Забур жырлары 82:1-19 KZB2010 - Bible AI

¹(Асаф сөзін жазған ән әрі жыр.)

²Уа, Құдайым, үндемей қала берме, Тіл қатпастан тып-тыныш бола көрме,

³Себебі жауларың у-шу көтеруде, Сені жек көретіндер өркөкіректенуде.

⁴Халқыңа қарсы олар сұмдық ойласуда, Өзіңе қымбат жандарға [1] қарсы ақылдасуда:

⁵«Кәне, құртайық оларды ұлттар арасынан, Исраил аталмасын енді қайтып ешқашан».

⁶Бірауыздан олар сөз байласып Жатыр, Саған қарсы одақ құрып:

⁷Шатырларда тұрған едомдықтар, Ысмағұлдық, моабтық, ажарлықтар, [2]

⁸Гебалдық, аммондық, амалектіктер, Тирдің тұрғындары мен філістірлер.

⁹Ассурдың халқы да оларға қосылды, Луттың ұрпақтарына [3] қолдаушы болды.

¹⁰Сен ежелде Мадиян тайпасына, Сисара мен Ябинге Қишон аңғарында Істегеніңдей [4] істеші жауларымызға!

¹¹Сол байырғылар Ендорда талқандалды, Төгілген қи-қоқыстай жерге тапталды.

¹²Істеші жаулардың әміршілеріне Ежелде істегеніңдей Ориб пен Зипке, Істеші олардың бар көсемдеріне, Өзің істегеніңдей Салман мен Зебейге, [5] Өйткені жау былай деді біз жөнінде:

¹³«Құдайдың мекендерін иемденейік, Жайылымдарын қолға түсірейік!»

¹⁴Зұлымдарды етші құйын соққан тозаңдай, О, Құдайым, жел ұшырған сабандай

¹⁵Әрі от жалмап қойған ормандай, Жалын күйреткен қырат басындай.

¹⁶Дұшпанды қуып шықшы елден құйыныңмен, Дүрбелеңге түсірші Өзіңнің дауылыңмен,

¹⁷Уа, Жаратқан жауды қара бет қылып масқарала, Олар Саған бұрылып, сиынсын атыңа.

¹⁸Ал қыңырлары лайым қысылып абыржысын, Олар қорланып, ақырында өлім құшсын,

¹⁹Жаратқан Ие деп аталған жалғыз Сенің Бүкіл жер бетіне билік жүргізетін Хақ Тағала екеніңді барлығы білсін!