Зәкәрия 6:1-15 KZB2010 - Bible AI

¹Мен қайтадан жоғары қарап, екі таудың арасындағы шатқалдан шығып келе жатқан төрт күймені көрдім. Сол екі тау қола тау екен.

²Бірінші күймеге жирен, екіншісіне қара,

³үшіншісіне ақбоз, төртіншісіне ала аттар жегіліпті. Аттардың бәрі де мықты екен.

⁴Сонда мен өзіммен сөйлескен періштеден:

⁴— Мыналар не, мырзам? — деп сұрадым.

⁵Періште маған:

⁵— Бұлар көктің төрт рухын бейнелейді. Осы төрт рух бүкіл жер бетінің Иесінің алдында тұратын нөкерлері. Олар Оның еркін орындауға шығып бара жатыр, [1] — деп түсіндірді. —

⁶Қара аттар жегілген күйме солтүстік жаққа қарай, ақбоз аттар жегілген күйме олардың артынан, [2] ал ала аттар жегілген күйме оңтүстікке қарай бағыт алды.

⁷Сол мықты аттар алға шығып, жер бетін шолып қайтуға асыға жұлқынды. Сондықтан ол: «Барыңдар, жерді шолып қайтыңдар!» — деп бұйырды. Осыны естісімен олар жерді шарлауға аттанды.

⁸Сонда Жаратқан Ие маған дауыстап: — Біліп ал, солтүстікке кеткендер сол өлкеге [3] Менің қаһарлы жазамды тартқызып, Рухымды тыныштандырды, — деді.

⁹Жаратқан Ие маған тағы да сөзін арнап былай деді:

¹⁰— Бабылға жер аударылудан қайта оралған Хелдай, Тобиях және Едаях есімді адамдардан алып келген сый-тартуларын қабылдап, сол күні Софония ұлы Жосияның үйіне бар!

¹¹Осы күміс пен алтыннан алып, тәж жасатып, оны бас діни қызметкер Ехосадық ұлы Ешуаның басына кигіз. [4]

¹²Оған былай де: Әлемнің Иесі мынаны айтады: Мынау — «Өскін» [5] есімді адам. Ол өз орнынан өсіп-өрбіп, Жаратқан Иенің ғибадатханасын тұрғызатын болады.

¹³Иә, Жаратқан Иенің ғибадатханасын тұрғызатын Сол болады! Ол салтанатқа бөленіп, өз тағында отырып билік құрмақ. Ешуа діни қызметкер ретінде патшалық таққа отырған соң, екі лауазымның арасында ынтымақ орнайды.

¹⁴Ал тәж Хелдай, [6] Тобиях, Едаях және Софония ұлы Хеннің [7] қамқорлығына тапсырылып, ғибадатханада естелік белгі ретінде сақталады.

¹⁵Алыста тұратын халықтар келіп, Жаратқан Иенің ғибадатханасын салуға көмектесетін болады. [8] Сонда мені өздеріңе жіберген Әлемнің Иесі екенін анық білетін боласыңдар. Егер Құдай Иелеріңнің айтқандарына бұлжытпай құлақ ассаңдар, осының бәрі жүзеге асады.