Забур жырлары 78:1-13 KZB2010 - Bible AI

¹(Асафтың жыры.) Уа, Құдай, Өзіңе бағынбаған ұлттар Сенің меншікті еліңді басып, олар Сенің киелі үйіңді арамдады, Иерусалимді қиратып, талқандады.

²Жау Сенің қызметшілеріңнің мәйіттерін Құстарға жемтік етіп тастап кеткен, Олар адал адамдарыңның денелерін Жабайы аңдардың азығы еткен,

³Солардың қанын Иерусалимді Айналдыра ағызды су тәрізді, Сүйектерін жерлейтін қалдырмады ешкімді.

⁴Көршілеріміз бізді келеке қылуда, Маңымыздағылар мазақтап қорлауда.

⁵Қашанғы бізге ашуланасың ұдайы, Уа, Ием, [1] қашанғы қаһарың оттай лаулайды?

⁶Ашуыңды төксеңші соның орнына Өзіңді мойындамайтын бөтен ұлттарға, Саған [2] сиынбайтын патшалықтарға.

⁷Олар Жақыптың ұрпақтарын [3] жалмады, Мекен-тұрағын қиратып, бос қалдырды.

⁸Бізге аталарымыздың күнәларын артпашы, Қайта, өз рақымыңды бізге тезірек жолдашы, Өйткені әлсіреп түңілдік аса қатты.

⁹Құтқарушы Құдайымыз, бізді қолдай гөр, Атыңның даңқына бола азат ете гөр, Есіміңе бола бар күнәмізді кешіре гөр.

¹⁰Бізді Өзіңе бағынбаған халықтардың «Құдайы қайда екен бұлардың?» Деген мазағына неге қалдырасың? Олар Сенің қызметшілеріңнің қанын төкті, Әділ жаза тартқандарын бізге көрсетші.

¹¹Тұтқындардың күңіренісіне құлақ салшы, Ұлы құдіретіңмен әрекет жасашы, Өлімге кесілгендерді аман сақташы.

¹²Көршілерімізге, уа, Ием, өз атыңды Қорлағандарын жеті еселеп қайтаршы.

¹³Бағып жүрген халқың әрі «отарыңбыз», [4] Сондықтан Өзіңді мәңгі мадақтаймыз, Күллі ұрпаққа ұлылығыңды даңқтаймыз.