Забур жырлары 43:1-27 KZB2010 - Bible AI

¹(Ән-күйдің жетекшісіне арналған Қорах ұрпақтарының насихат жыры.)

²Уа, Құдай, Өзіңнің зор құдіретіңмен Ежелде бабалардың заманында істеген Керемет істерің жайлы құлағымызбен Көп естігенбіз әкелерімізден.

³Қыңыр ұлттарды Сен елден қуып шықтың, Ал бабаларымызды орнықтырдың. Сол тайпаларды Сен езіп тастадың, Ал бабаларымызды азат қылдың. [1]

⁴Бабалар елді семсерімен басып алған жоқ, Әрі білек күштерімен жеңіп шықкан жоқ, [2] Мұны істеген — Сенің ұлы құдіретің, Һәм бет-жүзіңнің нұры: Сен рақым көрсеттің.

⁵Сен менің Патшам әрі Құдайымсың, Жақыптың халқына құтқарылу сыйлайсың, [3]

⁶Сенімен жауларымызды соққылаймыз, Сенің атыңнан дұшпанды таптаймыз.

⁷Садағыма артпаймын мен сенімімді, Құтқара да алмайды семсерім мені,

⁸Жауларымыздан Сен бізді құтқарасың, Бізді жек көргендерді масқара қыласың.

⁹Күн сайын Құдайды айтып мақтанамыз, Атыңды мәңгілік мадақтайтын боламыз.

¹⁰Ал қазір бізді тастап, ұятқа қалдырдың, Сен жасағымызбен бірге аттанбадың,

¹¹Жауымыздан қашуға мәжбүр қылдың, Дұшпандарға бізді тонатып қойдың,

¹²Сойылатын қой іспетті бізді тапсырдың, Халықтар арасына шашыраттың,

¹³Өз халқыңды арзанға сатып жібердің, Біздің құнымызды әбден түсірдің. [4]

¹⁴Көршілерімізге бізді қорлаттың, Маңымыздағыларға мазақтаттың,

¹⁵Қыңыр ұлттардың қорлауына қалдырдың, Оларға бізді елетпей бас шайқаттың.

¹⁶Масқарамыз күнде алдымыздан шығады, Халқымыз ұяттан қара бет болады,

¹⁷Жалақордың ұрсуын естіп тұрамыз, Кек алмақ жаудың бетін көріп тұрамыз.

¹⁸Осының барлығына ұшырадық, Алайда біздер Сені ұмытпадық, Сенің Келісіміңді де бұзбадық.

¹⁹Жүрегіміз Сенен бас тартқан да жоқ, Аяғымыз жолыңнан тайған да жоқ.

²⁰Сонда да Сен бізді талқандап қираттың, Елімізді шибөрінің тұрағы еттің, Ажал қаупін бастарымызға төндірдің. [5]

²¹Егер Құдайымыздың атын ұмытсақ, Бөтен «тәңірге» қол жайып сиынсақ,

²²Құдай мұны әлде білмес пе еді? Ол жүректің құпияларын да біледі!

²³Ал Сен үшін жау бізді күнде жоюда, Сойылатын қой деп бізге қарауда.

²⁴Уа, Жаратқан, неге «жатырсың ұйқыда»? «Серпіліп», бас көтере гөр бізді қорғауға, Бізден бас тарта көрмеші біржолата!

²⁵Неге бізден бет-жүзіңді жасырасың, Қайғы мен жәбірімізді ұмытасың?

²⁶Өйткені ажал аузында жандарымыз, Әрі жерге жабысуда тәндеріміз.

²⁷Тұрып орныңнан, бізді қолдай гөр, Рақымыңа бола бізді құтқара гөр.