Забур жырлары 80:1-17 KZB2010 - Bible AI

¹(Ән-күйдің жетекшісіне арналған, ғаттық күй аспабының сүйемелдеуімен айтылатын Асафтың жыры.)

²Күш-қуатымыз — Құдайға шаттана ән салыңдар, Жақып сиынған Құдайға қуана айқайлаңдар,

³Ән-жырлар айта бастап, даңғыраны соғыңдар, Домбыра, жетігенмен әсем әуен тартыңдар!

⁴Жаңа ай туғанда кернейде ойнаңдар, Ай толғанда да тойымызды жариялаңдар. [1]

⁵Өйткені бұл — Исраил халқының міндеті, Жақып сиынған Құдайдың берген ережесі.

⁶Жаратқан Иеміз Мысырға қарсы шыққанда, Осыны бұйырды [2] Жүсіптің ұрпағына, Біз бөтен тілді естіген уақытта. [3]

⁷(Жаратқан былай деп білдірді бұйрығын:) «Иықтарыңнан ауыр жүкті алып тастадым, Қолдарыңды көтерген себеттен босаттым. [4]

⁸Қиын кезде айқайлап сиындыңдар Маған, Сонда сендерді азат етіп алдым аман. Күннің күркірінен сендерге құлақ салғам, Меріба сулары маңында сендерді сынағам. [5]

⁹Халқым, Мені тыңда, сендерге ескертемін, Игі болар, Исраил, Маған құлақ түргенің!

¹⁰Ешқандай да бөгде тәңірлерің болмасын, Құлшылық етпеңдер жат тәңірлерге ешқашан!

¹¹Мен Жаратқан Ие — бірден-бір Тәңірлеріңмін, Мысыр елінен алып шыққан Иелеріңмін. Ал енді, ауыздарыңды ашыңдар айқара, Мен оларды толтырамын жақсылыққа.

¹²Бірақ таңдаған халқым Мені тыңдамады, Исраилдің ұрпағы Маған бағынбады,

¹³Сондықтан Мен қасарысқан жүректеріне Жол бердім өз беттерімен жүрулеріне.

¹⁴Халқым Менің сөзіме құлақ салса екен, Исраилдің ұрпағы жолыммен жүрсе екен!

¹⁵Онда Мен жауларын лезде жуасытар едім, Қинаған дұшпандарына қол жұмсар едім,

¹⁶Өзімді жек көргендер Маған бағынғансыр еді, Ал азапты уақыттары мәңгіге созылар еді. [6]

¹⁷Бірақ сендерді жақсы бидаймен тойдырар едім, Жартастағы балмен [7] рақатқа қандырар едім».