Забур жырлары 74:1-11 KZB2010 - Bible AI

¹(Ән-күйдің жетекшісіне арналған, «Құрта көрме!» әуенімен айтылатын Асафтың әні әрі жыры.)

²Саған мақтау айтамыз, уа, Құдайым! Сені дәріптейміз, бізге жақынсың, [1] Паш етіледі керемет істерің.

³Сен былай дедің: «Кезін Мен белгілеймін, Әділетті сотты Өзім жүргіземін.

⁴Шайқалады жер күллі тұрғындарымен, Тіреулерін оның берік ұстаймын Мен».

⁵«Бөсуіңді тоқтат!» — дедім мақтаншаққа, «Жұдырығыңды [2] көтерме! — дедім арамзаға, —

⁶Көкке қарсы да жұдырығыңды көтерме, Тоңмойын болып паңдана сөйлеме!»

⁷Шығыс, батыс не айдаладан келген Ешкім басқаны жоғарылатпас шынымен,

⁸Себебі сотты Құдайдың Өзі жүргізеді, Ол біреуді түсіріп, басқаны көтереді.

⁹Жаратқанның қолында «қаһарлы тостаған», [3] Іші дәмдеуіштермен араласқан Көпірген «жаңа шарапқа» толған. Оны құйып береді Жаратқан, Бар зұлымдар ішуге тиіс содан, Сарқып ішеді тіпті ашытқысынан.

¹⁰Ал мен Иемнің істерін мәңгі паш етемін, Жақыптың сиынған Құдайын әндетемін,

¹¹Өйткені Құдай Иеміз былай деген: «Мен зұлымдарды күшінен айырамын, Ал әділдің күш-қуатын молайтамын!» [4]