Забур жырлары 123:1-8 KZB2010 - Bible AI

¹(Киелі үйге қарай өрлеп бара жатқанда айтылатын Дәуіттің жыры.) «Егер де Жаратқан жар болмағанда, — Деп Исраил мойындасын әр уақытта, —

²Егер де Жаратқан жар болмағанда, Адамдар бізге шабуыл жасағанда,

³Бізге қарсы қаһары жалындағанда, Олар бізді тірідей жұтар еді,

⁴Су ағымындай басып тастар еді, Тасқын судай бізді тұншықтырар еді,

⁵Буырқанған судай басып өтер еді».

⁶Олардың тістеріне бізді қимаған Жаратқан Ие мадақталсын әрқашан!

⁷Аңшының торынан құтылған құстаймыз: Тор жыртылды, енді міне, біз азатпыз!

⁸Біз қолдау күтетін бірден-бір есіміміз — Көк пен жерді жаратқан Тәңір Иеміз!