Забур жырлары 70:1-24 KZB2010 - Bible AI

³Бола гөр лайым бас сауғалар панам, Сөзіңе сай құтқаршы, [1] құздай қорғаным!

⁴О, Құдайым, босатшы мені зұлымнан, Күнәкар қанаушының қыспағынан.

⁵Жаратушы Тәңір Ием, үмітім Сенсің, Жастайымнан-ақ Өзіңе сеніп келемін,

⁶Құрсақтан-ақ Саған сүйеніп келемін, Туғаннан-ақ Сен қамқоршымсың менің. Еш таусылмас Сені мадақтайтын әнім.

⁷Көп адамға ғажап белгі іспеттімін, Ал Сен күш-қуатым мен қорғаушымсың.

⁸Өзіңді мадақтауды еш тоқтатпаймын, Сенің көркіңді [2] күнде жырлаймын.

⁹Қартайғанда маған теріс қарай көрме, Күшім қайтқанда мені тастап кетпе.

¹⁰Жауларым маған қарсы сөз байласуда, Жанымды аңдығандар ақылдасуда:

¹¹«Жоқ құтқарушысы, Құдай тастап кетті, Қуып жетіп, ұстап алайық!» деседі.

¹²Уа, Құдай, менен алыстап кетпеші, Құдайым менің, көмекке тез жетші.

¹³Маған мін таққандар ұялып, жоқ болсын, Қастық ойлаған олар ұятқа орансын!

¹⁴Ал мен әрдайым үмітпен күтудемін, Барған сайын молырақ дәріптеймін,

¹⁵Сенің әділдігің және құтқаруың Туралы мен күн ұзаққа айтудамын, Маған көрсетіп келген жақсылықтарың Сансыз, олардың бәрін біле алмаймын.

¹⁶Жаратушы Тәңір Ием, құдіретіңді ойлаймын, [3] Тек Сенің әділдігіңді жұртқа жариялаймын.

¹⁷Уа, Құдай, жастайымнан мені үйретесің, Әлі де ғажаптарыңды паш етемін.

¹⁸Қартайып басымды қырау шалғанда, О, Құдайым, мені жалғыз қалдырма, Қайта, құдіретіңді жаңа ұрпаққа, Керемет істеріңді келер буындарға Жол бере көрші маған уағыздауға.

¹⁹Әділдігің Сенің заңғар аспандай, Ұлы істерді жасап келесің, о, Құдай, Саған тең келер кім бар еді, уа, Құдай?

²⁰Көп ауыр азаптар жібердің маған, Қалпына келтіресің бірақ қайтадан Жанымды менің, шығарып тұңғиықтан.

²¹Құрмет сыйлап жұбата гөр жаңадан.

²²Сонда Сені жетігенмен мадақтаймын, Сен уәдеңе беріксің, уа, Құдайым, Исраил сиынатын Киелі Тәңірім, Саған домбыра тартып әнімді арнаймын,

²³Шаттанып Саған жырымды бағыштаймын, Өйткені Сен мені құтқардың апаттан.

²⁴Иә, күн сайын әділдігің жайлы айтам: Маған қастық ойлағандар ұятқа батқан!