Забур жырлары 88:1-53 KZB2010 - Bible AI

¹(Езрахтық Етанның [1] насихат жыры.)

²Зор рақым-шапағатыңды, уа, Жаратқан, Әр уақытта мен ән-жырға қосамын, Сөзіңе беріктігіңді Өзіңнің Бар ұрпақтарға айтатын боламын.

³Солай Сенің тұрақты рақымыңның Мәңгілік екенін жариялаймын. Өзіңнің шындығыңды [2] көкте бекіттің, (Өйткені Сен мынаны айтқан едің:)

⁴«Мен таңдаулыммен Келісім жасадым, Қызметшім Дәуітке былай деп ант бердім:

⁵Әулетіңді әрқашан да нығайтамын, Ұрпақтан ұрпаққа тағыңды орнатамын».

⁶Уа, Жаратқан, көкте даңқталар кереметтерің, Қасиеттілер жиынында [3] — өз беріктігің.

⁷Көктегі кім Иемізбен теңесе алар, Күштілер [4] арасында кім Жаратқанға ұқсар?

⁸Қасиетті періштелердің үлкен тобы Терең қастерлейді айбынды Құдайды, Биік тағын айналдыра Оны құрметтейді.

⁹Уа, Жаратушы Құдай, Әлемнің Иесі, Саған ұқсас кім бар, сондай құдіретті? Адалдығың жан-жақтан қоршайды Сені.

¹⁰Уа, Ием, буырқанған теңізге билік айтасың, Көтерілген толқындарын тыншытасың.

¹¹Паң мысырлықты [5] Сен талқандап қираттың, Жауларыңды күшті қолыңмен шашыраттың.

¹²Көк те — Сенікі, жер де — өз меншігің, Негізін салдың Сен күллі әлемнің, Әрі жараттың ондағылардың бәрін.

¹³Сен жараттың солтүстік, оңтүстікті де, Табор, Хермон таулары қуанады есіміңе. [6]

¹⁴Қолың мен білегің ерен қуатты, Оң қолың барлығынан да жоғары.

¹⁵Әділдік, әділет — тағыңның негізі, Рақым мен адалдық алдыңда жүреді.

¹⁶Мадақтау жиналысына шақырған Қуанышты дауысты [7] танып, қосылған Халық сондай бақытты, өйткені оған Жүзіңнің нұрында жүру бұйырылған,

¹⁷Күні бойы олар ұлы атыңа қуанады, Әділдігің оларды жоғарылатады.

¹⁸Бұлардың күші мен ұлылығы Өзіңнен, Сенің рақымыңмен патшамыз күшейген. [8]

¹⁹Себебі қорғанышымыз [9] — Жаратқан Иеден, Біздің патшамыз — Исраилдің киелі Тәңірінен.

²⁰Уа, Жаратқан, бірде Сен аян берген едің, Адал кісіңе мынадай сөз айтқан едің: [10] «Мен жауынгер адамға күш-қуат дарыттым, Халықтан оны таңдап ап, жоғарылаттым:

²¹Осы қызметшім Дәуітті тауып алдым, Арнайы майымды оған жақтырттым, [11] Патша болуға оны тағайындаттым.

²²Ұдайы оны қорғап-қолдайтын боламын, Әрдайым күш-қуат сыйлайтын боламын.

²³Жау одан амалын асыра алмайды, Зұлымдар тықсырып, жеңе алмайды,

²⁴Оның алдынан жауларын құртамын, Өзін жек көргендерді қиратамын.

²⁵Берік рақымыма [12] Дәуіт ие болады, Өз атыма бола оның күші артады,

²⁶Дәуіттің билігін Жерорта теңізіне Создырам, әрі шығыстың өзендеріне. [13]

²⁷Ол былай деп атамақ атымды Менің: «Сен Әкемсің, Құдайымсың өзімнің, [14] Жартастай паналайтын Құтқарушымсың».

²⁸Мен оны «Тұңғышым» [15] деп белгілеймін, Жер патшаларынан үстем етемін.

²⁹Мейірімімді оған мәңгі сақтаймын, Келісімімнен [16] ешқашан бас тартпаймын.

³⁰Дәйім оның ұрпағын нығайтамын, Тағын да көк іспетті шексіз орнатамын.

³¹Ал ұлдары тастаса Таурат заңымды, Әрі орындамаса бұйрықтарымды,

³²Егер бұзып жатса ережелерімді, Сақтаудан бас тартса өсиеттерімді,

³³Онда күнәлары үшін таяқпен ұрамын, Зұлым істері үшін қамшымен соғамын.

³⁴Ал Дәуіттен мейірімімді қайтып алмаймын, Өз адалдығымнан ешқашан таймаймын,

³⁵Мен Келісімімді еш уақытта бұзбаймын, Аузымнан шыққан сөзді өзгертпеймін.

³⁶Мен Дәуітке ант еткенмін біржолата, Қасиеттімін, жалғандық айтпаймын да:

³⁷Әулеті жалғасады шексіз уақытқа, Оның патшалық тағы Менің көз алдымда, Күн іспетті ол әрдайым бар болады да,

³⁸Ай іспетті ол тұрақты болып орнайды, Аспандағы адал айғаққа ұқсайды». [17]

³⁹Ал қазір Сен тағайындаған патшаңнан Сырт айналдың, жаратпай ашуландың оған,

⁴⁰Қызметшіңмен жасаған Келісіміңнен тандың, Оның тәжін жерге лақтырып арамдадың.

⁴¹Күллі қамалдарын жойып қираттың, Қорғандарын үйіндіге айналдырдың.

⁴²Жолшыбай өткендер оны тонайды, Көршілері келекелеп мазақтайды.

⁴³Оның жауларын күшейтіп, үстем еттің, Барлық дұшпандарын шаттыққа кенелттің.

⁴⁴Патшаның семсерінің жүзін мұқалттың, Шайқаста оны қорғап-қолдамадың.

⁴⁵Оның жарқын салтанатын тоқтаттың, Әрі патшалық тағын жерге құлаттың.

⁴⁶Сен патшаның жастық шағын қысқарттың, Масқараны оған шапандай жаптың.

⁴⁷Қашанғы, уа, Жаратқан, жасырынбақсың? Ием, мәңгі лаулай ма оттай қаһарың?

⁴⁸Ескерші өмірімнің қысқалығын, Қандай бекершілікке адамзатты бұйырдың! [18]

⁴⁹Қай адам ғұмыр кешіп, өлімді көрмеді, Кім ажал тырнағынан өзін құтқарды?

⁵⁰Уа, Ием, қайда бұрынғы зор рақымың, Адалдығың мен Дәуітке берген антың?

⁵¹Ием, ескере гөр құлыңның мазақталғанын, Көп ұлттың мысқылының көңіліме батқанын,

⁵²Уа, Жаратқан, жауларыңның балағаттағанын, Өзің бекіткен патшаңның істерін қорлағанын.

⁵³Жаратқан Ие мәңгілік мадақталсын! Аумин, иә, аумин.