Жохан 7:1-53 KZB2010 - Bible AI

¹Содан кейін Иса Ғалилея аймағын аралап жүрді. Яһуди басшылары Оны өлтірмекші болған соң, [1] Иса Яһудея аймағын аралағысы келмеді.

²Бұл — яһуди халқының Күркелер мейрамының [2] қарсаңы еді.

³Сонда Исаның туған інілері Оған:

³— Яһудеяға бара бер, сол жердегі шәкірттерің де Сенің кереметтеріңді көрсін.

⁴Халықтың көзіне түскісі келген кісі істерін жасырмайды. Сен осындай кереметтер істедің, енді Өзіңді әлемге таныт, — деді.

⁵Себебі өз інілері Оған сенбейтін.

⁶Сонда Иса оларға былай деді:

⁶— Өзімді халыққа танытатын уақытым әлі келген жоқ; ал сендер үшін қай мезгіл болса да дер кез.

⁷Осы күнәкар дүние сендерді жек көре алмайды. Ал ол Мені жек көреді, өйткені Мен оның істерінің жаман екенін әшкерелеп жүрмін.

⁸Сендер мейрамға бара беріңдер! Мен қазір бұл мейрамға бармаймын. Өзімді танытатын уақытым әлі келген жоқ. —

⁹Иса осылай деп, Ғалилеяда қалып қойды.

¹⁰Інілері мейрамға кеткен соң, халық көзінен тасаланып Иса да жолға шықты.

¹¹Яһуди басшылары: «Ол қайда?» — деп, Оны мерекеде іздеп жүрді.

¹²Келген жұрт Ол туралы көп күңкіл сөз айтып жатты. Біреулері: «Ол жақсы», — десе, басқалары: «Жоқ, халықты азғырып жүр», — деді.

¹³Бірақ яһуди басшыларынан қорыққандықтан, ешкім Ол туралы ашық айтпады.

¹⁴Мейрамның жартысы өткен кезде Иса ғибадатхананың ауласына барып, жұртқа тәлім берді.

¹⁵Яһуди діндарлары таңғалып:

¹⁵— Арнайы дайындықсыз Мынау Киелі жазбаларды қалай түсіне алады? — деді.

¹⁶Иса оларға былай деп жауап берді:

¹⁶— Ілімім Менікі емес, Мені Жібергендікі. [3]

¹⁷Соның еркін орындағысы келген әркім осы ілім Құдайдан ба, әлде Мен өз бетіммен сөйлеп тұрмын ба, соны білетін болады.

¹⁸Өз бетімен сөйлеген әркім өзінің ғана беделін ойлайды. Ал Өзін Жібергеннің беделін ойлаған Кісіге сенуге болады, Оның ойында әділетсіздік жоқ.

¹⁹Сендерге Мұса пайғамбар Таурат заңын бермеп пе еді? Шындығында бірде-біреуің сол заңға бағынбайсыңдар. Әйтпесе неге Мені өлтірмексіңдер? —

²⁰Жұрт Оған:

²⁰— Жын соқты ма? Кім Сені өлтірмек? — деп қарсылық білдірді.

²¹Иса оларға былай деп жауап берді:

²¹— Мен (демалыс күні) бір керемет іс жасадым, ал бәрің соған абыржулысыңдар. [4]

²²Мұса сүндеттеуді бұйырды. Расында бұл рәсім Мұсадан емес, одан бұрынғы ата-бабаларымыздан қалған. Сендер бұйрыққа сай балаларыңды туғаннан кейінгі сегізінші күні, демалыс күні болса да, сүндеттей бересіңдер. [5]

²³Сонымен Мұсаның заңы бұзылмасын деп, балалар демалыс күні де сүндеттеліп келеді. Ендеше біреуді демалыс күні ауруынан құлантаза сауықтырғаным үшін қалайша Маған ашуланасыңдар? [6]

²⁴Сырт көрінісіне ғана қарамай, әділ шешіңдер!

²⁵Сонда бірнеше иерусалимдік тұрғындар былай деді: — Басшылар өлтіреміз деп жүрген кісі Осы емес пе?

²⁶Қараңдар, Ол емін-еркін де ашық сөйлейді, ал Оған ештеңе демейді. Сонда Оның Мәсіх екеніне басшылардың көздері шынымен жеткені ме?

