Забур жырлары 67:1-36 KZB2010 - Bible AI

¹(Ән-күйдің жетекшісіне арналған Дәуіттің әні әрі жыры.)

²Құдай көтеріліп, жауларын шашыратсын, Оны жек көретіндер алдынан қашсын.

³Түтіннің желмен ыдырайтыны сияқты, Уа, Құдайым, жауларыңды ыдыратшы, Балауыздың отқа еритіні іспетті, Зұлымдарды алдыңнан құртып жіберші.

⁴Бірақ әділдер болса, шаттана ән-салсын, Құдай алдында күліп мәз-мейрам болсын.

⁵Біздің Құдайымызға ән айтыңдар, Оның есімін дәріптеп жырлаңдар, Бұлттармен жүретін Оны мадақтаңдар, [1] Жаратқан Ие — Оның аты, біліп алыңдар, Көз алдында шат-шадыман болыңдар.

⁶Құдай әке болады жетімдерге, Қорғаушы болады жесірлерге, Тағында отыр Ол киелі мекенінде,

⁷Жалғыз жандарға жанұя сыйлайды, Тұтқынды босатып, шаттыққа бөлейді, Ал қыңырды қапырық шөлге тастайды.

⁸О, Құдай, халқыңды Мысырдан бастап шыққанда, Айдалада оны ертіп жүріп отырғаныңда,

⁹Жер сілкініп, аспаннан жаңбыр қатты құйылды, Уа, Құдай, көз алдыңда Синай тауында, Исраил сиынған Өзіңнің алдыңда.

¹⁰Уәделі еліңе, я, Құдай, нөсер жаудырдың, Кеуіп қалған жерді қайтадан жандандырдың, [2]

¹¹Рақыммен халқыңды елде қоныстандырдың, Уа, Тәңірім, сол кедейлерді Сен қамқорладың.

¹²Жаратқан Ие мынаған бұйрық шығарды, Көптеген қыз-келіншек оны хабарлады:

¹³Жау әскері басшыларымен қашып кетеді, Ауылдағы әйел заты олжаны бөліседі,

¹⁴Мал бағып қораларында қонған солар Күміс оранып кептер қанатына ұқсар, Алтын әшекей тағып, мамықтай құлпырар.

¹⁵Құдіретті Құдай патшаларды шашыратты, Салмон тауында соққан ақ боранға ұқсатты.

¹⁶Құдай жаратқан керемет — Башан тауы, Шыңдары заңғар биік — Башан тауы.

¹⁷Зәулім шыңдар, қызғанасыңдар не үшін Құдай тұруға таңдап алған Сион тауын, Жаратқан Иенің мәңгі мекендейтін тауын?

¹⁸Құдайдың күймелері [3] сан мыңдаған, Араларында Иеміз шайқасқа аттанған, Киелі үйіне көшіп келді Синайдан.

¹⁹Сен заңғар биікке көтерілдің, Көптеген тұтқындарды ертіп жүрдің, Адамдардан [4] тартулар қабылдадың, Бас көтергендерден де сыйлықтар алдың, Құдай Иенің мұнда тұруы үшін. [5]

²⁰Әрдайым Иеміз мадақталсын, Құтқарушы Құдайымыз даңқталсын: Жүгімізді көтеріп жүр Ол күн сайын, Құдайдың Өзі — бізді аман сақтайтын. [6]

²¹Құдайымыз бізді қорғап-қолдайды, Жаратушы Тәңір Ие ажалдан сақтайды. [7]

²²Құдай жауларының басын талқандайды, Соғысқұмар, қыңыр қылмыстыларды жояды.

²³Сол жауыздар жайлы Иеміз былай деген: «Оларды Башан тауынан да алып келем, Теңіздің ар жағынан да қайтарып әкелем.

²⁴Сонда аяқтарың жаудың қанын басады, Әрі иттерің қанды жалап тойынады».

²⁵Уа, Құдай, Сенің салтанатты шеруің, Киелі тұрағыңа Сенің кіруің Көрінеді бар жұртқа, о, Патшам, Құдайым.

²⁶Әншілер жүр алдында, аспапшылар соңында, Даңғыра ойнаған қыздар араларында:

²⁷«Жиындарда Құдайымызды мадақтаңдар, Исраилдің ұрпақтары, Иемізді даңқтаңдар!» [8]

²⁸Кенже Бунямин руы бастап келеді, Яһуда басшыларының тобы ереді, Забулон, Нафталим басшылары да жүреді.

²⁹Уа, Құдай, күш-қуатыңды жинашы, Бұрын көрсеткен құдіретіңді танытшы,

³⁰Иерусалимдегі ғибадатханаңа бола Патшалар Саған сый-тарту әкеледі сонда.

³¹Жау халықтарды сөгіп жуасытшы: Перғауын — қамыстағы хайуан сияқты, [9] Ал бұзаудай күшсіз ұлттар арасындағы Бұқалар табынындай — оның әміршілері, Олар күмістен салық талап етеді. [10] Соғысқұмар ұлттарды тарқатып жіберші!

³²Мысырдан жіберілген мырзалар келеді, Құш елі [11] де қол созып Құдайға көнеді.

³³Жердегі патшалықтар, Құдайға ән салыңдар, Иемізді мадақтап ән-жыр айтыңдар,

³⁴Дәріптеп ежелден аспанда жүрген Иемізді, Тыңда, зор даусымен Ол күркірейді.

³⁵Хабарлаңдар Құдайдағы құдіретті! Исраилдің үстінде Оның салтанаты, Әрі бұлттардан жоғары күш-қуаты.

³⁶Құдай киелі үйінде үрей туғызады, Исраилдің Құдайы халқын нығайтады.

³⁶ Лайым Құдай мадақтала берсін!