Забур жырлары 55:1-14 KZB2010 - Bible AI

¹(Ән-күйдің жетекшісіне арналған, «Алыстағы үнсіз көгершін» әуенімен айтылатын Дәуіттің мінажаты. Ол філістірлердің Дәуітті Ғат қаласында ұстап алған кезіне [1] арналған.)

²Уа, Құдай, бола гөр маған мейірімді, Адамдар ұмтылады таптауға мені, Күні бойы қыспақтап, тап береді.

³Жауларым күнде қудалап өкшелейді, Менмендер маған қарсы бас көтереді.

⁴Қорыққанда Саған артам сенімімді.

⁵Құдайға сеніп енді қорықпаймын, Берген сөзі үшін Оны мадақтаймын, Сонда пенде не жасай алады маған?

⁶Күнде жаулар сөздерімді бұрмалайды, Әрдайым маған қарсы қастық ойлайды,

⁷Жасырынып бір жерге жиналады, Бар қадамдарымды бақылап тұрады, Аңдып жанымды алуға ұмтылады.

⁸Уа, Құдай, сұм істерімен құтылтпашы, Сол қыңыр ұлттарды қаһарыңмен құлдыратшы. [2]

⁹Шарасыздығымды ұмытпай ескересің, «Құтыңа» жинап қой көз жасымның бәрін, Жазылған жоқ па олар кітабыңда Сенің? [3]

¹⁰Сиынып сұрасам қолдауыңды Сенің, Кері шегінеді жауларым менің, Құдайдың маған жар екенін білемін.

¹¹Берген сөзі үшін Құдайды мадақтаймын, [4] Берген уәдесі үшін Иемді даңқтаймын.

¹²Құдайға сеніп енді қорықпаймын, Сонда пенде не жасай алады маған?

¹³Уа, Құдайым, мен Өзіңе бағыштаймын Берген уәдеме сай шүкірлік тартуларын. [5]

¹⁴Өйткені аяғымды сүрінуден сақтадың, Жанымды ажалдың аранынан құтқардың. Осылай Сен мені Өзіңнің алдыңда Аман жүрсін дедің өмірдің нұрында. [6]