Мысырдан шығу 20:1-26 KZB2010 - Bible AI

¹Сол кезде Құдай (халыққа арнап) мына сөздердің бәрін айтты:

²«Мен сені құлдықта жүрген Мысыр елінен алып шыққан Құдайың — Жаратқан Иемін.

³Сенің Менен басқа ешқандай тәңірлерің болмасын!

⁴Аспанда, жерде не суда бар нәрселердің ешқайсысынан өзіңе тәңір бейнелерін жасама!

⁵Сондайларға бас иіп табынып, құлшылық етпе! Мен сенің Құдай Иеңмін, Өзімнен басқа тәңірлеріңнің болуына еш төзбеймін. [1] Мені менсінбейтіндерді немерелері мен шөберелеріне дейін жазалаймын,

⁶ал Өзімді сүйіп, өсиеттерімді ұстанғандарға тіпті мыңыншы ұрпағына [2] дейін рақымымды төгемін.

⁷Құдай Иеңнің атын орынсыз аузыңа алма!

⁷Жаратқан Ие Өзінің атын орынсыз [3] қолданғандарды жазасыз қалдырмайды.

⁸Демалыс күнін [4] Тәңір Иеге бағыштауды есіңде сақтайтын бол!

⁹Алты күн еңбектеніп барлық жұмыстарыңды істей бер,

¹⁰ал жетінші күн — Құдай Иеңе бағышталған демалыс күні. Сол күні не өзің, не ұл-қызың, не қызметшілерің, не малдарың, не қалаларыңда тұрып жатқан жат жұрттықтар ешқандай жұмыс істемеңдер!

¹¹Себебі алты күн ішінде Жаратқан Ие аспан, жер және теңізді әрі олардағы күллі нәрселерді жаратып, жетінші күні демалды. Сондықтан Ол демалыс күніне оң батасын беріп, оны Өзіне бағыштап қасиетті деп белгіледі. [5]

¹²Ата-анаңды сыйла!

¹²Құдайың Жаратқан Ие өзіңе табыстайтын елде ұзақ өмір сүруің үшін осылай істе.

¹³Кісі өлтірме!

¹⁴Неке адалдығын бұзба!

¹⁵Ұрлық жасама!

¹⁶Ешкімді бекерге айыптама! [6]

¹⁷Басқаның үйіне ие болуға сұқтанба!

¹⁷Оның әйеліне, құл-күңіне, [7] өгіз-есегіне не өзге де ешқандай нәрсесіне заңсыз ие болуға сұқтанба!»

¹⁸Бүкіл халық найзағайдың жарқылдап, түтіннің тауды қаптағанын көріп, күннің күркіреп, кернейдің қатты дауыстағанын естіп тұрды. Содан олар зәрелері ұша дірілдеп кетті. Халық алыстан тұрып,

¹⁹Мұсадан:

¹⁹— Бізбен өзіңіз сөйлесіңіз, ал біз тыңдайтын боламыз. Құдай бізбен тікелей тілдесе көрмесін, әйтпесе құрып кетерміз, — деп өтінді.

²⁰Мұса халыққа:

²⁰— Қорықпаңдар! Құдай сендерді (Өзінің араларыңда болуына) үйрету үшін [8] осында келді. Бұдан былай Оны әрдайым шын жүректен қастерлейтін болыңдар! Бұларың сендерді күнә жасаудан сақтайтын болады, — деді.

²¹Содан халық алыста қалып, ал Мұса Құдай тұрған қою қараңғылыққа қарай беттеді.

²²Сонда Жаратқан Ие Мұсаға былай деп бұйырды: — Исраилдің үрім-бұтағына мынаны айт: Көктен сендерге тіл қатқанымды өздерің көріп-естідіңдер.

²³Алтын-күмістен тәңір бейнелерін жасап алып, Менімен қатар қоймаңдар! [9]

²⁴Маған арнап топырақтан құрбандық орнын салыңдар. Ұсақ әрі мүйізді ірі қара малдарыңнан құрбандық шалып, кейбіреулерін құрбандық орнының үстінде тұтасымен өртеп Маған ұсыныңдар. Ризашылық құрбандықтарының белгілі бөліктерін де соның үстінде өртеп ұсыныңдар. [10] Мен өз атымды атап, дәріптеулеріңе рұқсат еткен әрбір орында солай істеңдер. Сонда Мен қастарыңа келіп, өздеріңді жарылқаймын.

²⁵Егер Маған арнап құрбандық орнын тастардан қаластырып салсаң, тастары қашалмаған болсын. Себебі егер қашауды қолдансаң, оны арамдайсың.

²⁶Сондай-ақ жалаңаш тәнің көрінбес үшін құрбандық орныма баспалдақпен көтерілме.