Зәкәрия 2:1-13 KZB2010 - Bible AI

¹Мен қайтадан жоғары қарағанда қолында өлшеуіш жібі бар біреуді көрдім.

²Мен одан: — Қайда бара жатырсыз? — деп сұрадым. Ол: — Иерусалимнің ені мен ұзындығын білу үшін оны өлшеуге бара жатырмын, — деп жауап берді.

³Менімен сөйлескен періште сол кезде алға қарай беттеді. Сонда басқа бір періште оған қарсы кездесті.

⁴Бұл оған былай деді:

⁴— Ана жас жігітке тездетіп барып мынаны айт: Иерусалим малы мен адамы көп болғандықтан қамал қабырғасы жоқ, ашық қала сияқты болады!

⁵«Мен Өзім әрі қаланың айналасындағы жалындаған отты қабырғасы, [1] әрі оның ішіндегі нұрлы салтанаты [2] іспетті боламын», — деп уәде береді Жаратқан Ие.

⁶«Уа, халайық, дайындалып, жолға шығыңдар! Солтүстіктегі елден [3] қашып кетіңдер! — деп ескертеді Жаратқан Ие. — Себебі Мен сендерді дүниенің шартарабына шашыратып жіберген едім.

⁷Уа, Сионның халқы, Бабыл халқымен бірге тұрып жатқан сендер сол елден қашып кетіңдер!»

⁸Себебі бір даңқты кезеңнен кейін Әлемнің Иесі мені өздеріңді тонаған халықтарға жіберіп, [4] мынаны айтты: «Кім сендерге тиіссе, соның Менің көзімнің қарашығына тиіскені!

⁹Мен таяуда оларға қарсы қолымды созбақпын. Сонда оларды өз құлдары тонайтын болады». [5] — Сол кезде сендер Әлемнің Иесінің мені жібергенін анық білетін боласыңдар.

¹⁰«Қуана ән салып шаттаныңдар, уа, Иерусалимнің халқы! Мен сендердің араларыңда тұруға келе жатырмын! — деп уәде етеді Жаратқан Ие. —

¹¹Сол күні көптеген ұлттар Менімен тығыз байланысқа түсіп, Менің халқым болады. Мен сендердің араларыңда тұрамын». — Сол кезде сендер мені өздеріңе жіберген Әлемнің Иесі екенін анық білетін боласыңдар.

¹²Жаратқан Ие Яһуданы Өзіне бағышталған қасиетті еліндегі айрықша үлесі [6] ретінде қабылдап, Иерусалимді (өз қаласы болуға) қайтадан таңдап алады.

¹³Бүкіл адамзат Жаратқан Иенің алдында тынышталсын! Ол Өзінің киелі тұрағынан шығып, әрекет етіп жатыр. [7]