларды ақырғы күні қайта тірілтіп аламын.

⁴⁵Пайғамбарлар жазбаларында «Бәрі де Құдайдан тәлім алмақ» делінген. [21] Әкемді тыңдап, Одан тәлім алған әркім Маған келеді.

⁴⁶Әрине, Құдайдан Келгеннен басқа ешкім Әкені көрген емес, Әкені көрген — тек Сол ғана. [22]

⁴⁷Сендерге өте маңызды шындықты айтамын: кім Маған сенім артса, сол мәңгілік өмірге ие. [23]

⁴⁸Шынайы өмір сыйлайтын «нан» Менмін.

⁴⁹Ата-бабаларың айдалада тәтті нанды жесе де, ақырында өлді.

⁵⁰Бірақ қазір көктен түскен «нан» мынадай: одан «жеген» адам рухани өлімге душар болмайды.

⁵¹Көктен түскен «тірі нан» Менмін. Одан «жеген» әркім мәңгілік өмірге ие болады. Бұл «нан» — Менің денем, оны адамзат шынайы өмірге ие болсын деп құрбан етемін. [24]

⁵²Сонда яһудилер өзара:

⁵²— Бұл Адам қалайша біздің «жеуіміз» үшін өз денесін қиып бере алады? — деп айтыса бастады.

⁵³Иса оларға былай деді:

⁵³— Сендерге өте маңызды шындықты айтамын: егер көктен келген Билеушінің денесінен «жеп», қанынан «ішпесеңдер», сендерде шынайы өмір болмайды. [25]

⁵⁴Кімде-кім Менің денемнен «жеп», қанымнан «ішсе», ол мәңгілік өмірге ие болады, Мен оны ақырғы күні қайта тірілтіп аламын. [26]

⁵⁵Себебі денем — шынайы рухани «нәр», ал қаным — шынайы рухани «сусын».

⁵⁶Денемнен «жеп», қанымнан «ішкен» әркім Менімен тығыз байланыста тұрады, Мен де онымен сондай байланыста тұрамын.

⁵⁷Мәңгі тірі Әкем Мені жіберді және Мен Ол арқылы өмір сүремін; сол сияқты денемнен «нәр алған» кісі де Мен арқылы шынайы өмір сүреді.

⁵⁸Ендеше, көктен түскен «нан», міне, осындай; ол ата-бабаларымыз жеген тәтті нан сияқты емес: олар ақырында өлген; бірақ осы «рухани наннан нәр алған» әркім мәңгі өмір сүреді. [27] —

⁵⁹Иса мұны Қапарнаумдағы мәжілісханада тәлім бергенде айтты.

⁶⁰Осыны естіген шәкірттерінің көбі: — Мынау жанға батар сөз екен, оны кім тыңдай алады? — десті.

⁶¹Бұл туралы наразылықты байқап қалған Иса оларға былай деді:

⁶¹— Бұл сендердің шымбайларыңа батып тұр ма? [28]

⁶²Ал Билеуші ретінде көктен келген Менің бұрын болған сол жеріме көтерілгенімді көрген кездеріңде не айтпақсыңдар?

⁶³Шынайы өмір Беруші — Киелі Рух, ал тән бұған еш жарамайды. [29] Сендерге айтқан сөздерім арқылы рухани өмірге ие бола аласыңдар. [30]

⁶⁴Бірақ іштеріңдегі кейбіреулерің сенбейсіңдер. — Себебі Иса сенбейтіндердің кім екенін және Өзіне кімнің опасыздық жасайтынын әуел бастан-ақ білген еді.

⁶⁵Сол себепті Ол былай деді:

⁶⁵— «Әкем қабілет бермесе, ешкім Маған келе алмайды» деп Мен сендерге сондықтан да айттым. [31]

⁶⁶Сол күннен бастап, шәкірттерінің көбі Исадан бас тартып, бұдан былай Оған ермейтін болды.

⁶⁷Сонда Иса он екі елшісінен:

⁶⁷— Сендердің де кеткілерің келе ме? — деп сұрады.

⁶⁸Бұған Шимон Петір:

⁶⁸— Жоқ, Ием, Сізден кетсек, кімге бармақпыз? Мәңгілік өмірге жеткізетін сөздер Сізде.

⁶⁹Біз Сіздің Құдайдың Киелісі екеніңізге [32] сеніп, соған көзіміз жетті. —

⁷⁰Иса оларға:

⁷⁰— Осы он екіңді Мен таңдап алған едім. Сонда да іштеріңдегі біреуің әзәзіл шайтанның жетегінде, — деді. [33]

⁷¹Иса Шимон Исқариоттың ұлы Яһуда туралы айтқан еді. Ол сол он екінің біреуі болғанмен, кейін Исаны ұстап берді.