Забур жырлары 65:1-20 KZB2010 - Bible AI

¹(Ән-күйдің жетекшісіне арналған ән әрі жыр.) Бар әлем, Құдайға қуана дауыстаңдар,

²Оның есімін дәріптеп жырлаңдар, Зор ұлылығының даңқын шығарыңдар!

³Құдай алдында былай деп айтыңдар: «Қандай керемет Сенің іс-әрекетің, Һәм қандай ұлы Сенің құдіретің, Жауларың Сенің алдыңда бойсұнады,

⁴Бүкіл жер Саған бас иіп сиынады, Саған арнап мақтау жырларын айтады, Есіміңді мадақтап ән салады».

⁵Келіп, Құдайдың істерін көріңдер, Адамдар үшін Ол істейді кереметтер,

⁶Құдай теңізді айналдырды құрлыққа, Оның халқы жаяу өтті арғы жаққа.

⁷Ол құдіретті күшімен мәңгі билейді, Халықтарды әрдайым бақылайды, Қыңырдың бас көтеруіне жол бермейді.

⁸Халықтар, Құдайымызды мақтаңдар, Қатты дауыспен Оны мадақтаңдар!

⁹Ол жанымызды аман-есен қорғайды, Аяғымызды сүрінуден сақтайды.

¹⁰Уа, Құдай, Сен сынақтан бізді өткіздің, Күмісті балқытқандай тазарта бердің, [1]

¹¹Тұзаққа түсіріп бізді құлаттың, Арқамызға құлдықтың жүгін арттың,

¹²Адамдарды басымызға шығардың, Оттан да, судан да бізді өткіздің, Ал ақыры молшылыққа жеткіздің.

¹³[13-14] Қасірет кезінде аузымнан шыққан, Қиындыққа тап болғанда тілім айтқан, Саған берген сертімді іске асырамын, Өртелмек құрбандықпен үйіңе барамын.

¹⁵Саған арнап семіз малдарды шаламын, Қошқар майын өртеп, жұпарын шығарамын, Бұқалар мен ешкілерді де ұсынамын.

¹⁶Ей, Құдайымызды қастерлейтіндер, Барлығың келіп, құлақ түріңдер. Оның маған істегенін сендерге айтамын.

¹⁷Мен Құдайға дауыстап сиындым, Аузымменен Оның даңқын шығардым.

¹⁸Жүректе бар күнәмнан бас тартпасам, [2] Дұғама құлақ салмас еді Жаратқан.

¹⁹Расында Құдай құлақ түрді маған, Сиынғанымда даусым жетті Оған.

²⁰Мінажатымнан менің бас тартпаған, Мейірімін менен алып қоймаған Құдайымыз мадақталсын әрқашан!