²⁷Мәсіх келгенде, Оның қай жақтан шығатынын ешкім білмейді. [7] Ал Мынаның қай жерлік екенін білеміз ғой. [8]

²⁸Сол кезде ғибадатханада тәлім беріп отырған Иса қатты дауыспен: — Менің кім екенімді, қайдан шыққанымды білесіңдер ме? Мен өз бетіммен келген жоқпын. Бірақ Мені жіберген — сендер білмейтін Ақиқаттың Өзі. [9]

²⁹Ал Мен Оны білемін, себебі Содан келдім, Мені Сол жіберді, — деді.

³⁰Содан біреулер Оны тұтқындамақ болды, бірақ Оған қарсы ешқайсысы қол көтермеді. Өйткені Исаның өз жанын қиятын уақыты әлі жетпеген еді.

³¹Ал халықтың көбі: «Құтқарушы Мәсіх келгенде, Ол Бұдан артық кереметтер көрсетер деймісің?» — деп, Исаға сене бастады.

³²Халық арасында осындай күңкіл болғаны парызшылдардың құлағына жетті. Сонда басты діни қызметкерлер мен парызшылдар Исаны тұтқындауға сақшыларын жіберді.

³³Ал Иса оларға:

³³— Тағы біразырақ уақыт араларыңда боламын, содан кейін Өзімді Жібергенге қайта ораламын. [10]

³⁴Мені іздесеңдер де, таба алмайтын боласыңдар. Себебі Мен болатын жерге сендер бара алмайсыңдар, — деді.

³⁵Сонда яһуди діндарлары өзара былай десті:

³⁵— Біз Оны таба алмайтындай Бұл қайда бармақшы? Шетелге тарап кеткен яһудилерге барып, басқа ұлттарға [11] да тәлім бермекші ме?

³⁶Оның «Мені іздесеңдер де, таба алмайтын боласыңдар» және «Мен болатын жерге сендер бара алмайсыңдар» дегені не сөз?

³⁷Мейрам соңындағы ең ұлы күні [12] Иса ел алдында тұрып: — Кімнің жаны шөлдесе, сол Маған келіп, «ішсін»!

³⁸Кім Маған сенсе, (келіп, шөлін қандырып су ішсін!) Киелі жазбаларда бұл туралы мына тәрізді сөздер айтылған: оның жүрегінен өмір беретін «су» тасқындап ағады, [13] — деді.

³⁹Иса бұларды Киелі Рух туралы айтты; Оны Исаға сенгендер кейінірек қабылдады. Құдай Исаның ұлылығын адамдарға әлі білдірмегендіктен, Өзінің Киелі Рухын сенушілерге әлі де қондырмаған еді. [14]

⁴⁰Исаның сөзін естіген кейбіреулер: — Шынында да Бұл — келуге тиісті Пайғамбар! [15] — деді.

⁴¹Басқалары: — Ал Мәсіх Ғалилея аймағынан келуші ме еді?

⁴¹— Ол — Құтқарушы Патшамыз Мәсіх! — дегенді айтты. Енді біреулері:

⁴²Киелі жазбаларда Мәсіх Дәуіт патшаның әулетінен, оның атамекені Бетлехемнен шығады [16] делінген емес пе? — деп күмән келтірді.

⁴³Осылай ел арасында Иса туралы араздық туды.

⁴⁴Бірнешеуі Оны тұтқындамақ болды, бірақ ешқайсысы Оған қарсы қол көтермеді.

⁴⁵Исаны тұтқындауға жіберілген сақшылар [17] қайта оралғанда басты діни қызметкерлер және парызшылдар олардан: — Неге Оны алып келмедіңдер? — деп сұрады.

⁴⁶Сақшылар:

⁴⁶— Бірде-бір адам Ол сияқты сөйлеген емес! — деді.

⁴⁷Сонда парызшылдар:

⁴⁷— Ол сендерді де алдап кеткен бе?!

⁴⁸Басшылар мен парызшылдардың арасында Оған сенетін біреудің болғаны ма?!

⁴⁹Оған Таурат заңын білмейтін, қарғыс атқан қара халық қана сенеді! — деп зекіді.

⁵⁰Парызшылдардың біреуі — бірде түн ішінде Исаға келіп кеткен Нікөдем [18] де сол жерде болды. Ол басқаларға қарсы шығып:

⁵¹— Таурат заңымыз бойынша біреуден жауап алып тексермей, оған үкім шығаруға бола ма? — деді. [19]

⁵²Олар Нікөдемге:

⁵²— Сен де ғалилеялық шығарсың? Киелі жазбаларды зерттеп шық: Ғалилеядан пайғамбар шықпайды, соны біліп қой! — деді.

⁵³Мұнан кейін жиналыс аяқталып, бәрі өз үйлеріне кетті.